Tẽgẽl 109
Ẽẽn tẽgẽl cĩ Davide coo, cĩ makayyioit cĩ tegeluanu.
1 Nyekuc, kadihiththi na aniitia,
nyĩ ngaanĩ aavẽ niia tiv noko,
2 nyatarka adaacca balna eeta cĩk gerthek
kĩ volongnyiak aneeta,
apuuk balna nẽẽgẽ kutugeti cĩgĩk
thõõtha cĩ adĩmania nẽẽgẽ aneeta buth,
ĩthõng aduwa nẽẽgẽ thoothonniok
cĩk ẽẽn võlõng, nyatarka aneeta.
3 Alĩhana nẽẽgẽ aneeta thoothiowẽy ĩcĩk aaburneccianĩ,
ĩthõng ayakta nẽẽgẽ jore kĩ aneeta thõõtha ĩcĩ kaganoko.
4 Kamĩnani na ĩnõõgõ, ĩthõng thĩ, adulla nẽẽgẽ aneeta,
ĩthõng thĩ, kalawinie na ĩnõõgõ Nyekuca.
5 Adũmanna nẽẽgẽ aneeta naboo gerthetina,
nyatarka gii cĩ abũnna cĩ kadĩmani na,
ĩthõng aaburnecca nẽẽgẽ aneeta,
ĩthõng thĩ, kẽnnẽ kamĩnani na ĩnõõgõ.
6 Athĩ mĩrõwa cĩganniek ne,
“Bẽra niia et cĩ gerthe kũtũbũr ĩnõõnõ.
Anyĩk niia et cĩ abĩlnĩ ĩnõõnõ,
kõvõlõngĩ thõõtha ĩcĩ gerthe.
7 Mĩ ũũk thõõth cĩnnẽ lokika kẽtẽdẽ,
anyĩk niia ĩnõõnõ kĩĩ et cĩ abacie thõõth cĩnnẽ,
kẽẽb woccia niia lawinit cĩnnĩ wo, kĩĩ gerthetin.
8 Anyĩk woccia niia erkinya cĩgĩnĩk kĩĩ dĩcẽ,
ĩthõng abarĩc woccia katĩ eeti ĩmma
taaba cĩnnĩ cĩ makathĩto.
9 Anyĩk woccia niia dõõlĩ cĩgĩnĩk kithiic cĩ ayak baatĩnnĩ,
ĩthõng ĩthĩ, ngaa cĩnnẽ bõyya.
10 Anyĩk woccia niia dõõlĩ cĩgĩnĩk
kĩĩtõ eet cĩk amaatĩ, cĩk ala eet jiena rõtẽẽnĩy,
ĩthõng woccia umuryie korookjiowẽy ĩcĩgĩk
ĩcĩk õõyõktẽ ẽẽ.
11 Anyĩk woccia niia et ĩmma kũũĩ ijjio cĩgĩnĩk,
nyatarka nga nẽ kuruk nyabolo,
ĩthõng ootti mõdẽẽna kaal vẽlẽk
cĩk balna aticana nẽnẽ.
12 Anyĩk woccia niia et ĩmma kithii cĩ athimati ĩnõõnõ,
anyĩk woccia et ĩmma kithii cĩ amanni lõgõõ cĩgĩnĩk
cĩk athii cĩ ayak baatĩnnĩ wo.
13 Anyĩk woccia niia kadaaitõ doolia cĩgĩnnẽk vẽlẽk,
anyĩk woccia thar cĩk tatũk cĩ vurtẽẽn cĩgĩnĩk kupucciantiay.
14 Nyĩ anyi Makayyioit kũtũngek gerthetin cĩ baajikni,
kĩ baatĩ baajigi cĩgĩk.
15 Ahada woccia Makayyioiti dõõkĩthĩ
thoothonniok cĩgĩk cĩk gerthek,
ĩthõng woccia ẽnyẽẽĩ nẽ thaaryiok cĩgĩk
muwẽẽnta cĩ eetu loota.
16 Abũrĩ nẽ ngatĩ athimati eet õõgĩ,
itingkawek balna nẽ ngĩjũrra daaĩth,
kĩ eet cĩk apĩrna kĩ eet cĩk uduullie thinneti cĩgĩk.
17 Amĩnan balna nẽ ngatĩ acĩĩnĩ eet õõgĩ,
yoko cĩĩn niia ĩnõõnõ,
athii balna nẽ cĩ adiim agatan eet õõgĩ,
yoko nyĩ agatanni niia ĩnõõnõ.
18 Ahimit nẽ cĩĩnẽnẽt kĩ cẽrẽm cĩnnẽ,
ẽhẽẽt cĩĩnẽnẽtĩ ẽlẽ cĩnnĩ kĩ maama,
iithio cĩĩnẽnẽtĩ ammẽ cĩgĩnĩk kĩ ngooroca.
19 Anyĩk woccia niia cĩĩnẽnẽt cĩnnĩ wo,
kũmũrmũranothĩk ĩnõõnõ kĩ cẽrẽma,
kĩ nyẽkẽdẽngõ cĩ ecebothi ĩnõõnõ.”
20 Makayyioit, anyĩk woccia niia
cĩĩnẽnẽt coo mĩrõk cĩganĩk,
cĩk õthõõth thoothonniok cĩk gerthek,
nyatarka aneeta wo.
21 Ĩthõng thĩ, niia Makayyioit, Tiiryioiti,
ẽẽlawa niia aneeta, nyatarka thar cugunik,
ẽẽlawanĩ, nyatarka bũnnathĩt cunni kĩ mĩnan cunni.
22 Nyatarka keeni na ngĩjũrrait, ĩthõng kothii gii cĩ kayai,
ĩthõng abbĩththĩ thĩnĩn cannĩ wuciithi.
23 Kithiiwa na kĩ ririwacĩ cĩ jiatinu,
kutururothiha na tuu kĩ girrococĩ
24 Nyatarka athii na cĩ kaduwẽnẽ,
apĩrna kẽnnẽ kuthungti cĩganniek,
ĩthõng ĩthĩ, ẽlẽ cannie ammẽ dõ.
25 Ma katĩ ngĩ acĩnna mĩrõwa cĩganniek aneeta,
õthõõth nẽẽgẽ kaal cĩk gerthek,
ĩthõng ĩlĩnglĩnganit ooti cĩgĩk.
26 Makayyioit Nyekuc cannĩ, ẽẽlawa baai thẽk aneeta,
ijjia ẽẽlawanĩ, nyatarka mĩnan cunni.
27 Makayyioit, anyĩk niia eet õõgĩ kagaacõ,
ngatĩ ẽnnẽ aniitia dõ cĩ ẽẽlana aneeta.
28 Acĩĩnna woccia nẽẽgẽ aneeta,
ĩthõng thĩ, agatana katĩ niia aneeta,
anyiwu niia mĩrõk cĩganĩk
kitiathõ katĩ ngĩ avvu jora,
ĩthõng thĩ, anya niia aneeta
ticciannioit cunni kẽbẽlbẽlũ.
29 Amuti katĩ niia eleeti cĩgĩk ngawanintia kĩyoko,
ngĩ abungie nẽẽgẽ ceremuanĩy wo.
30 Kebelei katĩ na Makayyioit
dĩhĩthẽnĩt cĩnnĩ kũtũga cannĩ,
katĩ ngĩ aruumõy eeta cĩk meelĩk
kadihithi katĩ na ĩnõõnõ.
31 Nyatarka abĩlĩ nẽ kĩ et cĩ apĩrna
kothii gii cĩ ayaĩ,
katĩ ngĩ ẽẽla nẽ rũgẽt cĩnnĩ
eetĩnẽy ĩcĩk ẽtẽd thõõth cĩnnĩ lokika.