Ikiyyia ĩthĩ Thaulo wobjiait cĩ Makayyiokto
(Bẽl Tiicanẽ cĩk Tionniawu 22:6-16; 26:12-18)
9
Iriangrianganeei balna Thaulo kũdũt wobjiak cĩk Makayyioktak, adiim ngĩ aruk ĩnõõgõ. Ĩthõng ũũk ĩcĩ paadĩr cobbi, 2 kũũk kijina nyaragẽt ĩcĩ makayyiok cĩk Ciithi cĩk Lawintiak Damathkatha. Adĩman balna nẽ thoothonniok cĩkkõ, nyatarka adiim balna nẽ ngĩ agam eet cĩk maacĩk kĩ ngaay cĩk õwõb gõõl cĩ Makayyioit Yesu, kĩĩ kũũwĩ nẽ ĩnõõgõ kẽcẽbtẽ kĩjana Yeruthalẽma. 3 Ma baa ngĩĩ nẽ õjõõn kĩ Damathkath, hẽẽrõna cĩnnĩ ẽẽ, tamanoko utdukwuay lanyĩtĩ ĩmma tammuatiddina, ĩthõng ũtũkũl ĩnõõnõ. 4 Ngaatĩ uuki Thaulo looc, ĩthõng ĩthĩrar molook ĩmma cĩ ethei ĩnõõnõ ne, “Thaulo, Thaulo, adĩmanna niia aneeta buth nyia?”5 Ẽdẽcĩ Thaulo ethei ne, “Aniitia ngẽnẽ Makayyioit?” Ẽdẽcĩ Makayyioiti ethei ne, “Aneeta Yesu cĩ adĩmani niia buth wo.” 6 “Ĩthõng yoko, tĩnga bĩt õlõõ cĩ gaalawu, ĩthõng õkkõ katĩ eyelothici thõõth cĩ katĩ õkkõ thẽk adĩmani niia.”
7 Ĩthõng eeta cĩk balna ẽhẽrõn kĩ Thaulo, abĩlĩ balna natẽ tiv noko. Athĩrar nẽẽgẽ molook, ĩthõng thĩ, kẽnnẽ athii cĩ ijiowa et cĩ õthõõth ẽẽ, kũdũt. 8 Ma natẽ, ĩtĩnga Thaulo jiena, ĩthõng ma baa ngĩ apuuk nẽ kẽbẽrẽ cĩgĩnĩk ẽẽ, ruben kẽnnẽ. Ngaatĩ agamĩ eeta ĩnõõnõ athiit atĩwĩ õvõyyĩ õlõõ cĩ gaalawu ĩcĩ Damathkathĩ. 9 Ruben balna Thaulo wathinniok iyyio, kithii gii cĩ adak, kõdẽ awũd nẽ kũdũt tõ.
10 Aavĩ balna wobjiaiti ĩmma cĩ athĩ Anania cĩ abaak Damathkatha. Avvũ balna Makayyioiti Anania ngonothintia ethei ne, “Anania!” Ẽdẽcĩ kẽnnẽ Anania ethei ne, “Ee Makayyioit!”
11 Ngaatĩ ẽthẽcĩ Makayyioiti ĩnõõnõ ne, “Bĩt õlõõ cĩ et cĩ athĩ Yudath, gõõla ĩcĩ, Gõõl cĩ Mũrrĩ. Jina et cĩ athĩ Thaulo cĩ kõrõõk cĩ gaalawu cĩ Tarthuthi. Alayyie nẽ yoko. 12 Ĩthõng ngonothintia, acĩn balna Thaulo et cĩ athĩ Anania ngatĩ akuni, awumi kẽbẽrẽ cĩgĩnĩk athĩnẽy, ĩthõng ĩcĩnẽ nẽ naboo.”
13 Ẽdẽcĩ kẽnnẽ Anania ethei ne, “Makayyioit, ẽkẽbtaha eeta cĩk meelĩk õrrõt thoothonniok cĩk gerthek cĩk balna adĩmaneei eeti coo eet cuguk cĩk callĩk thinneti Yeruthalẽma. 14 Ĩthõng yoko aku nẽ ngato, nyatarka aanycĩk makayyiowa cĩk paadĩrnyawu ĩnõõnõ makathĩt, kikiyyia kagam eet cĩk alayyie thaarĩy ĩcugunik.”
15 Ĩthõng thĩ, balna ethei Makayyioiti Anania ne, “Bĩtõ! Ẽẽn eeti coo et cannĩ cĩ kẽbẽra na kiliman eet cĩk athii cĩ ẽẽn Yudei kĩ alaanẽt cĩgĩk kĩ eet cĩk Ĩthraĩlĩ thõõth cannĩ. 16 Aneeta katĩ cĩ keyeleei ĩnõõnõ gõõl cĩ thẽk ehecini nẽ, nyatarka thar cĩganĩk.”
17 Ngaatĩ õkkõ iithiowĩ Anania kõrõõk nĩcẽ. Ma natẽ, atadĩk athĩn cĩgĩnĩk Thaulo, ĩthõng ĩthĩ ne, “Gõtõna Thaulo, Makayyioit Yesu wũ balna alibaci aniitia gõõla ĩcĩ baa akuunie niia ngato wo, ĩnõõnõ cĩ itionana nẽ aneeta, kĩĩ katĩ cĩnẽ niia naboo, ĩthõng kĩĩ kĩbbĩt Ririwacĩ cĩ Dĩhĩmĩ aniitia.” 18 Ma tamanoko, okolliay kaala gwuak cĩk õgõõn kĩ kũrarõ kẽbẽrẽnĩy ĩcĩk Thaulo, ngaatĩ acĩnẽnĩ nẽ. Ma natẽ, ĩtĩnga nẽ jiena, ĩthõng agam batithimo. 19 Ma balna ngĩ adak nẽ dainit, ikiyyia ũbũna ẽlẽ cĩnnẽ.
Irion Thaulo Damathkatha
Ngaatĩ arũmẽẽnĩ Thaulo kĩ wobjiak Damathkatha wathinniok cĩk meelĩk. 20 Ma tamanoko, ẽtẽrẽhaĩ nẽ irion thõõth cĩ ẽnnẽ Yesu Ngẽrtĩ Nyekuco Ciithẽnẽy ĩcĩk Lawintiak. 21 Eeta vẽlẽk cĩk balna athĩrar thõõth cĩ Thaulo ẽẽ, ukulliek jien, ĩthõng ĩĩtõ ne, “Athii wõnõ cĩ ẽẽn et wũ balna adĩman eet wũk balna alayyie thaarĩy ĩcĩk Yesu Yeruthalẽma buth neccie? Athii yoko cĩ aku nẽ kikiyyia kagam ĩnõõgõ, ĩthõng anyĩk ĩnõõgõ makayyiok cĩk paadĩrnyawu, kĩĩ katĩ kẽcẽbtẽ kĩjana?” 22 Irion balna Thaulo tiirthẽta cobbi õrrõt katalmanyan Yudei cĩk aatĩ Damathkatha, nyatarka aduwaai dĩdĩ nẽ ĩnõõgõ ethei ne, ẽẽn Yesu Kiristo.
23 Ma balna ngĩ õõt wathinniowa cĩk meelĩk, ivitia othoothitõ Yudei thõõth cĩ arui ĩnõõnõ, 24 ĩthõng thĩ, aga balna nẽnnẽ Thaulo muwẽẽnĩt cĩnĩng ẽẽ. Waathĩn kĩ baalin, ẽbẽk balna nẽẽgẽ araanet cĩk obbitik cĩk kõrõõk cĩ gaalawu gõõla cĩ adiim arui Thaulo. 25 Ĩthõng thĩ, ivitia ootti wobjiaha cĩgĩnnẽk ĩnõõnõ baal aari dongowa, ĩthõng itiontĩk ĩnõõnõ loota bẽlẽtha ĩcĩ dilato.
Thaulo Yeruthalẽma
26 Ma balna ngĩ arawak Thaulo Yeruthalẽm, ikiyyia idiim ngĩ arũmẽ kĩ wobjiak. Ongollie balna kẽggẽ wobjiaha ĩnõõnõ athii cĩ ẽlẽmĩ ngatĩ ikiyyiaĩ nẽ ĩthĩ wobjiait cĩ ẽẽn dĩdĩ. 27 Ngaatĩ aku balna Barnabathĩ õkõyyĩ Thaulo kĩ tionniak. Ma natẽ, ũũk uduwak tionniak gõõl cĩ balna acĩnĩ Thaulo Makayyioit kĩ gõõl cĩ õthõõthĩcẽ Makayyioiti ĩnõõnõ. Aduwa balna Barnabathĩ buu gõõl cĩ balna õthõõthĩ Thaulo tiirion thaarĩy ĩcĩk Yesu, baa ngĩ aavĩ nẽ Damathkatha. 28 Aavutõ balna nẽnnẽ Thaulo kĩ tionniak Yeruthalẽma, ĩthõng õtõ nẽ uduwak eet vẽlẽk thõõth cĩ Makayyiokto tiirion. 29 Õthõõth nẽ, ĩthõng ẽpẽkantõy kĩ Yudei cĩk õthõõth thõõtha cĩ Girihi, ngaatĩ adiimi arui nẽẽgẽ ĩnõõnõ. 30 Ma balna ngĩ ivitia umuddia lemnyiowa thõõth coo, itionitõ nẽẽgẽ Thaulo kõdõlan kõrõõk cĩ gaalawu cĩ Cithariya. Ma natẽ, itiontĩk ĩnõõnõ kedeccek kũũk õlõõ ĩcĩ gaalawu ĩcĩ Tarthuthi. 31 Ivitia balna eeta cĩk kelethiawak aavutõ ganõna looca cĩ Yudea kĩ Galilea kĩ Thamaria, ĩthõng alaacõ Makayyioit. Ivitia ĩĩtõ tiirti nẽẽgẽ õrrõt, ĩthõng ẽẽl Ririwacĩ cĩ Dĩhĩmĩ ĩnõõgõ, anyi kĩtooryie kĩĩ mẽẽlĩ.
Anyĩk Pẽtũrũ Ainiath kĩ Dorkath kũbũnta
32 Õwõ balna Pẽtũrũ loociowẽy vẽlẽk, ikiyyia eheronothĩk eet cĩk callĩk cĩk balna aatĩ õlõõ cĩ gaalawu cĩ Liddia. 33 Ma natẽ, urumtõy nẽ kĩ et ĩmma cĩ athĩ Ainiath. Ẽẽn balna Ainiathĩ et cĩ alalaniay ẽlẽ, ĩthõng atangu lobela erkinya turgi athii woccia cĩ õwõ kũdũt. 34 Ma natẽ, ethek Pẽtũrũ ĩnõõnõ ne, “Ainiath, anyi Yesu Kiristo aniitia bũna. Tĩnga nyũm kwuen cunni.” Ma tamanoko, ĩtĩnga Ainiathĩ. 35 Ma balna ngĩ acĩn eeta vẽlẽk cĩk kõrõõk cĩ gaalawu cĩ Liddia kĩ cĩk kõrõõk cĩ gaalawu cĩ Tharonĩ thõõth coo wo, ivitia elemit Makayyioit.
36 Aavĩ balna wobjiaiti ĩmma cĩ ngayyi cĩ athĩ thar Tabitha õlõõ cĩ gaalawu ĩcĩ Joopa, athĩ balna thar õõgĩ cĩgĩnĩk Girihiyyiey Dorkath.a Adĩman balna nẽ thõõth cĩ abũnna ngatĩ ẽẽlĩ ngĩjũrra. 37 Ĩmmõrĩ balna nẽ, ĩthõng ikiyyia adaaha, ngaatĩ thĩ, balna aaranẽ eeta ẽlẽ cĩnnĩ, ĩthõng aryik ciitha tiddina. 38 Õjõõn balna kõrõõgĩ cĩ gaalawu cĩ Liddia kĩ Joopa, ma balna ngĩ athĩrar wobjiaha ngatĩ aavẽ Pẽtũrũ Liddia ẽẽ, itiontĩk ĩnõõnõ eet cĩk ẽẽn ramma kõõt kentek ne, “Ijjia baai tamanoko!”
39 Ngaatĩ irioĩ Pẽtũrũ kĩ ĩnõõgõ, ĩthõng ma balna ngĩ arawak nẽ, ootti eeta ĩnõõnõ ciitha tiddina. Ivitiak balna ngaay cĩk bõyyĩk Pẽtũrũ natẽ, ĩthõng utuluththik nẽẽgẽ ĩnõõnõ, ĩthõng eyelliek ĩnõõnõ ceremua cĩk balna adĩmana Dorkathĩ baa nga arũgĩ nẽ.
40 Uduwak Pẽtũrũ ĩnõõgõ vẽlẽk kõõt nõõnõ ngatĩvõrĩ, ngaatĩ akannĩ kuthungti, ĩthõng alawõy. Ma natẽ, ũtũwũ Pẽtũrũ ẽlẽ cĩnnĩ ĩcĩ tõõn cĩ aavẽ ngaa cĩ adaaĩ ẽẽ, ĩthõng ĩthĩ ne, “Tabitha, tĩnga jiena.” Ngaatĩ õõwĩ nẽ kẽbẽrẽ cĩgĩnĩk kĩĩ kĩcĩn Pẽtũrũ, ĩthõng aavu loota. 41 Agam Pẽtũrũ ĩnõõnõ athiit kĩtĩnga jiena. Ma balna natẽ, ũtũvvũwa Pẽtũrũ lemnyiok kĩ ngaay cĩk bõyyĩk, ĩthõng eyelek ĩnõõgõ ngatĩ ũrũgaĩ Dorkathĩ. 42 Athanothĩk balna nyemut coo Joopa tũrũr, ĩthõng ivitia elemit eeta cĩk meelĩk Makayyioit. 43 Ma natẽ aavu Pẽtũrũ Joopa wathinniok cĩk meelĩk õlõõ cĩ et ĩmma cĩ angĩny ruccie, cĩ athĩ thar Thimõnẽ.