Yiona 1

Nyaraga cĩ

Yiona

Ition Nyekuci Yiona

Aduwaai balna kõr ĩmma Makayyioiti Nyekuci Yiona ngẽrtĩ et cĩ athĩ Amĩtay, 2 ennei ne, “Tĩnga bĩt õlõõ ĩcĩ gaalawu cobbi ĩcĩ athĩ Nineve, bĩt duwak eet ethek ne, ĩcĩn Makayyioiti gerthetin cunung, ĩthõng katĩ ẽtẽda.”

3 Ĩngathĩ kẽnnẽ Yiona, ĩthõng itik gõõl cĩ rẽẽng, avireei Makayyioit. Alũũcĩ balna kẽnnẽ nẽ õkkõ ĩcĩ kõrõõk cĩ gaalawu cĩ athĩ Joopa, ngĩtĩ abĩlnĩ kõvõwõlẽta, ĩthõng ijiowa kovowol cĩ õkkõ ĩcĩ kõrõõk cĩ gaalawu cĩ athĩ Tarthith. Ma natẽ, ũũk ũdũman kovowol cĩ wueeto, ĩthõng õtõd kovowol cobbi, athĩ ne, kivir ĩcĩ Makayyiokto, ngaatĩ õkõyyĩ õlõõ ĩcĩ gaalawu cĩ Tarthithi.

4 Ma natẽ, itiona Makayyioiti ngõõt cĩ tiiri õrrõt, kuvungan bũlũc kongoththia maama kaavu kĩcĩ alib katĩ kovowol cobbi kathaanẽ. 5 Ma natẽ, ivitia abarritit maccucciowa cĩk kovowol cobbi wo õrrõt, ngaatĩ alawĩ nyekucnya cĩgĩk. Ĩthõng naboo utdukteek ijjio õõgĩ cĩk õcõd kovowolĩ bũlũcatõ, kĩĩ katĩ kõvõlvõl kovowolĩ.

Monogo nẽnnẽ kẽnnẽ itin nĩcẽ, itihit Yiona kĩnyaha õrrõt atangu tõõna ĩmmanĩ kovowolatõ loota. 6 Ma natẽ, ĩtĩnga makayyioiti cĩ kovowolo, ĩthõng ũũk ijin ĩnõõnõ ethek ne, “Oongi gõõ niia nyia pĩrnanta cĩ aavĩ ketee wo? Tĩnga, ĩthõng alawu Nyekuc cunni. Kerebo katĩ amannĩcet, ĩthõng ẽẽlawet, kĩĩ katĩ athii cĩ kadaaĩ.”

7 Ma balna natẽ, uluttie maccucciowa cĩk kovowolak, ĩthõng ĩĩtõ ne, “Kĩtĩmanit da kagũra, kĩĩ katĩ kũrũbta et cĩ amaaracet pĩrnanẽt cĩ aavĩ ketee wo.” Ma balna ngĩ atĩman kagũra wo, ẽyẽla kẽnnẽ kagũrana Yiona.

8 Ngaatĩ ajini nẽẽgẽ Yiona ẽthẽcĩ ne, “Nyia cĩ amaaracet ageeta gerthetin coo wo? Tiic cunni niin? Akuni yoko niia looca ĩjang? Eeni niia et cĩ looc jang? Eet cĩk looc cunni eeta cĩgang?”

9 Ngaatĩ ẽdẽcĩ Yiona ĩnõõgõ ẽthẽcĩ ne, “Keeni na Heburenit, ĩthõng kala Makayyioit Nyekuc cĩ tammutiddin wũ balna ẽngẽnyca bũlũc kĩ looc.”

10 Ma balna ngĩ athĩrar nẽẽgẽ thõõth coo wo, ivitia abarritit õrrõt, nyatarka balna uduwak Yiona ĩnõõgõ vẽlẽk ethek ne, avir balna nẽ ĩcĩ Makayyiokto. Ĩthõng ijinit ĩnõõnõ entek ne, “Nyia dĩman noko wo?”

11 Kõdẽ woyyia balna ngaanĩ õthõõth nẽẽgẽ noko avungan ngõõtĩ cobbi õrrõt bũlũc noko. Ngaatĩ ajini nẽẽgẽ Yiona ẽthẽcĩ ne, “Kadai yoko naaga aniitia nyia, kĩĩ katĩ kĩbĩl bũlũca?”

12 Ẽdẽcĩ Yiona ĩnõõgõ ethei ne, “Õdõngtahangũ, ĩthõng utdukteangũ bũlũcatõ, ĩthõng thĩ, katĩ ĩbĩl ngõõtĩ. Kagga na aneeta thẽk cĩ kamaaracung agiitia ngõõt coo cĩ gerthe wak wo.”

13 Atĩman balna kẽnnẽ maccucciowa õrrõt ngatĩ amacucci kovowol kõdõlanit titim. Ĩthõng thĩ, balna athii cĩ ũũlĩ, nyatarka ĩtooryi ngõõtĩ bũlũcatõ kĩĩ gẽrtha õrrõt kijiar wũ owu. 14 Ma natẽ, ivitia alaacõ nẽẽgẽ Makayyioit entek ne, “Makayyioit, nyĩ anyet ageeta kadaakta, ngatĩ karuwua et coo. Nyĩ thẽk anyet ageeta kagamet daaĩthĩ cĩ et cĩ amĩrĩ coo, nyatarka aku thõõth coo kĩcĩ thẽk adiimi niinia.” 15 Ngaatĩ õdõnganĩ nẽẽgẽ Yiona, ĩthõng utdukteek bũlũcatõ noko cabulluk, ngaatĩ abĩlnĩ ngõõtĩ buu tamanoko. 16 Ma natẽ, ivitia otongollie eeta cĩk kovowolak thõõth coo õrrõt, ngaatĩ apaẽcĩ nẽẽgẽ Makayyioit gii cĩ cavĩto, ĩthõng ũbũtanit ngatĩ aticanothĩcẽ ĩnõõnõ.

17 Ĩthõng thĩ, itiona Makayyioiti kuluguac cobbi, kikiyyia kukku Yiona. Ngaatĩ aavẽ Yiona kẽẽngatõ cĩ kuluguac nĩcẽ, wathinniok iyyio kĩ baalinniok iyyio.