Tẽgẽl 112
1 Ĩdĩhĩthĩt niigia Makayyioit.
Agatanni eeti cĩ ongollie Makayyioit,
cĩ ẽbẽlbẽl nẽ ngatĩ athũnnĩ tĩrĩthẽnĩt cĩnnĩ.
2 Tiirti katĩ doolia cĩgĩnnẽk looc vẽlẽk.
Agatan katĩ Nyekuci dõõlĩ cĩk dõõlĩ cĩgĩnĩk cĩk abũnna.
3 Aballie katĩ kõrõõgĩ cĩnnẽ,
ĩthõng alna katĩ bũnnathĩtĩ cĩnnẽ kũdũt.
4 Alanyĩt lanyĩtĩ muwuratõ ĩcĩ et cĩ abũnna,
ẽẽn nẽ tamatioit, ĩthõng ẽẽn thimattioit.
5 Akunei katĩ gii cĩ abũnna et
cĩ anyi eet kaal cĩgĩnĩk kaganoko,
et cĩ atican tiicanẽ cĩgĩnĩk
gõõla cĩ edeemothi.
6 Dĩdĩ, athii katĩ gii cĩ õmmõnnĩ ĩnõõnõ tõõ,
athii katĩ eeta cĩ erehei ĩnõõnõ kũdũt.
7 Athii nẽ cĩ ongollie nyemutua cĩk gerthek,
nyatarka aari nẽ thĩnĩn cĩnnĩ Makayyiokta.
8 Ayak nẽ thĩnĩn cĩ õkõmĩ, ĩthõng athii cĩ ongollie,
turnanta, ẽbẽk katĩ nẽ mĩrõk cĩgĩnĩk jiarintia.
9 Anyi balna nẽ eet cĩk apĩrna anyintiok cĩk meelĩk,
alna bũnnathĩtĩ cĩnnẽ õkõmĩ kũdũt,
arũba katĩ nẽ tiirthẽt cobbi kĩ makathĩt.
10 Acĩn katĩ eeti cĩ gerthe thõõth cĩnnĩ,
ĩthõng avaraca,
adak katĩ nẽ nyĩgĩt cĩgĩnĩk,
ĩthõng ikiyyia katĩ ithii tiirthẽtĩ cĩnnẽ,
ĩthõng katĩ edecciay kaala cĩk abarriteei eeta
cĩk gerthek kaganoko.