Tẽgẽl 108
Tẽgẽl cĩ Davide.
1 Nyekuc cĩnang, kathunni na aniitia
thĩnĩna cannĩ vẽlẽk, kebellie na,
ĩthõng kĩĩ kidihithi na aniitia
thĩnĩna cannĩ vẽlẽk
2 Kidori, tĩnga jiena!
Kĩngannẽ katĩ na kõr tẽgẽla cannĩ.
3 Makayyioit, kadihiththi katĩ na aniitia
kõrgẽna cĩ loociowu,
kebeleci na aniitia tegelua cĩk dĩhĩthẽntak
kõrgẽna cĩ eetu.
4 Nyatarka maka mĩnanĩ cunnie ijiar tammutiddin,
ĩthõng õdõlan thõõth cunnie cĩ athũnnẽ diithiok,
5 Nyekuc cĩnang, adĩhĩthẽ niia tiddina tammuatiddina,
anyĩk bulẽnĩt cunni kedenyiay vatĩkẽy cĩk looc vẽlẽk.
6 Elet niia ageeta attia cunni ĩcĩ athio,
ĩthõng ẽẽla eet wũk amĩnani niia.
7 Õthõõth balna Nyekuci Ciitha cĩnnĩ athĩ ne,
“Nyatarka jiariniet cannĩ,
kengeri katĩ na looc cĩ Thẽkẽmĩ,
ĩthõng katĩmani katĩ na
tolook cĩ Thukothĩ.
8 Ẽẽn lõõcĩ cĩ Giliadĩ cannĩ,
ĩthõng ẽẽn lõõcĩ cĩ Manathi cannĩ.
Aavĩ lõõcĩ cĩ Evraimi kĩ nangaala cannie,
ĩthõng aavu lõõcĩ cĩ Yudaa
kĩ tẽlẽẽĩ cannie cĩ kagamẽ looc.
9 Ẽẽn lõõcĩ cĩ Mõabĩ dũwũc cannĩ cĩ tũnyẽntõ,
ĩthõng katdukeei na caava cĩganĩk looc cĩ Ẽdõmĩ,
ĩthõng kegerenyeha eet cĩk Vilithia jiarintia.”
10 Ngẽnẽ cĩ katĩ okoyyia aneeta
õlõõ cĩ gaalawu cobbi cĩ alũwẽ kõkõm?
Ngẽnẽ cĩ katĩ okoyyia ĩcĩ looc cĩ Ẽdõmĩ?
11 Nyekuc, athii cĩ ẽnnẽ aniitia cĩ adĩmani ketee wo?
Ĩthõng thĩ, ũtũbũret niia ageeta,
ĩthĩnga niia iriokcu kĩ nyĩcẽkẽr cĩgaak jora.
12 Elet niia ageet katamacia mĩrõk cĩgaak,
nyatarka elinti cĩ eeto ẽẽn gii cĩ kaganoko.
13 Kamũdana katĩ naaga tiirthẽt ĩcĩ Nyekuco,
ĩthõng katĩ aath nẽ mĩrõk cĩgaac.