Eberyiay eeta tũrgẽrẽm cĩk ẽẽn makayyiok
6
Ma wathinniok nĩĩkẽ ĩtooryie balna wobjiaha ĩĩtõ mẽẽlĩ, ẽpẽkantõy lemnyiowa cĩk ẽẽn Yudei cĩk õthõõth Girihiyyiey kĩ lemnyiok cĩk ẽẽn Yudei cĩk õthõõth Hebureyyiey. Ẽpẽkanõy balna nẽẽgẽ, nyatarka athii cĩ anyĩwothi ngaay cĩk bõyyĩk cĩk õthõõth Girihiyyiey dainti kõr cĩ engerini dainti wathinniowẽy vẽlẽk. 2 Ma natẽ, utuvvuyyia balna tionniaha cĩk ẽẽn õmmõtõ kĩ ramma ẽẽ, wobjiak vẽlẽk ngatĩ odoi, ĩthõng entek ne, “Athii katĩ cĩ abũnna ĩcĩnang ngatĩ kũũngnĩca tiic cĩ thõõth cĩ Nyekuco, kĩĩ katĩ kaavuttia lõbẽlẽtẽy kengeryia dainit. 3 Gõtõõnõga, eberyia eet tũrgẽrẽm kõrgẽna cunung cĩk ongollie eeta, ĩthõng agayyi ngatĩ ayahĩ gẽẽnyĩth kĩ ngatĩ aavẽ Ririwacĩ cĩ Nyekuco kĩ ĩnõõgõ. Kaanycĩk katĩ ĩnõõgõ kagamit tiic coo. 4 Ĩthõng avuthita ĩcĩnang vẽlẽk ĩĩ itini cĩnang kir cĩ karĩcanania thõõth cĩ lawintio kĩ liman cĩ Nyekuco.”5 Anyi balna thõõth coo eet vẽlẽk kebelbelit õrrõt, ngaatĩ ẽbẽranĩ nẽẽgẽ et ĩmma cĩ athĩ Ithtiven. Ayak balna Ithtivenĩ leminit cobbi õrrõt, ĩthõng balna aavĩ Ririwacĩ cĩ Dĩhĩmĩ ĩcĩnnĩ. Ma natẽ, eberyia nẽẽgẽ oo, Pilipo kĩ Porokoroth kĩ Nikanor kĩ Timon kĩ Parmenath kĩ Nikolath cĩ aku õlõõ cĩ gaalawu cĩ Antioi cĩ balna kikiyyia kẽlẽm gõõl cĩ alawini Yudei. 6 Ma balna natẽ, ayaktak nẽẽgẽ eet cĩkkõ tionniak kivitia kataddik athĩn cĩgĩk ĩnõõgõ, ĩthõng alayyiõy.
7 Ngaatĩ thĩ, balna athanothi thõõth cĩ Nyekuco Yeruthalẽm. Ĩtooryie balna wobjiaha ĩĩtõ mẽẽlĩ, ĩthõng ivitia elemit paadĩrnya cĩk meelĩk Makayyioit Yesu.
Agamẽ Ithtivenĩ
8 Anyi balna Nyekuci Ithtiven bũnnathĩt kĩ tiirthẽt cĩ adĩmanĩ kaal cĩk anatti kĩ thoothonniok cĩk yelintiok cĩk eetu. 9 Ĩthõng balna eeta gwuak cĩk Ciith cĩ Lawintioa cĩk balna avvẽ athĩ ne, “Eet cĩk ooktiay nyakapanthẽtĩna,” ĩthõng ẽtẽrẽktaĩ balna nẽẽgẽ ẽpẽkantõy kĩ Ithtiven. Ẽẽn balna Yudei cĩkkõ cĩk avvu korookjiowẽy ĩcĩk gaalawu cĩk Cirene kĩ Alẽkthanderia kĩ looca cĩ Cilithia kĩ Athia. 10 Ĩthõng thĩ, balna athii cĩ ũũlĩ nẽẽgẽ ngatĩ abĩlnõnĩ kĩ Ithtiven wũ balna õthõõth gẽẽnyĩtha ĩcĩ Ririwac cĩ Dĩhĩmĩ.
11 Ma natẽ, ũnũmnũmmanit nẽẽgẽ eet õõgĩ kivitia kĩĩtõ ne, “Kathĩkna balna naaga Ithtiven aduwa thõõth cĩ gerthe cĩ adaacĩ Mutha kĩ Nyekuc.”
12 Ngaatĩ avvu alabẽcĩ nẽẽgẽ eet kĩ eet cĩk obbitik kĩ limanniok cĩk Ngiran cĩ Mutha, kĩdĩmanit thõõth cĩ gerthe. Ma natẽ, agamit nẽẽgẽ ĩnõõnõ ayait ootti lokika. 13 Ma natẽ, ayaktak eet õõgĩ cĩk balna ẽlẽmĩ ngatĩ õvõlõngĩ Ithtiven kivitia kĩĩtõ ne, “Cĩ gõõ aduwa eeti coo dõõkĩthĩ thoothonniok cĩk gerthek cĩk adaacĩ Ciith cĩ Nyekuco, kĩ Ngiran cĩ Mutha. 14 Kathĩkna balna naaga ĩnõõnõ ngatĩ athĩnnĩ ne, aku katĩ Yesu cĩ Natharẽtĩ kikiyyia kathaan ngittio, ĩthõng ũtũwũ vowothnya wũk balna anyet ageeta Mutha.”
15 Ngaatĩ akannĩ meelitini cĩ balna aatĩ lokika Ithtiven kẽbẽrẽ, ĩthõng ĩcĩnĩt ngatĩ aduwõnĩ nguum cĩnnẽ kĩ nguum cĩ anjĩlõ.