Tẽgẽl 132
Ẽẽn tẽgẽl coo, cĩ kõvvõyyĩ naaga tiddina Yeruthalẽma.
1 Makayyioit, hada niia Davide
kĩ pĩrnanẽt vẽlẽk cĩ balna õmõgĩ nẽ.
2 Abũtaneei balna nẽ kõngan Makayyioit,
ĩthõng uduwak Nyekuc cĩ Ijiar vẽlẽk cĩ Yokobĩ, ethei ne,
3 “Athii katĩ na cĩ kithio ciith cannĩ,
kõdẽ kũũk lobela cannĩ cĩ kĩnyawu,
4 athii na cĩ kẽlẽmacẽ kẽbẽrẽ cĩganĩk kĩnyak,
athii kẽbẽrẽ cĩganĩk kĩnyaha tõ,
5 gii ngĩ kũmũda ngĩtĩ Makayyiokto,
Ciith cĩ katĩ abaaknĩ Nyekuci
cĩ Ijiar vẽlẽk cĩ Yokobĩ.”
6 Kathĩkna balna ĩnõõnõ Evrathaha,a
kivitiaha kumudiaha manẽẽnĩy cĩk Jaarĩ.
7 Ĩthõng kiittia ne, “Kõõt naaga Ciitha cĩnnĩ ẽẽ,
kõõt naaga thẽk da kalayyiõy taabawa cĩ thoo cĩgĩnĩk ẽẽ.
8 Makayyioit, tĩnga jiena,
ĩthõng itiowu ngĩtĩ ayuwuthie niia wo,
ĩthõng ikiyyia ngatĩ aavẽ
Nyethuduwocĩ cĩ Ngẽrẽmngẽrẽmõ cunnie cĩ tiiri.
9 Anyĩk niia woccia paadĩrnya cuguk
kupurucothĩk bũnnathĩt kĩ ceremuana,
anyĩk woccia eet cugunik cĩk callĩk
kebelleei aniitia tẽgẽl cĩ talio.”
10 Nyatarka Davide wũ ẽẽn ticciannioit cunni,
nyĩ aburi ĩnõõnõ wũ balna ẽbẽra niia
ngatĩ avuudie ĩnõõnõ ngooroca.
11 Abũtaneei balna Makayyioiti kõngan Davide,b
bũtan cĩ ẽẽn dĩdĩ cĩ athii katĩ nẽ cĩ ũũkcĩ.
“Et cĩ vurut cunung dõ,
kaari katĩ na taabawa cunni,
12 katĩ ngĩ athũnnĩ logoolia cugunniek ngẽrẽmngẽrẽm cannĩ,
ĩthõng owobit goolliok cĩk kalimani nana,
ĩthõng thĩ, agam katĩ logoolia cĩgĩk
taaba cunni kũdũt.”
13 Dĩdĩ, ẽbẽra balna Makayyioiti Thion,
abarriteei balna nẽ ĩnõõnõ kĩĩ ngĩtĩnnĩ cĩ abaaknĩ nẽ.
14 Athĩ balna nẽ ne, “Ẽẽn ngittio ngĩtĩ kayuwuthie na kũdũt,
kaavẽ katĩ na ngato taabawa cĩ kagamẽ looc,
nyatarka kabarriteei na ĩnõõnõ.
15 Kagatani na ngittio kaalĩy ĩcĩk meelĩk ĩcĩk abũnna,
ĩthõng kaanyĩha ngĩjũrra cĩgĩnĩk ahat kuduit kĩccacõ.
16 Kahimiteei katĩ na elianĩt paadĩrnya cĩgĩnĩk kĩ ceremuana,
ĩthõng ebellie katĩ eeta cĩgĩnnẽk cĩk callĩk bẽlbẽllõna.
17 Kĩtoori katĩ na tiirthẽt cĩ Davide ngato,c
ĩthõng kaanyi na lanyĩt ĩnõõnõ cĩ balna kẽbẽra na wo.
18 Kaanyi katĩ na mĩrõk cĩgĩnĩk ngawani,
ĩthõng thĩ, ẽẽn katĩ nẽ alaan cĩ abulie õrrõt.”