Ĩdĩman Thaulo eet cĩk kelethiawak buth
8
Aavĩ balna Thaulo natẽ ẽlẽmĩ ruwẽẽnĩt cĩ Ithtivenĩ. Ma kõr nĩcẽ, ikiyyiak pĩrnanẽtĩ cobbi õrrõt lemnyiok cĩk kelethiawak Yeruthalẽma. Ngaatĩ athanothĩcẽ lemnyiowa vẽlẽk looc cĩ Yudea kĩ looc cĩ Thamaria, ĩthõng ũtũngtothĩk tionniaha Yeruthalẽma dõ. 2 Ma natẽ, ivitia adaacõ eeta cĩk ongollie Nyekuc ẽẽ, Ithtiven, ĩthõng utuluthõ ĩnõõnõ õrrõt. 3 Ngaatĩ ẽtẽrẽhanĩ Thaulo athaanĩ lemnyiok cĩk kelethiawak. Õkkõ ciithẽnẽy vẽlẽk agurra eet cĩk maacĩk kĩ ngaay, ĩthõng arĩk ĩnõõgõ kĩjana.Pilipo looca cĩ Thamaria
4 Athaantẽ balna lemnyiowa, õõt irionitõ Nyemut cĩ Abũnna vatĩkẽy ĩcĩk balna õvõyyĩ. 5 Õkkõ balna Pilipoa õlõõ ĩcĩ gaalawu ĩcĩ Thamaria, ĩthõng uduwak eet thõõth cĩ Kiristo natẽ. 6 Ma balna ngĩ athĩrar meelitini thõõth cĩ Pilipo, ĩthõng ĩcĩnĩt kaal cĩk anatti cĩk adĩman nẽ ẽẽ, ivitia ĩthĩraritõ nẽẽgẽ vẽlẽk jurrung thoothonniok cĩk aduwa nẽ. 7 Ũbũnta balna eeta cĩk meelĩk cĩk ayak ririwanĩn cĩk gerthek kĩ eet cĩk awuli kĩ eet cĩk ngõõltĩk vẽlẽk. Ẽẽkta balna ririwanĩna cĩk gerthek eletinẽy cĩk eetu, ĩthõng acalcala jiena. 8 Ngaatĩ atalnĩ eeta õlõõ cĩ gaalawu nĩĩcẽ õrrõt kũdũt, nyatarka thoothonniok cĩkkõ.
Thimõnẽ cĩ ẽẽn ngarĩ
9 Ma wathinniowẽy gwantĩk, aavĩ balna eeti ĩmma cĩ ẽẽn ngarĩ cĩ athĩ Thimõnẽ cĩ balna atubuan eet vẽlẽk ngarthẽtĩna cĩnnĩ õlõõ ĩcĩ gaalawu nĩĩcẽ, ĩthõng kĩ looc cĩ Thamaria vẽlẽk. Ẽngẽrẽn balna Thimõnẽ athĩ ne, ẽẽn nẽ et ĩmma cobbi õrrõt. 10 Ivitia ĩthĩhĩt nẽẽgẽ vẽlẽk ĩnõõnõ jurrung, ẽtẽrẽhanĩ eetĩnẽy ĩcĩk kĩdĩk kõdõlanit cĩk obbitik, ĩthõng ĩĩtõ ne, “Ẽẽn eeti coo tiirthẽt cĩ Nyekuco cĩ athĩ ne, Tiirthẽt Cobbi.” 11 Õwõb balna eeta Thimõnẽ, nyatarka ũnũũwĩk nẽ ngarĩthẽẽt cĩnnĩ ẽẽ, ngaatĩ atubuanini eeta. 12 Ĩthõng thĩ, balna ivitia elemit eeta Pilipo kĩcĩ irion nẽ Nyemut cĩ Abũnna cĩ kabicoc cĩ Nyekuco kĩ thar cĩk Yesu Kiristo ẽẽ, ivitia agamit nẽẽgẽ vẽlẽk batithimo eetĩnẽy cĩk maacĩk ngaanẽy noko. 13 Ma natẽ, ikiyyia ẽlẽm Thimõnẽ buu ngatĩ agamĩ batithimo. Ma natẽ, õwõb nẽ Pilipo gõõla cĩ õkõyyĩ, nyatarka kaal cĩk obbitik cĩk eyeliay kĩ thoothonniok cĩk anaat eeta wũk ĩcĩn nẽ.
14 Ma balna ngĩ ĩthĩraritõ tionniaha Yeruthalẽma ngatĩ ẽlẽmĩ eeta cĩk Thamaria thõõth cĩ Nyekuco ẽẽ, itiontĩk ĩnõõgõ Pẽtũrũ kĩ Yoanẽ. 15 Ma baa ngĩ arayyiak nẽẽgẽ ẽẽ, alayyiõĩ nẽẽgẽ lemnyiok cĩk Thamaria, kĩĩ katĩ kaanyĩwothĩk Ririwacĩ cĩ Dĩhĩmĩ ĩnõõgõ, 16 nyatarka balna nga kikiyyia Ririwacĩ cĩ Dĩhĩmĩ ĩcĩ eet cĩk Thamaria, ĩthõng agam balna nẽẽgẽ batithimo thaarĩy ĩcĩk Makayyioit Yesu dõ. 17 Ma natẽ, ataddik Pẽtũrũ kĩ Yoanẽ athĩn ootinẽy ĩcĩk lemnyiowu, ĩthõng umuddia lemnyiowa Ririwac cĩ Dĩhĩmĩ. 18 Ma baa ngĩ acĩn Thimõnẽ ngatĩ akuni Ririwacĩ cĩ Dĩhĩmĩ gõõla cĩ atadĩcẽ tionniaha athĩn ootinẽy ĩcĩk lemnyiowu ẽẽ, idiim nẽ ngĩ anyi ĩnõõgõ nyarobinya, 19 ĩthõng ĩthĩ nẽ ne, “Anycangũ da aneeta buu tiirthẽt coo, kĩĩ katĩ eeti cĩ kataadi na athĩn cĩganĩk, kaanyĩwothĩk woccia katĩ ĩnõõnõ Ririwacĩ cĩ Dĩhĩmĩ.”
20 Ẽdẽcĩ Pẽtũrũ ethei ne, “Agiiriay woccia katĩ niia kĩ nyarobinya cugunik wo thẽk, nyatarka ahadi niia athĩ ne, ũũta woccia anyinit cĩ Nyekuco nyarobinyay! 21 Athii woccia cĩ kõthõl naaga kĩ aniitia tiic coo, nyatarka athii cĩ mũrra thĩnĩn cunnie nguuma cĩ Nyekuco. 22 Duwa thoothonniok cugunik cĩk gerthek cĩk muwẽẽnĩt cunni ẽẽ, ĩthõng alawu Makayyioit, kĩĩ katĩ kẽnyẽẽĩ thõõth cĩ gerthe thĩnĩna cunni wo. 23 Nyatarka kacini na emedeeri niia tiic coo, ĩthõng ecebji gerthetini aniitia.”
24 Ngaatĩ athĩnnĩ Thimõnẽ ne, “Laang, lawowua baai thẽk kĩ Makayyioit, kĩĩ katĩ kithii thõõth cĩ aduwa niia ẽẽ, athii cĩ adahia aneeta gimma.”
25 Ma vurtia cĩ uduktiaĩ Pẽtũrũ kĩ Yoanẽ eet thõõth cĩ Makayyiokto, ĩthõng iriontĩk nẽẽgẽ eet Nyemut cĩ Abũnna korookjiowẽy cĩk meelĩk ĩcĩk Thamaria, ĩthõng imiiryie õõt Yeruthalẽma.
Pilipo kĩ Ithiopiac
26 Ethei balna anjĩlõ cĩ Makayyiokto Pilipo ne, “Lũũcẽ gõõla cĩ diinu, cĩ baath cĩ õdõõĩ ẽẽ, cĩ alũũcĩ õkkõ Yeruthalẽma kõdõlan Gatha.” 27 Ngaatĩ ĩngannĩ Pilipo õkõyyĩ, ĩthõng ma gõõla, urumtõy kĩ gaalinit cĩ Ithiopia cĩ balna aariay ẽlẽ.b Gaalinit balna cobbi neccie õrrõt cĩ agam nyarobinya cĩk Kandathĩ ngaa cĩ ẽẽn alaan cĩ Ithiopia. Õkkõ balna alayyie eeti coo Yeruthalẽma, 28 ĩthõng yoko õbõda ũũk ĩcĩ kõrõõk cĩnnĩ. Aavĩ balna nẽ loota giiwa cĩnnĩ ĩcĩ õgõõn kĩ toromilie cĩ agurut nyangõlẽnya, ĩthõng ẽbẽl Nyaraga cĩ Ĩthaiac wũ ẽẽn et cĩ õthõõth molook cĩ Nyekuco. 29 Ma natẽ, uduwak Ririwacĩ cĩ Dĩhĩmĩ Pilipo ethek ne, “Bĩt ĩthĩ õjõõn kĩ gii cĩ agurrie nĩcẽ.”
30 Ma natẽ, ivirothĩk Pilipo gii cĩ agurrie ẽẽ, ĩthõng ĩthĩrar et nĩcẽ ngatĩ ẽbẽlĩ Nyaraga cĩ Ĩthaia wũ ẽẽn et cĩ õthõõth molook cĩ Nyekuco. Ngaatĩ ajini Pilipo ĩnõõnõ ẽthẽcĩ ne, “Aga thẽk niia thõõth cĩ ebeli wo?”
31 Ẽdẽcĩ nẽ athĩ ne, “Kathihi thẽk naboo kuu? Kathĩrari woyyia thẽk nẽnnẽ mĩ kaavu eeti ĩmma cĩ aduwaccanĩ.” Ngaatĩ aduwacĩ nẽ Pilipo kikiyyia kũrũmtẽ kĩ ĩnõõnõ.
32 Ẽbẽl balna gaalinti coo ngatĩ eheeddi Nyaragawa ĩcĩ Nyekuco athĩ ne,
“Owobjie balna nẽ kĩ atheetĩ cĩ õkkõ otodongnyi thõng.
Ẽlẽmanni balna nẽ kĩ nyiond cĩ atheeto cĩ õdõõt tũwayyioiti.
Ĩthõng athii balna nẽ cĩ aduwa thõõth ĩmma.
33 Arannĩ balna eeta ĩnõõnõ lokika,
ĩthõng athii nẽẽgẽ cĩ eteedi ĩnõõnõ
thõõth gõõla ĩcĩ edeemothi.
Ayak woccia katĩ nẽ dõõlĩ kuu, nyatarka
agammiay rũgẽtĩ cĩnnẽ looca wo?”e
34 Ma natẽ, ijin eeti cĩ aariay ẽlẽ ẽẽ, Pilipo ethek ne, “Laang, duwaha da yoko ngẽnẽ cĩ õthõõth eeti cĩ õthõõth molook cĩ Nyekuco ẽẽ, ẽlẽ cĩnnĩ mĩn, kõdẽ et ĩmma cĩ rẽẽng?” 35 Ngaatĩ ẽtẽrẽhanĩ Pilipo aduwacĩ ĩnõõnõ tõõn cĩ Nyaraga cĩ Nyekuco, ĩthõng irionĩk ĩnõõnõ Nyemut cĩ Abũnna cĩ Yesu.
36 Ma baa ngĩ õwõ nẽẽgẽ gõõla, õõt umuddia ngĩtĩ aatẽ maama, ĩthõng ĩthĩ eeti cĩ aariay ẽlẽ ẽẽ, ne, “Cĩn da, maam õõgĩ cĩkkõ. Nyia athii woccia cĩ kagami batithimo wo?” 37 Ngaatĩ athĩnnĩ Pilipo ne, “Ma ngĩ elemi thĩnĩna cunni vẽlẽk, agami woccia thẽk.” Ma natẽ, ẽdẽc eeti cĩ aariay ẽlẽ ẽẽ, ĩthĩ ne, “Kelemi na ngatĩ ẽẽn Yesu Kiristo Ngẽrtĩ Nyekuco.” 38 Ma natẽ, uduwak nẽ gii cĩ agurrie ẽẽ, kĩbĩl. Ngaatĩ aluucianẽ Pilipo õkõyyĩ maamĩy kĩ et cĩ aariay ẽlẽ ẽẽ, ĩthõng ikiyyia agameek Pilipo ĩnõõnõ batithimo.
39 Ma balna ngĩ ẽtẽẽkta nẽẽgẽ maamĩy ngatĩvõrĩ, ũũwĩ Ririwacĩ cĩ Makayyiokto Pilipo nginiwa ĩmmanĩ, ĩthõng ĩnĩnga balna acĩn eeti cĩ aariay ẽlẽ ẽẽ, ĩnõõnõ naboo, ĩthõng thĩ, nẽnnẽ balna, ẽbẽlbẽl eeti cĩ aariay ẽlẽ õrrõt ngaatĩ õkõyyĩ gõõla cĩnnĩ. 40 Ikiyyia balna edenyiay Pilipo vurtia õlõõ ĩcĩ gaalawu cĩ Athotuthi, ĩthõng õwõ balna nẽ korookjiowẽy ĩcĩk gaalawu vẽlẽk, ĩĩthõng kõdõlan kõrõõk cĩ gaalawu cĩ Cithariya, irioni eet Nyemut cĩ Abũnna dõõkĩthĩ.