Tẽgẽl 118
1 Entek niigia Makayyioit ne, ibalallẽ,
nyatarka abũnna nẽnẽ,
alna mĩnanĩ cĩnnẽ kũdũt.
2 Anycĩk niigia eet cĩk Ĩthraĩlĩ kĩĩtõ ne,
“Alna mĩnanĩ cĩnnẽ kũdũt.”
3 Anycĩk niigia eet cĩk ciith cĩk Aarõnĩ kĩĩtõ ne,
“Alna mĩnanĩ cĩnnẽ kũdũt.”
4 Anycĩk niigia eet cĩk ayak tongolinit kĩ Makayyioit
kĩĩtõ ne, “Alna mĩnanĩ cĩnnẽ kũdũt.”
5 Kaluei balna na Makayyioit canana cannĩ,
ĩthõng ẽdẽc nẽ, ngatĩ õõgania aneeta kaavu jurrung.
6 Aavĩ Makayyioiti kĩ aneeta,
athii katĩ cĩ kongollie na gimma.
Nyia woccia katĩ cĩ adĩmaneca eeti aneeta?
7 Aavĩ Makayyioiti kĩ aneeta, ẽẽn nẽ Ellioit cannĩ.
Kacini katĩ na mĩrõk cĩganĩk katĩ ngĩ ijiaryie.
8 Mayya ngatĩ kalugunyẽnẽ kĩ Makayyioit,
kijiar ngatĩ karĩccẽ thĩnĩn cannĩ kĩ et.
9 Mayya ngatĩ kalugunyẽnẽ kĩ Makayyioit,
kijiar ngatĩ karĩccẽ thĩnĩn cannĩ
kĩ makayyiok cĩk obbitik.
10 Kõdẽ woyyia balna ngĩ ĩlĩkta aneeta loociowa vẽlẽk,
kijiara na ĩnõõgõ thaarĩy cĩk Makayyioktak.
11 Alĩkca balna nẽẽgẽ aneeta, ĩthõng ayaktaha jore,
ĩthõng thĩ, kijiara na ĩnõõgõ thaarĩy cĩk Makayyioktak.
12 Alĩkca balna nẽẽgẽ aneeta kĩ mĩgõwa,
ĩthõng thĩ, adaaitõ balna nẽẽgẽ tamanoko
kĩ gua cĩ atũũth bĩlla,
ngaatĩ balna kijiarẽ na ĩnõõgõ
thaarĩy cĩk Makayyioktak.
13 Iyyiottia balna nẽẽgẽ aneeta,
ĩthõng kõbõwẽ na kuuka looc, ĩthõng thĩ,
kẽnnẽ ẽẽla balna aneeta Makayyioiti.
14 Ẽẽn Makayyioiti tiirthẽt cannĩ kĩ tẽgẽl cannĩ,
ẽẽn nẽ Ellioit cannĩ.
15 Ẽgẽrẽny eeta cĩk abũnna talintia ciithẽnẽy cĩgĩk,
nyatarka ijiaritõ balna nẽẽgẽ mĩrõk cĩk athĩ ne,
“Ĩdĩman athiiti cĩ athio cĩ Makayyiokto
thoothonniok cĩk abulanneta!
16 Odongnyie athiiti cĩ athio cĩ Makayyiokto tiddina,
ĩdĩman athiiti cĩ athio cĩ Makayyiokto
thoothonniok cĩk abulanneta!”
17 Athii katĩ na cĩ kadaai, ĩthõng thĩ, karugi katĩ na,
ĩthõng kẽkẽba katĩ na tiicanẽ cĩk balna ĩdĩman Makayyioiti.
18 Atĩmanna balna aneeta Makayyioiti pĩrnanta õrrõt,
ĩthõng thĩ, ngaanĩ kaanya nẽ aneeta kadaawũ.
19 Ooyihangũ niigia aneeta araanet cĩk
reerung cĩ Ciith cĩ Nyekuco,
kitio katĩ na kũũk kennek
Makayyioit ne, ibalallẽ.
20 Araan cĩ Makayyiokto coo,
cĩ ẽhẽẽt eeta cĩk edeemi thõõth dõ.
21 Kennecci katĩ na aniitia ne, ibalallẽ,
nyatarka balna ẽdẽcca niia aneeta,
ikiyyia ĩthĩ niia elinit cannĩ.
22 Bĩĩ wũ balna ũtũbũrĩt tengenyiowa,
ikiyyia ĩthĩ bĩĩ cĩ tiiri õrrõt ciitha,
23 gii cĩ balna adĩman Makayyioiti coo,
ĩthõng kĩcĩnta kẽbẽrẽnĩy ĩcĩgak,
ĩthõng ubulanet nẽ ageeta õrrõt kũdũt.
24 Ẽẽn coo kõr cĩ balna ẽngẽnyca Makayyioiti.
Kebelbelit naaga, ĩthõng katalit kõrra ĩcoo.
25 Makayyioit, elet niia ageeta.
Makayyioit anyet niia ageeta kaavuttia jurrung.
26 Agatanẽ eeti cĩ aku thaarĩy ĩcĩk Makayyioktak,
kagatannung naaga agiitia Ciitha cĩ Makayyiokto.
27 Ẽẽn Makayyioiti Nyekuc,
ĩthõng aanyĩk nẽ lanyĩt cĩnnĩ kũtũkũlet ageeta.
Kecebit naaga gii cĩ cavĩto ngatĩ todongintio.
28 Eeni niia Nyekuc cannĩ, ketheci katĩ na
aniitia ne, ibalallẽ.
Eeni niia Nyekuc cannĩ,
kadihiththi katĩ na aniitia.
29 Entek niigia Makayyioit ne, ibalallẽ,
nyatarka abũnna nẽnẽ,
alna mĩnanĩ cĩnnẽ kũdũt.