Tẽgẽl 119
1 Agatantẽ eeta cĩk amĩrĩ,
cĩk õwõb Ngiran cĩ Makayyiokto.
2 Agatantẽ nẽẽgẽ cĩk õwõb goolliok cĩgĩnĩk,
ĩnõõgõ cĩk adiim ĩnõõnõ thinnetinẽy cĩgĩk vẽlẽk.
3 Athii nẽẽgẽ cĩ ẽgẽrẽthan thõõth ĩmma,
õwõ nẽẽgẽ goolliowẽy cĩgĩnĩk.
4 Nyekuc, anyiwu niia eet liman cunni,
kĩĩ katĩ kowobit nẽẽgẽ ĩnõõnõ jurrung.
5 Anya niia aneeta kõtõõ jurrung tiirthẽta cunni,
gõõla ĩcĩ kathĩknẽ thoothonniok cugunik!
6 Mĩ kowobi na tĩrĩthẽntiok cugunik vẽlẽk,
athii woccia cĩ kangawani na.
7 Kadihiththi katĩ na aniitia thĩnĩna cĩ võõrĩ,
kĩcĩ kalimani na tĩrĩthẽntiok cugunik cĩk abũnna.
8 Kathũnnẽ katĩ na tĩrĩthẽntiok cugunik,
nyĩ ũũngnĩca mĩn.
9 Athũnnĩ woccia ngĩthorowocĩ rũgẽt cĩnnĩ kĩĩ calla kuu?
Gõõla cĩ athĩknĩ nẽ thõõth cunni.
10 Kadiimnyi na aniitia thĩnĩna cannĩ vẽlẽk,
nyĩ anya kũtũngek tĩrĩthẽntiok cugunik.
11 Kalugunyi balna na thõõth cunni thĩnĩna cannĩ,
kĩĩ katĩ athii woccia cĩ kadĩmaneci
thõõth cĩ gerthe aniitia.
12 Makayyioit, kadihiththi na aniitia,
limana tĩrĩthẽntiok cugunik.
13 Kaduwa na kũtũga cannĩ,
ngirantiok vẽlẽk wũk balna avvu kũtũga cunni.
14 Katali na ngĩ kowobi goolliok cugunik,
kĩ eeti cĩ ayak balinit cobbi õrrõt.
15 Kamui katĩ gõõ na tĩrĩthẽntiok cugunik,
ĩthõng aavutõ goolliowa cugunniek õõwa cannĩ.
16 Katalnei na ngirantiok cugunik,
athii katĩ cĩ kabũrĩ thõõth cunni.
17 Dĩmana niia aneeta ticciannioit cunni jurrung,
kĩĩ katĩ kũrũk na, ĩthõng kũthũtẽ thõõth cunni.
18 Õõ niia kẽbẽrẽ cĩganĩk kĩĩ woccia kĩcĩn na
kaal cĩk abũnna Ngirana cunni.
19 Kaavẽ na loota ngato kĩ modeenti,
nyĩ alugunyi niia tĩrĩthẽntiok cugunik kĩ aneeta.
20 Adiim thĩnĩn cannie õrrõt
ngirantiok cugunik itinnya vẽlẽk.
21 Egerenyeei niia eet cĩk ẽngẽrẽn, cĩk ĩcĩĩntẽ,
kĩ cĩk athii cĩ athũnnĩ tĩrĩthẽntiok cugunik.
22 Anya kĩthĩ rẽẽn kĩ dacinet cĩnĩng kĩ tarari cĩnĩng,
nyatarka kõwõba na goolliok cugunik.
23 Kõdẽ woyyia ngĩ alũtẽ makayyiowa,
ĩthõng adaacca aneeta võlõnga,
kamui katĩ na ticciannioiti cunnie thoothonniok cugunik.
24 Anya tĩrĩthẽntiowa cugunniek aneeta kẽbẽlbẽlũ,
ẽẽn nẽẽgẽ tukwuanniok cĩganĩk.
25 Kiinnia na tuduwaca,
thũũtĩ rũgẽt cannĩ, kĩ balna ngĩ aduwa niinia.
26 Kuduwai balna na thõõth vẽlẽk cĩ balna kĩdĩmana nana,
ĩthõng ẽdẽca niia aneeta.
Limana niia aneeta thoothonniok cugunik.
27 Ẽẽla niia aneeta kagga liman cunni,
ĩthõng katĩ kahada tiicanẽ cugunik cĩk anaat eeta.
28 Alu thĩnĩn cannie mothintia,
anya niia kĩthĩ tiir thõõtha cunni.
29 Thuutia goolliowẽy ĩcĩk ẽẽn võlõng,
ĩthõng bũnnatina cunni, limana Ngiran cunni.
30 Kẽbẽra balna na gõõl cĩ ẽẽn dĩdĩ,
ĩthõng kaarĩha na ngirantiok cugunik thĩnĩna cannĩ.
31 Makayyioit, kathũnnẽ na goolliok cugunik,
nyĩ anya niia kangawanũ.
32 Kaviri na gõõla ĩcĩ tĩrĩthẽntiok cugunik,
nyatarka anya niia gẽẽnyĩth kĩĩ maka.
33 Makayyioit, limana aneeta tĩrĩthẽntiok cugunik,
ĩthõng thĩ katĩ kũthũtẽ na ĩnõõgõ kũdũt.
34 Yeleha niia aneeta kagga thõõth,
ĩthõng kũthũtẽ katĩ na Ngiran cunni,
ĩthõng katĩ kĩthĩrara na ĩnõõnõ
thĩnĩna cannĩ vẽlẽk.
35 Anya kõwõb tĩrĩthẽntiok cugunik,
nyatarka karũba na talinit kĩ ĩnõõgõ.
36 Tũwũ niia thĩnĩn cannĩ kũthũtĩ goolliok cugunik,
ĩthõng athii cĩ kõwõbẽ muruthẽt cannĩ doo
cĩ kaanyĩcẽ ẽlẽ cannĩ kabalõy.
37 Tũwũ kẽbẽrẽ cĩganĩk thoothonniowẽy ĩcĩk kaganoko,
thũũtĩ rũgẽt cannĩ, kĩ balna ngĩ aduwa niinia.
38 Thũũtĩ thõõth wũ balna aduwacca niia aneeta, ticciannioit cunni,
kĩĩ katĩ woccia kotongolliei eeta aniitia.
39 Nyẽẽĩ niia ngawani cĩ kongollie nana,
nyatarka abũnna ngirantiowa cugunniek õrrõt kũdũt!
40 Kadiimi kabarriteei na liman cunni!
Thũũtĩ rũgẽt cannĩ, nyatarka bũnnathĩt cunni.
41 Makayyioit, yeleha woccia niia mĩnan cunni
cĩ athii cĩ edeciay,
ĩthõng ẽẽla niia aneeta
kĩ balna ngĩ aduwa niinia,
42 ĩthõng thĩ, katĩ katajana et cĩ adaacca aneeta,
nyatarka kelemi na thõõth cunni.
43 Nyĩ ẽnyẽhẽ niia thõõth cĩ ẽẽn dĩdĩ kũtũga cannĩ,
nyatarka aavĩ muwẽẽnĩtĩ cannie cĩ abũnna
ngiriantiowẽy cugunik.
44 Kathũnnẽ katĩ na Ngiran cunni
erkinya kĩ erkinya kũdũt.
45 Kaavẽ katĩ na jurrung kũdũt,
nyatarka kadiimi kowobi balna liman cunni.
46 Kaduwai katĩ goolliok cugunik alaanẽta,
ĩthõng athii katĩ cĩ kangawani,
47 nyatarka katali na tĩrĩthẽntiowẽy cugunik,
kamĩnani na ĩnõõgõ.
48 Kodongeei na athĩn cĩganĩk tĩrĩthẽntiok cugunik,
cĩk kamĩnani, ĩthõng kamui na thoothonniok cugunik.
49 Hada niia thõõth wũ balna aduwaai niia ticciannioit cunni,
nyatarka anya niia aneeta muwẽẽnĩt cĩ abũnna.
50 Amanymanyana niia aneeta pĩrnanta cannĩ,
nyatarka ẽẽla bũtanĩ cunnie rũgẽt cannĩ.
51 Adaacca aneeta eeta cĩk ẽngẽrẽn dõõkĩthĩ,
ĩthõng thĩ, ngaanĩ kũtũngek na Ngiran cunni kũdũt.
52 Makayyioit, kamuwa na ngirantiok cugunik cĩk baa lõõla,
kamũda na manymanyaniniet ĩcĩnĩng.
53 Kavaraci na kĩ eet cĩk gerthek,
ma ngĩ abũrĩ Ngiran cunni.
54 Ẽẽn tĩrĩthẽntiowa cugunniek tẽgẽl cannĩ
vatĩkẽy vẽlẽk ĩcĩk kaavẽ nana.
55 Makayyioit, kahada na thar cugunik baal,
ĩthõng kathũnnẽ katĩ Ngiran cunni.
56 Gõõl cĩ kabaaẽ na rũgẽta cannĩ coo,
cĩ kathũnnẽ tĩrĩthẽntiok cugunik.
57 Makayyioit, aniitia dõ cĩ kadiimnyi na vẽlẽk,
kaduwa balna na kathĩ ne,
kathũnnẽ katĩ na thoothonniok cugunik.
58 Kadiimi na nguum cunni thĩnĩna cannĩ vẽlẽk,
tamatĩha aneeta kĩ balna ngĩ aduwa niinia.
59 Kahada balna na avuthit cĩ kaavẽ nana,
ĩthõng kõwõba na goolliok cugunik,
60 Kathũweei katĩ na, ĩthõng athii cĩ kaavĩya kuumuc,
ngatĩ kathĩrarẽ tĩrĩthẽntiok cugunik.
61 Kõdẽ woyyia ngĩ ẽcẽbja eeta cĩk gerthek
aneeta lõõrõnẽtẽy, athii katĩ cĩ
ereheca aneeta Ngiranĩ cunnie.
62 Kĩngathi na baal kõrgẽna
kĩĩ kennei aniitia ne, ibalallẽ,
nyatarka ngirantiok cugunik cĩk abũnna.
63 Keeni na gõõnĩ eet vẽlẽk cĩk ongolini aniitia,
cĩ keeni gõõnĩ eet vẽlẽk cĩk athĩrar liman cunni.
64 Makayyioit, abbĩththĩ lõõcĩ mĩnan cunni,
limana aneeta thoothonniok cugunik.
65 Makayyioit, abũnna niia kĩ aneeta,
ticciannioit cunni, nyatarka bũtan cunni.
66 Limana niia aneeta gẽẽnyĩth kĩ gawinit,
nyatarka kelemi na tĩrĩthẽntiok cugunik.
67 Balna ngaanĩ niia anya aneeta pĩrnanẽt,
athii balna na cĩ kathihi thõõth cunni,
ĩthõng thĩ, yoko kõwõba na thõõth cunni.
68 Abũnna niia õrrõt,
ĩthõng adĩmani niia thoothonniok cĩk abũnna,
limana tĩrĩthẽntiok cugunik.
69 Kõdẽ woyyia eeta cĩk ẽngẽrẽn
avuudĩca aneeta thoothonniok cĩk ẽẽn võlõng,
kathũnnẽ na liman cunni thĩnĩna cannĩ vẽlẽk.
70 Athii thinneti cĩgĩk cĩ athĩknẽ,
ĩthõng thĩ, karũba na talinit Ngirana cunni.
71 Abũnna balna ukwẽẽntĩ cunnie kĩ aneeta,
kĩĩ katĩ kiliman na thoothonniok cugunik.
72 Tiir Ngiranĩ kũtũga cunni cĩ anya niia aneeta,
ijiar nyarobinya vucciaknya cĩk ẽẽn
thĩĩk cĩk athĩ kathalkathal kĩ daab vẽlẽk.
73 Ẽngẽnycana balna aneeta athĩna cugunniek,
ĩthõng ĩdĩmantaha jurrung,
anya niia kagga gẽẽnyĩth,
kĩĩ katĩ kiliman tĩrĩthẽntiok cugunik.
74 Ẽbẽlbẽl woccia eeta cĩk ongolini aniitia,
katĩ ngĩ ĩcĩnta aneeta,
nyatarka kaarĩha na muwẽẽnĩt cannĩ cĩ abũnna
thõõtha cunni.
75 Makayyioit, kagga na abũnna ngirantiowa cugunniek,
atĩmanna balna niia aneeta,
nyatarka athũnnẽ niia thõõth cunni.
76 Anyĩk woccia niia mĩnan cunni cĩ alna kũdũt
kaanya aneeta kaavu jurrung,
kĩ balna ngĩ uduwawu niia ticciannioit cunni.
77 Tamatĩha aneeta kĩĩ woccia kũrũk na,
nyatarka kamĩnani na Ngiran cunni.
78 Anyĩk woccia niia eet cĩk ẽngẽrẽn kagam ngawani,
nyatarka ayahaca kirirẽn aneeta kothii thõõth ĩmma,
ĩthõng thĩ, kẽnnẽ kamui katĩ na liman cunni.
79 Anyĩk woccia niia eet cĩk ongolini aniitia kivitia kĩ aneeta,
eet vẽlẽk cĩk aga goolliok cugunik.
80 Anyi woccia niia thĩnĩn cannĩ kĩĩ calla kĩ thoothonniok cugunik,
kĩĩ woccia kithii ngawani kĩ aneeta tõõ.
81 Ĩpĩra thĩnĩn cannie õrrõt, ẽrẽ elianĩt cunni, ĩthõng thĩ,
kaarĩha na muwẽẽnĩt cannĩ cĩ abũnna thõõtha cunni.
82 Ipiryia kẽbẽrẽ cĩganniek ngatĩ gõõ kẽrẽwẽ bũtan
wũ balna aduwa niia,
kajinni ketheci ne,
“Ẽẽlana katĩ niia aneeta katĩngan?”
83 Kõdẽ woyyia kĩlĩb na kaavu kĩ dongok cĩ ũnũũk,
ngaanĩ kerekteha thoothonniowa cugunniek.
84 Kereyyi katĩ na kuumuc kĩĩ tĩngan?
Uuki katĩ niia eet cĩk acananna aneeta katĩngan?
85 Adaacõ eeta cĩk ẽngẽrẽn loowua cĩk edettia aneeta,
cĩk athii cĩ athĩrar Ngiran cunni.
86 Ẽẽn tĩrĩthẽntiowa cugunniek vẽlẽk dĩdĩ, ẽẽlanĩ,
nyatarka acananna eeta aneeta kothii thõõth ĩmma.
87 Ũbũccantaha nẽẽgẽ ngatĩ ẽdẽcania aneeta,
ĩthõng thĩ, ngaanĩ kũtũbũr na liman cunni.
88 Thũũtĩ rũgẽt cannĩ, nyatarka mĩnan cunni,
ĩthõng kĩthĩrara katĩ na goolliok cugunik.
89 Makayyioit, alna thõõth cunnie kũdũt,
abĩlĩ nẽ kõkõm tammuatiddina.
90 Alna thõõth cunnie cĩ uduwa niia erkinya vẽlẽk
kõdõlan eet cĩk ngaanĩ avvu kõr ĩmma.
Ẽngẽnyca balna niia looc, ĩthõng alna kũdũt.
91 Alna ngirantiowa cugunniek kĩĩ kõr coo,
nyatarka aticanothici kaala vẽlẽk aniitia.
92 Ma baalia kithii na cĩ kebelbeli Ngirana cunni,
kadaaha woyyia baalia na canana cannĩ.
93 Athii katĩ cĩ ereheca aneeta limanĩ cunnie,
nyatarka athũnnẽ balna niia
rũgẽt cannĩ, nyatarka ĩnõõnõ.
94 Ẽẽla niia aneeta, nyatarka keeni na et cunni.
Katĩmani balna õrrõt ngatĩ kathũnnẽ liman cunni.
95 Ẽrẽyya aneeta eeta cĩk gerthek cĩk adiim ngĩ arukcanĩ,
ĩthõng thĩ, kẽnnẽ kamui katĩ na goolliok cugunik.
96 Kilimana balna na ngatĩ aku gii vẽlẽk aturna, ĩthõng thĩ,
kẽnnẽ athii tĩrĩthẽntiowa cugunniek cĩ edecciay.
97 Kamĩnani na Ngiran cunni õrrõt kũdũt,
kamui na ĩnõõnõ tub.
98 Anya tĩrĩthẽntiowa cugunniek aneeta kẽgẽẽny õrrõt kijiar mĩrõk cĩganĩk,
nyatarka aatĩ nẽẽgẽ vẽlẽk dõõkĩthĩ ĩcĩnanĩ.
99 Kagga na thõõth kijiar limanniok cĩganĩk,
nyatarka kamui na goolliok cugunik.
100 Kegeenyi na kijiar eet cĩk obbitik,
nyatarka kathĩrari na liman cunni.
101 Kũtũbũra balna na ngatĩ kõwõyyẽ
gõõla cĩ gerthe vẽlẽk,
kĩĩ katĩ woccia kĩthĩrar na thõõth cunni.
102 Ngaanĩ kũtũbũr na ngirantiok cugunik,
nyatarka aniitia cĩ eeni limannioit cannĩ.
103 Ẽmmẽdẽ thoothiowa cugunniek õrrõt,
ijiar lotec buu kũtũga cannĩ.
104 Anya limanĩ cunnie aneeta gẽẽnyĩth,
ĩthõng thĩna, kakataa gõõl cĩ gerthe.
105 Ẽẽn thõõth cunnie gii cĩ tũkũlẽnto
cĩ atũkũl thoo cĩganĩk,
ĩthõng ũtũkũl gõõl cannĩ.
106 Kũbũtana balna na, ĩthõng ẽẽn dĩdĩ,
ngatĩ kathũnnẽ katĩ ngirantiok cugunik cĩk abũnna.
107 Makayyioit, kĩpĩra balna na õrrõt,
thũũtĩ rũgẽt cannĩ, kĩ balna ngĩ aduwa niinia.
108 Makayyioit, lẽm niia dĩhĩthẽnĩt cĩ kũtũk cannĩ,
ĩthõng illimana ngirantiok cugunik.
109 Kõdẽ woyyia ngĩ aavĩ rũgẽtĩ cannie dõõkĩthĩ
gõõla cĩ daaĩtho, athii katĩ cĩ
ereheca aneeta Ngiranĩ cunnie.
110 Ẽdẽtta eeta cĩk gerthek aneeta nyeritiewa,
ĩthõng thĩ, ngaanĩ kũtũbũr na liman cunni.
111 Ẽẽn goolliowa cugunniek vẽlẽk cĩganĩk.
Ẽẽn nẽẽgẽ vẽlẽk talinit cĩ thĩnĩn cannĩ.
112 Adiim thĩnĩn cannie thoothonniok cugunik vẽlẽk,
kuumuc kadaawũ.
113 Kakanna na eet cĩk ũũwũ muwẽẽnĩt cĩnĩng dõõkĩthĩ,
ĩthõng thĩ, kẽnnẽ kamĩnani na Ngiran cunni.
114 Eeni niia kilib cannĩ kĩ ngĩtĩ kalugunyẽnẽ na,
kaarĩha na muwẽẽnĩt cannĩ cĩ abũnna thõõtha cunni.
115 Õõt rẽẽna kĩ aneeta niigia eeta cĩk eeginnu gẽrẽthanniok,
kĩĩ katĩ kĩthĩrar na tĩrĩthẽntiok cĩk Nyekuc cannĩ.
116 Anya niia tiirthẽt kĩ balna ngĩ aduwa niinia, ĩthõng katĩ kabaaha nana.
Nyĩ anyi niia muwẽẽnĩt cannĩ cĩ abũnna kedecciay.
117 Thuutia aneeta, kĩĩ katĩ keeliay nana.
Kathũnnẽ katĩ na thoothonniok cugunik dõõkĩthĩ.
118 Aburi niia eet vẽlẽk cĩk athii cĩ athĩrar thoothonniok cugunik,
nyatarka ẽẽn goolinietĩ cĩnĩng gimma kaganoko.
119 Atdukeei niia eet cĩk gerthek kĩ taaha tuu,
ĩthõng thĩna, kamĩnani na goolliok cugunik.
120 Kabarriti na, nyatarka kongolini aniitia,
abulanna aneeta ngirantiowa cugunniek õrrõt.
121 Kĩdĩmana balna na thoothonniok
cĩk edeemothi, ĩthõng abũnna,
nyĩ anyi niia eet kĩtdanyca aneeta.
122 Thuutia niia aneeta, ticciannioit cunni,
nyĩ anyi eet cĩk ẽngẽrẽn kĩtdanyca aneeta.
123 Ipiryia kẽbẽrẽ cĩganniek ngatĩ
gõõ kẽrẽwẽ elianĩt cunni,
ẽrẽppan nẽẽgẽ bũtan wũ balna aduwa niia.
124 Dĩmana niia aneeta, ticciannioit cunni
gõõla cĩ mĩnan cunni,
ĩthõng ilimaneha tĩrĩthẽntiok cugunik.
125 Keeni na ticciannioit cunni,
anya niia aneeta gẽẽnyĩth,
kĩĩ woccia kagga goolliok cugunik.
126 Makayyioit, arawak kõr
cĩ koccia adĩmanẽ niia gimma,
nyatarka ĩĩtõ mẽẽlĩ eeta
cĩk ẽgẽrẽthan Ngiran cunni.
127 Nyatarka kamĩnani na tĩrĩthẽntiok cugunik,
kijiar daab cĩ abũnna õrrõt,
128 ĩthõng, nyatarka kacini na ngĩ
abũnna tĩrĩthẽntiowa cugunniek vẽlẽk,
kakanna na goolliok cĩk gerthek vẽlẽk.
129 Abũnna goolliowa cugunniek õrrõt,
ĩthõng thĩna, kongollie na ĩnõõgõ vẽlẽk.
130 Ayaha wobinti cĩ thõõth cunni lanyĩt,
ayahai nẽ eet cĩk athii cĩ ẽgẽẽnyĩ gẽẽnyĩth.
131 Kabarriteei na tĩrĩthẽntiok cugunik õrrõt,
kĩ kũtũgĩ cannie ngĩ aruk kõrra.
132 Muuda niia aneeta, ĩthõng atamatĩhanĩ,
kĩcĩ amanni niia dõõkĩthĩ
eet cĩk amĩnan thar cugunik.
133 Yelek thoo cĩganĩk gõõl cĩ thõõth cunni,
nyĩ anyi niia gerthetin kijiara aneeta.
134 Ẽẽlawa eetĩnẽy ĩcĩk ĩtdanya aneeta,
kĩĩ woccia kũthũtĩ na liman cunni.
135 Anyĩk niia nguum cunni katalany
ẽla cĩ ticciannioit cunni,
ĩthõng ilimaneha tĩrĩthẽntiok cugunik.
136 Atduutiay tulalõ cĩganniek kirihit kĩ lilliowa,
nyatarka athii cĩ athũnnĩ eeta Ngiran cunni.
137 Makayyioit, eeni niia et cĩ edeemi thõõth,
ĩthõng edeemothi ngirantiowa cugunniek.
138 Edeemothi goolliowa wũk balna anyet niia õrrõt,
ĩthõng kagga na ngatĩ ẽẽn nẽẽgẽ dĩdĩ.
139 Anya aneeta barritõnĩ cannie
cĩ kadiimi aniitia kĩlĩbũ,
nyatarka athii cĩ athũnnĩ mĩrõwa cĩganniek
thoothonniok cugunik.
140 Atĩmanni balna thoothonniowa
wũk balna aduwa niia ngatĩ ẽẽn dĩdĩ,
ĩthõng kamĩnani na ticciannioiti cunnie
ĩnõõgõ õrrõt kũdũt.
141 Kõdẽ woyyia kĩthĩ na et ĩmma kaganoko,
ĩthõng balna atararyia eeta,
athii cĩ kuungni na liman cunni.
142 Alna bũnnathĩtĩ cunnie kũdũt,
ĩthõng ẽẽn Ngiranĩ cunnie dĩdĩ.
143 Kõdẽ woyyia ngĩ aavĩ balna pĩrnanẽtĩ
kĩ mothinit kĩ aneeta, ĩthõng thĩ, kẽnnẽ
ayahaca tĩrĩthẽntiowa cugunniek aneeta talinit.
144 Edeemothi goolliowa cugunniek dõõkĩthĩ,
anya gẽẽnyĩth,
kĩĩ katĩ kagga ĩnõõgõ,
ĩthõng woccia kabaaha.
145 Makayyioit, kavvuyyi na
thĩnĩna cannĩ vẽlẽk, tajana aneeta,
ĩthõng kũthũtẽ katĩ na thoothonniok cugunik.
146 Kavvuyyi na aniitia, ẽẽla niia aneeta,
ĩthõng kikiyyia katĩ na kũthũtẽ goolliok cugunik.
147 Kalayyi na aniitia elinit cunni ngaanie kiliba kõrra,
kaarĩha na muwẽẽnĩt cannĩ cĩ abũnna thõõtha cunni.
148 Acĩnẽ kẽbẽrẽ cĩganniek baalin kaal,
kĩĩ woccia kumuk na thoothonniok cĩk balna abũtani niia.
149 Makayyioit, thĩrar molook cannĩ, nyatarka mĩnan cunni,
thũũtĩ rũgẽt cannĩ ngiriantiowẽy cugunik.
150 Ivitia ĩĩtõ õjõõntĩ aneeta eeta cĩk atukwuan thoothonniok cĩk gerthek,
ĩthõng thĩ, kẽnnẽ rẽẽntĩ nẽẽgẽ kĩ Ngiran cunni.
151 Makayyioit, obokcie niia kĩ aneeta,
ĩthõng ẽẽn tĩrĩthẽntiowa cugunniek vẽlẽk dĩdĩ.
152 Kilimana balna na goolliok cugunik
wũk baa lõõla wũk aduwa niia,
anyi niia ĩnõõgõ kaavutõ kũdũt.
153 Cĩn niia hecinit cannĩ, ĩthõng ẽẽlanĩ,
nyatarka athii balna cĩ ereheca aneeta Ngiranĩ cunnie.
154 Bẽha niia aneeta, ĩthõng ẽẽlawa aneeta,
thũũtĩ rũgẽt cannĩ, kĩ balna ngĩ aduwa niinia.
155 Athii cĩ eliay eeta cĩk gerthek,
nyatarka athii cĩ ẽrẽppan nẽẽgẽ thoothonniok cugunik.
156 Makayyioit, maka tamati cunnie õrrõt kũdũt,
thũũtĩ rũgẽt cannĩ ngiriantiowẽy cugunik.
157 Mẽẽlĩ mĩrõwa cĩk acananna aneeta,
ĩthõng thĩ, kẽnnẽ ngaanĩ balna na kũtũbũr goolliok cugunik.
158 Kakanna na eet cĩk athii cĩ elemnyi aniitia,
nyatarka athii cĩ athũnnĩ nẽẽgẽ thõõth cunni.
159 Makayyioit, cĩn nõõnõ ngatĩ kamĩnanẽ na liman cunni,
thũũtĩ rũgẽt cannĩ, nyatarka mĩnan cunni.
160 Ẽẽn thoothiowa cugunniek vẽlẽk dĩdĩ,
alna ngirantiowa cugunniek edeemothi kũdũt.
161 Acananna makayyiowa aneeta kaganoko,
ĩthõng thĩ, kẽnnẽ abarrit thĩnĩn cannie thõõtha cunni.
162 Katali na, nyatarka thoothonniok cĩk aduwa niia,
kaavu kĩ eeti cĩ arũba balinit cobbi.
163 Kaaburneei na thoothonniok cĩk võlõngak,
kamĩnani kẽnnẽ Ngiran cunni.
164 Kadihiththi na aniitia ngõnana
tũrgẽrẽm kõr codoi doo,
nyatarka mũrrẽ ngirantiowa cugunniek.
165 Aatĩ eeta cĩk amĩnan Ngiran cunni ganõna ĩcĩ obbi,
athii gii cĩ woccia anyi ĩnõõgõ kuukitõ looc tõõ.
166 Makayyioit, kẽrẽ na elianĩt cunni,
ĩthõng kõwõba tĩrĩthẽntiok cugunik.
167 Kathũnnẽ na goolliok cugunik,
nyatarka kamĩnani na ĩnõõgõ õrrõt.
168 Kathũnnẽ na liman cunni kĩ goolliok cugunik,
nyatarka aga niia goolliok cĩganĩk vẽlẽk.
169 Makayyioit, thĩk woccia niia ulua cannĩ cĩ elianto,
anya niia aneeta gẽẽnyĩth cĩ aku thõõtha cunni.
170 Thĩk woccia niia lawinit cannĩ,
ĩthõng ẽẽla niia aneeta kĩ balna ngĩ aduwa niinia.
171 Kadihiththi woccia na aniitia kũtũga cannĩ,
nyatarka alimanna niia aneeta thoothonniok cugunik.
172 Anyĩk woccia niia kũtũk cannĩ kẽbẽl thõõth cunni,
nyatarka edeemothi tĩrĩthẽntiowa cugunniek.
173 Anyĩk woccia niia athiit cunni kĩdĩmanothĩk kẽẽla aneeta,
nyatarka kẽbẽra balna na liman cunni.
174 Makayyioit, kẽrẽ na elianĩt cunni,
ĩthõng kũrũba na talinit ngirana cunni.
175 Anya niia aneeta rũgẽt, kĩĩ woccia kidihithi na aniitia,
anyĩk woccia niia ngirantiok cugunik kuthuttia aneeta.
176 Kangalĩlẽ balna na
kĩ atheetĩ cĩ ithii thõng,
diima aneeta, ticciannioit cunni, nyatarka
ngaanĩ balna kerekteha aneeta tĩrĩthẽntiowa cugunniek.