Thõõth cĩ aduwa Ithtivenĩ lokika
7
Ajin balna paadĩrĩ cobbi Ithtiven ethei ne, “Ẽẽn thoothonniowa cĩk abilni eeta cĩkkõ aniitia wo dĩdĩ?”2 Ma natẽ, ẽdẽc Ithtiven ethek ne, “Gõtõõnõga kĩ õõ baangĩ, ĩthĩktangũ da aneeta! Ilibak balna Nyekuci cĩnac cĩ bulẽnto baangiet cĩnac Abraham balna ngaanĩ aavĩ nẽ looca cĩ Methopotamia baa ngaanĩ kuluuk kũũk õlõõ cĩ gaalawu cĩ Haranĩ. 3 Ethei balna Nyekuci ĩnõõnõ ne, ‘Tũngek looc cunni kĩ eet cugunik kĩ tionniok cugunik vẽlẽk, ĩthõng uuwu looca ĩcĩ katĩ kõkkõ keyeleci na aniitia.’a
4 “Ngaatĩ ũũngnĩcẽ Abrahamĩ looc cĩ eet cĩk Kaldea, ĩthõng ũũk abaak Harana. Ma vurtia cĩ daaĩth cĩ baatĩnnĩ, ikiyyia itiona Nyekuci ĩnõõnõ kikiyyia kaavu looca cĩ yoko attiyyu niigia wo. 5 Athii balna cĩ anyi Nyekuci ĩnõõnõ ngini ĩmma ngato, kõdẽ nẽnnẽ ngĩtĩ ẽlẽnõy kĩ thooc kaganoko. Ĩthõng thĩ, balna abũtaneei Nyekuci ĩnõõnõ kĩ dõõlĩ cĩk dõõlĩ cĩgĩnĩk vurtia, cĩk katĩ avvu kayahit looc coo, kõdẽ woyyia itin nĩcẽ nga kothii doolec cĩ Abrahamĩ. 6 Thõõth cĩ balna aduwaai Nyekuci Abraham coo, ‘Avvu katĩ abaak doolia cugunniek looca cĩ rẽẽng pir. Adĩman katĩ eeta cĩk looc nĩcẽ ĩnõõgõ buth, ĩthõng aritõ kĩĩtõ nyakapanak erkinya eet etĩmma (400). 7 Ĩthõng thĩ, kõkkõ katĩ kuuki na eet cĩk looc cĩ anyi ĩnõõgõ kĩĩtõ nyakapanak ẽẽ. Ĩthõng vurtia cĩnnĩ, aluuga katĩ nẽẽgẽ looca cĩ rẽẽng ẽẽ, kivitia kalayyia aneeta ngato.’b 8 Ngaatĩ thĩ, balna anyĩcẽ Nyekuci Abraham ngẽrẽmngẽrẽm cĩ abũũranĩ ẽlẽ cĩ doolec cĩ maacĩ.c Ma natẽ, ikiyyia itirria nẽ Aĩthak, ĩthõng ũbũũran balna nẽ ẽlẽ cĩ Aĩthaĩ, balna ngĩ ayak Aĩthaĩ wathinniok turgi. Ma vurtia, ikiyyia itirria Aĩthaĩ Yokob, ĩthõng ikiyyia Yokobĩ ĩthĩ baatĩ lõgõõ cĩk maacĩk õmmõtõ kĩ ramma cĩk kivitia kĩĩtõ õõ baajigi baangietĩ cĩgaac.
9 “Nyatarka balna avvu alĩlĩwei doolia cĩk Yokobĩ ẽẽ, gõtõnĩ cĩnĩng Yothẽbõ,d ĩthõng ivitia utuyyiõĩ ĩnõõnõ kĩĩ nyakapanait Ijiba. Ĩthõng thĩ, balna aavĩ Nyekuci kĩ ĩnõõnõ, 10 ĩthõng ẽẽla pĩrnanta cĩnnĩ vẽlẽk. Ma natẽ, aanyĩk Nyekuci Yothẽbõ gẽẽnyĩth, ĩthõng ẽlẽmaaĩ ĩnõõnõ kijiowa thõõth cĩ abũnna ĩcĩ alaan cĩ Ijibi,e ĩthõng aanyĩk ĩnõõnõ kĩĩ makayyioit Ijiba kĩ õlõõtõtõ cĩ alaano vẽlẽk.
11 “Ma balna natẽ, ĩĩ maka butuny õrrõt looca ĩcĩ Ijibi kĩ Kanana. Aavĩ baa pĩrnanẽtĩ cobbi, ĩthõng ĩnĩnga õõ baajigi baajigietĩ cĩgaac cĩ amũda woccia dainit kũdũt. 12 Ma balna ngĩ athĩrar Yokobĩ ngatĩ aatẽ labĩna Ijiba ẽẽ, ition õõ baajigi baangiet cĩgaac kõõt kutuyyia, ĩthõng balna ẽẽn itin cĩ owu cĩ õvõyyĩ nẽẽgẽ ẽẽ, neccie. 13 Ma wueet cĩ ẽẽn ramma cĩ balna õvõyyĩ nẽẽgẽ Ijiba, uduwak Yothẽbõ gõtõõnõgĩ ẽlẽ cĩnnĩ, ngaatĩ aku agawĩ alaanĩ eet cĩk kõrõõk cĩ Yothẽbõ. 14 Ĩthõng ikiyyia itionĩk Yothẽbõ baatĩnnĩ Yokob kĩ eet cĩk kõrõõk cĩnnĩ nyemut kivitia. Ẽẽn balna eeta cĩk kõrõõk cĩnnĩ vẽlẽk eet iyyio kõmmõtõ kĩ tur. 15 Ngaatĩ õkõyyĩ Yokobĩ Ijiba nginiwa wũ balna adaaknĩ nẽẽgẽ kĩ õõ baajigi baangietĩ cĩgaac. 16 Ayahiay balna eleeti cĩgĩk kivitia kadayyie Thẽkẽma loowa wũ balna ũũta Abrahamĩ kĩ lõgõõ cĩk Hamõrĩ nyarobinyay.
17 “Kĩ baa ngĩ õbõwẽ itini cĩ adĩmanĩ Nyekuci thoothonniok wũk balna abũtaneei nẽ Abraham, ivitia ĩtooryie eeta cĩgaac Ijiba kĩĩtõ mẽẽlĩ õrrõt. 18 Ma natẽ, ikiyyia agam alaanĩ ĩmma Ijib. Ĩthõng balna athii alaanĩ neccie cĩ aga tiic cĩ balna atican Yothẽbõ. 19 Ĩgõõl balna alaanĩ coo õõ baajigi baajigietĩ cĩgaac ngatĩ adĩmanĩ ĩnõõgõ buth, ĩthõng ĩtĩnganeek ĩnõõgõ kutduktek dõõlĩ cĩgĩk cĩk kĩdĩk cĩk ngaanĩ arittiay thõng tuu kĩĩ kadaaitõ.
20 “Arittiay balna kẽnnẽ Mutha itin nĩcẽ, ĩthõng ẽẽn balna nẽ doolec cĩ abũnna gimmanoko, ngaatĩ arĩcananĩ baatĩnnẽ kĩ yaatĩnnĩ ĩnõõnõ ciiatõ cĩnĩng nyĩĩlõwẽ iyyio. 21 Ma balna ngĩ ũtũngtek baatĩnnẽ kĩ yaatĩnnĩ Mutha ngatĩvõrĩ, ikiyyia ũũwĩ bũwẽnyĩ alaano ĩnõõnõ, ĩthõng ũũk itilinga kĩĩ ngẽrĩnĩ cĩnnĩ. 22 Alimanothi balna Mutha gẽẽnyĩthĩ cĩ eet vẽlẽk cĩk Ijibi. Ẽẽn balna nẽ et cĩ tiiri tiica kĩ thõõtha.
23 “Ma balna ngĩ ayak Mutha erkinya eet ramma, ikiyyia eheronothĩk nẽ eet cĩgĩnĩk cĩk Ĩthraĩlĩ. 24 Ĩthõng ĩcĩn kẽnnẽ nẽ, et cĩ Ijibi ngatĩ adĩmanĩ et cĩ Ĩthraĩlĩ buth. Ngaatĩ ẽẽlanẽ nẽ gõõnĩ, ĩthõng uruk Ijibenit kadaak. 25 Ahad kẽnnẽ balna Mutha athĩ ne, agaacõ yoko eeta cĩgĩnnẽk vẽlẽk ngatĩ aari Nyekuci ĩnõõnõ kẽẽl Ĩthraĩl, monogo nẽnnẽ ngaanĩ nẽẽgẽ kagaacõ. 26 Ma ngerethietĩn cĩnnĩ, ĩcĩn Mutha eet ramma cĩk Ĩthraĩlĩ ngĩ uukõy. Ngaatĩ atamtammanĩ gõõl cĩ aganĩthĩ ĩnõõgõ, ngatĩ ẽthẽcĩ ne, ‘Lõgõth, eeginnu niigia vẽlẽk eet cĩk Ĩthraĩlĩ. Adiim woccia oyowonu nyaguana nyia?’
27 “Ĩthõng kẽnnẽ eeti wũ balna ẽtẽrẽhanĩ jore ĩyõt Mutha kũũk kabanyca kĩĩ kijin kennek ne, ‘Ngẽnẽ cĩ aarici aniitia ĩthĩ gaalinit cĩnang? 28 Adiimi niia ngĩ arukca aneeta kĩ bõlõwath ngĩ arui Ijibenit?’f 29 Ngaatĩ balna athĩknĩ Mutha thõõth coo wo, ivir ũũk Midiana ngatĩ õkõyyĩ aavẽ nẽ ẽnnẽ et cĩ looc cĩ rẽẽng, ĩthõng ayak lõgõõ cĩk ẽẽn ramma.
30 “Ma balna ngĩ edecciay erkinya cĩk ẽẽn eet ramma, ilibak anjĩlõ Mutha guyyia cĩ õgõõn kĩcĩ atũũthĩ bõõnõ baatha ĩcĩ õdõõĩ kak cĩ õjõõn kĩ Thiir cĩ Thĩnaĩ.g 31 Atubuan balna Mutha gii cĩ acĩn nẽ ẽẽ õrrõt. Ma balna ngĩ ũũk nẽ ĩvĩjawothĩk kĩcĩn joonui, athĩrar kẽnnẽ molook cĩ Makayyiokto ngatĩ ẽthẽcĩ ne, 32 ‘Keeni na Nyekuc cĩ õõ baaba, Nyekuc cĩ Abrahamĩ, Nyekuc cĩ Aĩthaĩ kĩ Nyekuc cĩ Yokobĩ.’h Ikiyyia abarrit Mutha õrrõt ngaatĩ abũrnĩ ngatĩ acĩnĩ bõõnõ nĩcẽ.
33 “Ma natẽ, ethek Makayyioiti ĩnõõnõ ne, ‘Ara caava cugunik. Ẽẽn ngĩtĩ abĩlnẽ niia wo, ngĩtĩ angiranni. 34 Kĩcĩna balna na kir pĩrnanẽt cĩ eet cĩganĩk Ijiba. Kĩthĩrara ulua cĩnĩng, ĩthõng yoko kikiyyia na loota, kĩĩ kõõga ĩnõõgõ. Ijjia yoko kitioni na aniitia miirie bĩt Ijiba.’i
35 “Mutha wũ balna abũrĩ eeta coo, wũ baa ethei nẽẽgẽ ĩnõõnõ ne, ‘Ngẽnẽ cĩ anyi aniitia makathĩt cĩ ẽngẽrẽ thõõth cĩnang wo?’j Ĩthõng ition balna Nyekuci Mutha kĩĩ makayyioit cĩnĩng kĩ ellioit cĩnĩng, aduwaai balna anjĩlõ ĩnõõnõ thõõth coo bõõnatõ 36 Ngaatĩ õõganẽ nẽ ĩnõõgõ Ijiba ngatĩ adĩmanĩ kaal cĩk anatti kĩ yelintiok Ijiba kĩ Bũlũca cĩ Merihi erkinyiay ĩcĩk ẽẽn eet ramma baatha cĩ õdõõĩ kak.
37 “Mutha cĩ aduwaai eet cĩk Ĩthraĩlĩ ethei ne, ‘Itionacung katĩ Nyekuci agiitia et cĩ õthõõth molook cĩ Nyekuco cĩ õgõõn kĩ na eetĩnẽy cuguk.’kl 38 Ngaatĩ ayahanĩ Mutha eet cĩgaac ngatĩ ẽẽn baath cĩ õdõõĩ kak, ĩthõng othoothĩk anjĩlõ ĩnõõnõ kĩ õõ baajigiet cĩgaac Thiira cĩ Thĩnaĩ. Ma natẽ, anyĩwothĩk thĩ ĩnõõnõ thõõth cĩ rũgẽtõ, kĩĩ kikiyyia kaanyet nẽ ageeta.
39 “Ĩthõng thĩ, kẽnnẽ balna abũrĩ õõ baajigi baangietĩ cĩgaac ngatĩ athĩknĩ Mutha, ĩthõng idiimitõ imiiryie õõt Ijiba. 40 Ma natẽ, uduktiak nẽẽgẽ Aarõnm entek ne, ‘Dĩmanahet kaal cĩk aar eeta kĩĩtõ nyekucnya keyelliehet ageeta gõõl cĩ kovvoyyia. Ayahahet balna Mutha ageeta Ijiba, ĩthõng thĩ, yoko erekcet gii cĩ adak ĩnõõnõ!’n 41 Ngaatĩ ẽngẽnycanĩ gimma cĩ õgõõn kĩ mooleta. Ma natẽ, apaktek kaal cĩk cavawu moolet cĩ õgõõn kĩ nyekuci ẽẽ, ĩthõng atalit õrrõt, nyatarka tiic cĩ athĩn cĩgĩk. 42 Ĩthõng thĩ, balna ũtũbũr Nyekuci ĩnõõgõ, ĩthõng aanyĩk ĩnõõgõ kalaacõ mũnyũny cĩk tammutiddin kĩ balna ngĩ aduwa Nyaraga cĩ Nyekuco cĩ balna ẽhẽẽd eeta cĩk õthõõth molook cĩ Nyekuco athĩ ne,
“ ‘Niigia eeta cĩk Ĩthraĩlĩ,
acuwanecangũ da niigia aneeta kaal cĩk cavawu,
ĩthõng anycangũ aneeta anyinit, erkinyiay
wũk balna ẽẽn eet ramma wũk balna attiyyu baatha?
43 Athii tõ, õdõnganu kẽnnẽ balna tuggu cĩ alawu nyekuc
cunung Molek kĩ mũnyũnyõc cĩ nyekuc cunung Revan.
Ẽngẽnycanu balna niigia kaal cĩkkõ
kĩĩtõ nyekucnya cuguk, ĩthõng alayyu ĩnõõgõ.
Ĩthõng thĩna, yoko kitionicung katĩ na
õõt looca ĩcĩ rẽẽng ĩcĩ rẽẽnĩ kĩ Babilonia.’op
44 “Ẽngẽnyẽt balna õõ baajigi baajigietĩ cĩgaac Ciith cĩ Nyekuco baatha ĩcĩ õdõõĩ kak,q wũ balna aduwaai Nyekuci Mutha kĩdĩmana kuduktõy kĩ cĩ balna eyeleei Nyekuci ĩnõõnõ thõng. 45 Ma balna vurtia cĩ agamtĩ õõ baajigi baajigietĩ cĩgaac kĩ Jothua,r looc cĩ eet cĩk loociok, wũk itingkawek Nyekuci eet nĩĩkẽ ngatĩvõrĩ, ĩthõng thĩ, ayaktak nẽẽgẽ Ciith cĩ Nyekuco looc cĩnac. Ĩthõng aavu Ciith cĩ Nyekuco coo kuumuc kõdõlanit wathinniowa cĩk Davide. 46 Atalneei balna Nyekuci Davide õrrõt, ngaatĩ ajini Davide ĩnõõnõ, kĩĩ katĩ kẽtẽngẽny woccia nẽ Ciith cĩ Nyekuc cĩ Yokobĩ. 47 Ĩthõng thĩ, kẽnnẽ balna Thõlõmõnẽ cĩ aku engenyceei Nyekuc Ciith cĩnnĩ Yeruthalẽma.
48 “Ĩthõng thĩ, athii Nyekuci cĩ Ijiar vẽlẽk cĩ abaak ciithẽnẽy ĩcĩk ẽngẽnyẽt eeta. Kĩ balna ngĩ aduwa eeti cĩ õthõõth molook cĩ Nyekuco athĩ ne,
49 “Athĩ Makayyioiti ne, ‘Ẽẽn tammutiddin taaba cannĩ,
ĩthõng ĩthĩ lõõcĩ ngĩtĩ karĩccẽ na thoo.
Ciith kẽnnẽ cĩ õgõõn kuu
cĩ engenycecangũ katĩ niigia aneeta wo?
Kõdẽ ngĩtdang kẽnnẽ katĩ cĩ kayuwuthie nana?
50 Nga da balna thẽk na kẽtẽngẽnya kaal vẽlẽk?’s
51 “Niigia eeta cĩk adĩĩtĩ ooti cuguk pĩd wo! Uukonu niigia dõõkĩthĩ kĩ Ririwac cĩ Dĩhĩmĩ kĩ balna ngĩ adĩman õõ baajigi baajiknu. 52 Aavĩ wõnõ balna eeti cĩ õthõõth molook cĩ Nyekuco ĩmma cĩ nga kĩdĩmanit õõ baajigi baajiknu buth? Uruit nẽẽgẽ eet cĩk õthõõth molook cĩ Nyekuco wũk balna aduwa thõõth cĩ akuni katĩ Eeti cĩ edeemi thoothonniok. Ĩthõng yoko ovolongtu niigia ĩnõõnõ, ngaatĩ aruwu. 53 Agiitia balna cĩk anyĩwothicung Ngiranĩ cĩ Nyekuco wũ balna ayaha anjĩlẽta, ĩthõng thĩ, kẽnnẽ athii cĩ athĩraryu kũdũt.”
Õvõcẽ Ithtivenĩ bĩĩyẽnĩy kadaak
54 Ma balna ngĩ athĩrar makayyiowa cĩk lokikak thõõth coo wo, avaracitõ kadait nyĩgĩt. 55 Ĩthõng thĩ, kẽnnẽ Ithtivenĩ cĩ abbĩththĩ Ririwacĩ cĩ Dĩhĩmĩ ĩnõõnõ wo, ĩcĩn tammutiddin, ĩthõng ĩcĩn bulẽnĩt cĩ Nyekuco, ĩthõng ĩcĩn Yesu abĩlĩ attia cĩ athiot ĩcĩ Nyekuco. 56 Ngaatĩ athĩnnĩ Ithtivenĩ ne, “Ĩcĩnĩt nõõnõ, kacini na oyyi tammutiddin, ĩthõng abĩlĩ Ngẽrtĩ Eetou attia cĩ athio ĩcĩ Nyekuco.”
57 Ma baa ngĩ athĩrar nẽẽgẽ thõõth coo wo, acalcallit kũmũtĩt kĩĩna. Ma natẽ, ilibtothĩk nẽẽgẽ vẽlẽk Ithtiven, 58 ngaatĩ agurrecĩ ĩnõõnõ kõrõõk cĩ gaalawu cobbi ngatĩvõrĩ, ĩthõng ẽtẽrẽktaĩ uturit ĩnõõnõ bĩĩyẽnĩy nĩĩco noko. Aari balna eeta cĩk õvõlõngĩ ĩnõõnõ ẽẽ, ceremua cĩgĩk thoonĩy ĩcĩk et ĩmma cĩ ẽẽn ngĩthorowoc cĩ athĩ thar Thaulo.v