Iyiainit cĩ owovothi buweeci cĩk ẽẽn õmmõtõ
25
“Kõr katĩ nĩcẽ, aku katĩ kabicocĩ cĩ tammutiddino õgõõn katĩ kĩ buweeci cĩk ẽẽn õmmõtõ cĩk õvõyyĩ kaal cĩk katũkũlẽnĩ cĩk ngoorocak, kõõt kereyyia nyẽtẽranit cĩ maacĩ tihẽnta. 2 Agiithi balna buweeci cĩk ẽẽn tur, ĩthõng egeenyitõ cĩk ẽẽn tur. 3 Ma natẽ, ayak kẽnnẽ buweeci cĩk agiithi wo kaal cĩk tũkũlẽntak dõ, ĩthõng athii cĩ õyõwõt ngooroc ĩmma. 4 Ĩthõng ayait buweeci cĩk ẽgẽẽnyĩ wo ngooroc karjajĩtẽy kĩ kaal cĩk katũkũlẽnĩ cĩgĩk. 5 Athii balna cĩ akuni nyẽtẽranti cĩ maacĩ wo, tamanoko, ngaatĩ adũngnĩ buweeci neekie vẽlẽk, ĩthõng ataguuthõ loota.6 “Ma balna ngĩĩ baalin tobbi, ikiyyia ẽgẽrẽny eeti ĩmma ĩthĩ ne, ‘Ikiyyia nyẽtẽranti! Ivitia urumtõy kĩ ĩnõõnõ!’
7 “Ngaatĩ ĩngannĩ buweeci neekie vẽlẽk, ĩthõng ĩdĩmantek kaal cĩgĩk cĩk tũkũlẽntak vẽlẽk. 8 Ennei balna buweeci cĩk agiithi ẽẽ, gõõnõgĩ cĩk ẽgẽẽnyĩ ẽẽ, ne, ‘Anycetu ngooroc ĩmma karyiha naaga buu kaalĩy ĩcĩgak ĩcĩk tũkũlẽntak wo.’
9 “Ẽdẽcĩ buweeci cĩk ẽgẽẽnyĩ ẽẽ, gõõnõgĩ cĩk agiithi ethei ne, ‘Athii woccia cĩ awũpannet ngooroc ageeta vẽlẽk, õõt utuyyia ĩmma eetĩnẽy ĩcĩk ũũtẽnẽ.’
10 “Ma balna ngaanĩ õvvõ nẽẽgẽ ũũta ngooroc, iliba nyẽtẽranti cĩ maacĩ ẽẽ. Ngaatĩ irioĩ nẽ kĩ buweeci wũk balna ĩdĩmantothĩk õõt peyiana, ĩthõng ũnyũktẽ katũgẽta.
11 “Ma balna ngĩ oboddia buweeci wũk agiithi wo ngatĩ peyiano, ũtũvvẽcõ nyẽtẽranit cĩ maacĩ wo entek ne, ‘Makayyioit! Owehet ageeta katũk!’
12 “Ẽdẽcĩ balna nẽ ĩnõõgõ ethei ne, ‘Kaduwacung na dĩdĩ, athii na cĩ kagawung agiitia.’
13 “Ĩthõng thĩna, aavut vĩrĩngĩng, nyatarka athii niigia cĩ agawu kõr, kõdẽ itin cĩ katĩ adĩmanini thõõtha.
Iyiainit cĩ owovothi ticcianniok cĩk ẽẽn iyyio
(Bẽl Luka 19:11-27)
14 “Ĩthõng naboo, aavĩ kabicocĩ cĩ tammutiddino kĩ eeti cĩ ẽhẽrõnĩ, cĩ balna avvũ ticcianniok cĩgĩnĩk, ĩthõng ũtũngẽẽĩ ĩnõõgõ ijjio cĩgĩnĩk kuthutti. 15 Anyi balna nẽ ticciannioit ĩmma locibironya tur cĩk daabak,a ĩthõng anyĩk ĩmma locibironya ramma, ĩthõng anyĩk ĩmma naboo locibiro codoi cĩ daabo. Engereek nẽ ĩnõõgõ kĩ tiicanẽ cĩk woccia ũũlĩ nẽẽgẽ. Ngaatĩ õkõyyĩ nẽ hẽẽrõna cĩnnĩ. 16 Ĩthõng thĩ, ikiyyia ticciannioiti wũ balna agam locibironya cĩk daabak cĩk ẽẽn tur, iticanõĩ kĩĩ kũmũda locibironya õõgĩ tur naboo. 17 Ĩthõng ticciannioiti wũ balna agam locibironya cĩk daabak cĩk ẽẽn ramma buu, ikiyyia iticanõĩ, ĩthõng ijiowa locibironya õõgĩ cĩk ẽẽn ramma naboo. 18 Ĩthõng thĩ, ticciannioiti wũ balna agam dongok codoi doo cĩ daabo, ũũk ada look, ĩthõng uluguny dongok cĩ daab cĩ makayyioit cĩnnĩ ẽẽ, natẽ.
19 “Ma balna vurtia, ikiyyia õbõda makayyioiti cĩ ticcianniowu ẽẽ, ĩthõng ijin ĩnõõgõ gõõl cĩ balna adĩmanĩ nẽẽgẽ nyarobinya cĩgĩnĩk ẽẽ. 20 Ma balna ikiyyia uduwak ticciannioiti wũ balna agam locibironya tur baatĩ olu ethek ne, ‘Makayyioit, anya balna niia aneeta locibironya tur cĩk daabak, kikiyyia yoko na kũmũda cĩk ẽẽn tur naboo.’
21 “Ẽdẽcĩ makayyioiti cĩnnẽ ethei ne, ‘Abũnna õrrõt, eeni niia ticciannioit cĩ abũnna cĩ athihi thõõth! Ĩdĩmanu jurrung ngatĩ aticananẽ nyarobinya cĩk kĩdĩk kĩĩtõ mẽẽlĩ, ĩthõng yoko, kaanyi katĩ na aniitia makathĩt cĩ agamẽ kaal cĩk meelĩk. Ijjia kotholit kĩ aneeta talinit cannĩ.’
22 “Ma natẽ, ikiyyia ticciannioiti wũ balna anyi makayyioiti locibironya ramma cĩk daabak, ĩthõng ethek makayyioit cĩnnĩ ne, ‘Makayyioit, anya balna niia aneeta locibironya ramma cĩk daabak, ĩthõng yoko, kũmũda na ramma naboo.’
23 “Ẽdẽcĩ makayyioiti naboo ethei ne, ‘Abũnna õrrõt, eeni niia buu ticciannioit cĩ abũnna cĩ athihi thõõth! Aticaninie balna niia nyarobinya cĩk kĩdĩk kaganoko kivitia kĩĩtõ mẽẽlĩ, ĩthõng yoko, kaanyi katĩ na aniitia makathĩt cĩ agamẽ kaal cĩk meelĩk. Ijjia kotholit kĩ aneeta talinit cannĩ!’
24 “Ĩthõng eeti wũ balna anyĩwothi locibiro codoi cĩ daabo, ikiyyia ĩthĩ ne, ‘Makayyioit, kagga na eeni niia et cĩ okomi õrrõt, cĩ ẽtẽda labĩ ngatĩ nga evvek niia kinyomo, ĩthõng ũlũta labĩ ngatĩ nga thacẽk niia kinyomo. 25 Kõtõngõlẽ thĩ balna na, ĩthõng kũwa ngatĩvõrĩ kadaweha look locibiro cĩ daab cunni wo kulugunye. Irie daab cunni wo coo.’
26 “Ẽdẽcĩ makayyioiti cĩnnẽ ĩnõõnõ ethei ne, ‘Niia ticciannioiti cĩ eeni nyamuttioit cĩ gerthe wo! Aga niia ngatĩ kẽtẽdanẽ na labĩ ngatĩ nga kevĩk na kinyomo, ĩthõng kũlũta labĩ ngatĩ nga kathacek na kinyomo. 27 Abũnna thĩna da, baalia arĩk niia daab ciitha ĩcĩ daabo, kĩĩ katĩ ma ngĩ kõbõda na, kũmũdaha ĩtooryie ĩĩtõ mẽẽlĩ.’
28 “Ĩthõng ĩthĩ baatĩ olu ne, ‘Agamta ĩnõõnõ locibiro cĩ daabo cĩ odoi ẽẽ, ĩthõng anyciwu ticciannioit cĩ ayak locibironya cĩk ẽẽn õmmõtõ ẽẽ. 29 Nyatarka eeti cĩ ayak kaal õõgĩ, ĩtoorothi katĩ gwuak kivitia kĩĩtõ mẽẽlĩ õrrõt. Ĩthõng eeti cĩ athii cĩ ayak gimma, agammiay katĩ gii cĩ ayak nẽ. 30 Ĩthõng yoko, itingkayyiek ticciannioit cĩ ẽẽn giitarreng wo ngatĩvõrĩ muwuratõ, ngatĩ katĩ õvvõ alue eeta, ĩthõng adait nyĩgĩt wuciitha cobbi.’
Ẽtẽd katĩ Ngẽrtĩ eeto thoothonniok cĩk eet vẽlẽk
31 “Ma katĩ ngĩ ikiyyia Ngẽrtĩ Eeto bulẽnta cĩnnĩ kĩ anjĩlẽt cĩgĩnĩk vẽlẽk, aavĩ katĩ nẽ taabawa ĩcĩ alaanthẽt cĩnnĩ bulẽnta cĩ aku tammuatiddina. 32 Aluttiay katĩ eeta loociowẽy vẽlẽk kivitia ĩcĩnnĩ, ĩthõng katĩ ẽngẽr nẽ eet kĩ gõõ ngĩ ẽngẽr tũwayyioiti athaa kĩ ẽẽtha. 33 Aari katĩ nẽ athaa attia cĩnnĩ ĩcĩ athio, ĩthõng arĩk ẽẽtha ĩcĩ athiit cĩnnĩ cĩ angettio.
34 “Ĩthõng katĩ uduwak Alaanĩb eet cĩk aatĩ ĩcĩ athiit cĩnnĩ cĩ athio ethek ne, ‘Ivitia niigia cĩk agatannung Baangĩ cannie vẽlẽk wo, itioth kabicoc wũ balna ĩdĩmanek Nyekuci balna thiananta cĩ tengenyinit cĩ loocu. 35 Nyatarka balna adakca aneeta boobo, ĩthõng anycangũ dainit cĩ kadai, arukca balna aneeta kõrra, ĩthõng anycangũ maam cĩk kawudi, keeni balna takanit, ĩthõng utuvvuyyiangũ niigia aneeta õlõõ cunung. 36 Kaavẽ balna tdilanyany, ĩthõng anycangũ ceremua kitihimu, kĩmori balna, ĩthõng ĩrĩcantahangũ, ma balna ngĩ kaavẽ kĩjana, avvunnu balna niigia acĩnnangũ.’
37 “Ẽdẽcĩ katĩ eeta cĩk edeemi thoothonniok ĩnõõnõ ethei ne, ‘Makayyioit, vaangan da cĩ kacinni naaga aniitia ngĩ adakci boobo, ĩthõng kaanyci dainit wo, kõdẽ arukci kõr, ĩthõng kaanyci maam cĩk awũdĩ wo? 38 Vaangan da wõnõ balna cĩ kacinni naaga aniitia ngĩ eeni niia takan, ĩthõng kivitiaha kaanyci ngĩtĩ aavẽ wo, kõdẽ adiimi ceremua, ĩthõng kaanyci ceremua wo? 39 Vaangan da balna cĩ kacinni naaga aniitia ngĩ immori, kõdẽ aavẽ kĩjana ĩthõng kivitiaha kicinti wo?’
40 “Ẽdẽcĩ katĩ alaanĩ athĩ ne, ‘Kaduwacung na dĩdĩ, gii cĩ balna adĩmanecu niigia gõtõõnõga kĩ ngõõnõga cĩganĩk cĩkkõ cĩk kĩdĩk wo, adĩmanecangũ aneeta.’
41 “Ĩthõng uduwak katĩ alaanĩ eet cĩk aatĩ ĩcĩ athiit cĩnnĩ cĩ angettio ethei ne, ‘Ẽnyẽktĩ ĩcĩnanĩ, niigia eeta cĩk ĩcĩntothothiwu, guo cĩ alna kũdũt wo, wũ balna engenycothi alaan cĩ ririwanĩn cĩk gerthek kĩ anjĩlẽt cĩgĩnĩk.c 42 Nyatarka balna adakca boobo, ĩthõng athii cĩ anyangũ niigia aneeta dainit. Arukca balna kõrra, ĩthõng athii cĩ anyangũ maam cĩk kawudi. 43 Keeni balna et cĩ keeni takanit, ĩthõng athii cĩ anyangũ ngĩtĩ kaavẽ õlõõ cunung. Kaavẽ balna tdilanyany, ĩthõng athii cĩ anyangũ ceremua cĩk kahimiti. Kĩmori balna, ĩthõng kaavẽ kĩjana, ĩthõng athii cĩ avvunnu acĩnnangũ buu.’
44 “Ĩthõng katĩ edecit nẽẽgẽ ĩĩtõ ne, ‘Makayyioit, vaangan da cĩ kacinni naaga aniitia ngĩ adakci boobo, kõdẽ arukci kõrra, kõdẽ eeni et cĩ eeni takan, kõdẽ aavẽ tdilanyany, kõdẽ immori, kõdẽ aavẽ kĩjana, ĩthõng athii cĩ keelli naaga aniitia wo?’
45 “Ẽdẽcĩ katĩ nẽ athĩ ne, ‘Kaduwacung na dĩdĩ, gii cĩ balna athii cĩ adĩmanecu niigia et cĩ dĩcĩ eetĩnẽy ĩcĩganĩk wo, athii cĩ adĩmanecangũ aneeta.’ ”
46 Ĩthõng ĩthĩ Yesu ne, “Õvvõ katĩ eeta neekie ukwẽẽnta ĩcĩ guo cĩ aavĩ kũdũt, ĩthõng thĩ, eeta cĩk edeemi thoothonniok, õvvõ katĩ nẽẽgẽ rũgẽta ĩcĩ alna kũdũt.”