Tẽgẽl 111
1 Ĩdĩhĩthĩt niigia Makayyioit!
Kadihithi katĩ na Makayyioit thĩnĩna cannĩ vẽlẽk,
katĩ ngĩ karumona na kĩ eet cĩgĩnĩk cĩk abũnna.
2 Adĩman balna Makayyioiti tiiciok cĩk meelĩk cĩk anatti,
amuk eeta tiiciok cĩkkõ talintia.
3 Ẽẽn tiicanẽ cĩgĩnnẽk bulẽnĩt kĩ makathĩt,
ĩthõng alna thõõth cĩnnẽ cĩ edeemothi kũdũt.
4 Anyet nẽ ageeta kahaddia thoothonniok cĩgĩnĩk cĩk anatti ẽẽ,
ẽẽn Makayyioiti tamatioit kĩ thimattioit.
5 Anyi nẽ ahat eet cĩk ongollie ĩnõõnõ,
ĩthõng ahada nẽ ngẽrẽmngẽrẽm cĩnnĩ kũdũt.
6 Eyelek balna nẽ eet cĩgĩnĩk tiirthẽt cĩ tiicanẽ cĩgĩnĩk,
aanyĩk ĩnõõgõ looc cĩ eet cĩk loociok õõgĩ.
7 Tiiciowa vẽlẽk cĩk atican nẽ abũnna, ĩthõng edeemothi,
ĩthõng ẽẽn limanĩ cĩnnẽ vẽlẽk dĩdĩ.
8 Aatĩ nẽẽgẽ vẽlẽk kũdũt,
nyatarka athũnnĩ Nyekuci thõõth cĩnnĩ.
9 Ẽẽla balna Nyekuci eet cĩgĩnĩk,
ĩthõng abũtan balna nẽ athĩ ne,
aavĩ katĩ ngẽrẽmngẽrẽmĩ cĩnnẽ kĩ ĩnõõgõ kũdũt,
dĩhĩmẽ thara cĩgĩnnẽk, ĩthõng ayak makathĩt.
10 Ẽẽn tongolinti cĩ Makayyiokto
terehianĩt cĩ gẽẽnyĩtho,
alĩthĩ katĩ eeta vẽlẽk gẽẽnyĩtha
cĩk ongollie liman cĩnnĩ.
Kĩdĩhĩthĩt naaga ĩnõõnõ kũdũt!