Tẽgẽl 105
1 Entek niigia Makayyioit ne, ibalallẽ,
ĩthõng utuvuyyu thar cĩgĩnĩk,
uduktiak niigia loociok vẽlẽk
thoothonniok cĩk balna ĩdĩman nẽnẽ.
2 Ebelliek niigia ĩnõõnõ dĩhĩthẽnĩt,
uduktia tiicanẽ cĩgĩnĩk vẽlẽk cĩk anaat eeta.
3 Ubuluthit niigia thar cĩgĩnĩk cĩk dĩhĩmĩk,
ebelbelit thinneti cĩk eet cĩk ẽrẽpan Makayyioit.
4 Ẽrẽpanit niigia Makayyioit kĩ tiirthẽt cĩnnĩ,
idiimit nguum cĩnnĩ dõõkĩthĩ.
5 Ahaddia niigia thoothonniok cĩk anaat eeta
wũk balna atican nẽnẽ,
thoothonniok wũk balna anaat eeta,
kĩ thoothonniok wũk balna ẽngẽr nẽnẽ.
6 Niigia doolia cĩk Abrahamĩ ticciannioit cĩnnĩ,
niigia doolia cĩk Yokobo wũk balna ẽbẽra nẽnẽ.
7 Ẽẽn Makayyioiti Nyekuc cĩnac,
edenyiay gõõl cĩ ẽtẽẽdĩ nẽ thoothonniok looc vẽlẽk.
8 Athũnnĩ nẽ ngẽrẽmngẽrẽm cĩnnĩ kũdũt,
ahada nẽ thõõth wũ balna aduwa nẽ
dõõlẽnĩy cĩk katĩ ngaanĩ arittiay
erkinyiay ĩcĩk ẽẽn vucciaknya kĩ vucciaknya.
9 Ngẽrẽmngẽrẽm wũ balna adak nẽ kĩ Abraham coo,
kĩ kõngan wũ balna õkõnganei nẽ Aĩthak.
10 Aduwaai balna nẽ kõngan cĩnnĩ Yokobo kĩĩ tĩrĩthẽnĩt,
ĩthõng uduwak nẽ eet cĩk Ĩthraĩlĩ
ngẽrẽmngẽrẽm cĩnnĩ cĩ alna kũdũt.
11 Athĩ nẽ ne, “Kaanyung katĩ na agiitia looc cĩ Kananĩ
kĩĩ looc cĩ katĩ abarĩccu niigia.”
12 Aduwa balna nẽ thõõth coo
baa ngaanĩ dĩcẽ nẽẽgẽ õrrõt kebintia,
ĩthõng ĩĩtõ cĩk kĩrẽẽng looca nĩĩcẽ,
13 ivitia balna uluugitõ nẽẽgẽ
õvvõ looca ĩmmanĩ kĩ looca ĩmmanĩ,
ithiananĩ kabicoca ĩmmanĩ
kuumuc kõdõlanit ĩmma.
14 Ĩcaac balna nẽ eet õõgĩ ngatĩ ĩtdanyĩ ĩnõõgõ,
ĩthõng egerenyeei balna nẽ alaanẽt, nyatarka ĩnõõgõ.
15 Aduwaai balna nẽ ĩnõõgõ ethei ne,
“Nyĩ awumnyu eet cĩganĩk cĩk balna kẽbẽra na,
kõdẽ arukcu eet cĩganĩk
cĩk õthõõth molook cĩ Nyekuco.”
16 Ayaha balna nẽ butuny kagam looc cĩ Kananĩ,
ĩthõng ẽgẽrẽthan goolliok cĩk akuni dainti cĩnĩng,
17 ĩthõng ition et cĩ athĩ Yothẽbõa kutuwanẽẽĩ ĩnõõgõ,
cĩ balna ũũtẽnẽ gotoonogua cĩgĩnnẽk, kĩĩ nyakapanait Ijiba.
18 Anyi balna nẽẽgẽ ĩnõõnõ kĩpĩra gõõla
cĩ aarĩcẽ ngarikonya thoonĩy cĩgĩnĩk,
ĩthõng itihimtẽẽĩ thĩĩk inyiawa cĩnnĩ,
19 kuumuc gii ngĩ ikiyyia thõõth wũ balna aduwa Makayyioiti kĩĩ dĩdĩ,
kuumuc kikiyyia thõõth wũ balna aduwa nẽ kĩĩ dĩdĩ.
20 Ma natẽ, ũtũvvũwa balna alaanĩ cĩ Ijibi Yothẽbõ,
ĩthõng õõga ĩnõõnõ kĩjana, kũũk nẽ jurrung.
21 Ma natẽ, ikiyyia balna arĩk alaanĩ ĩnõõnõ kĩĩ makayyioit cĩ ciith cĩnnĩ,
makayyioit cĩ kaal vẽlẽk cĩk ayak alaanĩ,
22 kĩĩ katĩ koccia killiman Yothẽbõ
gaala cĩk alaanak kĩcĩ adiim nẽnẽ,
ĩthõng ilimanek nẽ gẽẽnyĩth
makayyiok cĩk alaanak.
23 Ngaatĩ iithiowĩ balna Ĩthraĩlĩb looc cĩ Ijibi,
ũũk abaak Yokobĩ kĩ eeti cĩ rẽẽng looca cĩ Hamĩ.c
24 Ma natẽ, ikiyyia balna aanyĩk Makayyioiti
eet cĩgĩnĩk, kayait dõõlĩ cĩk meelĩk,
aanyĩk balna nẽ ĩnõõgõ kĩĩtõ mẽẽlĩ õrrõt,
kijiaritõ mĩrõk cĩgĩk,
25 ũtũwũ balna nẽ thinneti cĩk mĩrõk cĩgĩk
kakattia eet cĩgĩnĩk,
kutukwuanit nẽẽgẽ thõõth cĩ gerthe
cĩ adĩmaneei ticcianniok cĩgĩnĩk.
26 Ngaatĩ balna itionĩ nẽ ticciannioit cĩnnĩ Mutha,
kĩ Aarõn wũk balna ẽbẽra nẽnẽ.
27 Ma natẽ, õõt balna nẽẽgẽ iticanit thoothonniok
cĩk anaat eetad kõrgẽna cĩnĩng looca cĩ Hamĩ.
28 Ma natẽ, ikiyyia balna itiona Nyekuci muwur
kaanyĩk looc cĩ Ijibi kĩĩ muwur,
nyatarka athii balna nẽẽgẽ cĩ athĩrar thõõth cĩnnĩ,
kũtũngtek eet cĩgĩnĩk kõõt.
29 Ũtũwũ balna nẽ maam cĩgĩk kĩĩtõ biyyie,
ĩthõng anyĩk kulugua cĩgĩk kadaaitõ.
30 Ivitia balna ĩbbĩtĩt nyarũdẽta looc cĩnĩng,
keteeitõ ciithi cĩk gaala cĩgĩk buu.
31 Õthõõth balna nẽ, ĩthõng ivitia kĩrõnga cĩk meelĩk õrrõt,
kĩ vĩĩny cĩk akuuwa looc cĩ Ijibi tũrũr.
32 Ũũwũ balna nẽ tammu cĩnĩng kĩĩ tẽllẽẽn cĩk tammuak,
ĩthõng abadek tammu tũkũlõn looc cĩ Ijibi vẽlẽk.
33 Aduul balna Nyekuci kẽẽn cĩgĩk cĩk vĩnõwak kĩ mũũnĩ,
ĩthõng uduul kẽẽn cĩk looc cĩnĩng.
34 Õthõõth balna nẽ, ĩthõng itigiriyiay girroca
cĩk athii woccia cĩ kẽkẽbĩ,
35 ivitia balna igiiryia girroca kaal cĩk cũlaĩk vẽlẽk
looca cĩnĩng kithiicõ,
ĩthõng edecciak nẽẽgẽ labĩ cĩk looc cĩnĩng
buu kithiicõ.
36 Ngaatĩ arui balna nẽ abuuẽt cĩk maacĩk vẽlẽk
looca cĩ Ijibi kithiicõ, abuuẽt cĩk eet cĩgĩk vẽlẽk.
37 Ikiyyia balna uluuguaĩ nẽ eet cĩk Ĩthraĩlĩ,
kõdõngta thiihit cĩ athĩ kathalkathal kĩ daab,
ĩthõng kõrgẽna cĩ tatũgẽt cĩgĩk, tiirti eeta vẽlẽk.
38 Ẽbẽlbẽl balna eeta cĩk Ijibi balna ngĩ õõt nẽẽgẽ,
nyatarka balna ikiyyiak ĩnõõgõ
tongolinti cobbi cĩ eet cĩk Ĩthraĩlĩ.
39 Abung balna nẽ ĩnõõgõ diitha,
ĩthõng aanyĩk nẽ guo kũtũkũl ĩnõõgõ baal.
40 Ajin balna nẽẽgẽ ĩnõõnõ kiding,
ngaatĩ anyĩcẽ nẽ ĩnõõgõ natẽdẽẽnya,e
ĩthõng aanyĩk ĩnõõgõ kĩccacõ ahat
cĩ aku tammuatiddina.
41 Uuk balna nẽ laarab,f ngaatĩ arihanĩ maama õrrõt ngatĩvõrĩ,
ĩthõng irik kĩ lĩĩlĩ baatha ĩcĩ õdõõĩ kak.
42 Nyatarka balna ahada nẽ thõõth
wũ balna aduwaai nẽ ticciannioit cĩnnĩ Abraham.
43 Aluuguanẽ balna nẽ eet cĩgĩnĩk talintia
aluuguanẽ eet cĩk ẽbẽra nẽ calcallõna cĩ talintio.
44 Ikiyyia balna aanyĩk nẽ ĩnõõgõ looc cĩ eet õõgĩ,
ĩthõng abarĩcĩt manẽẽn cĩgĩk,
45 kĩĩ katĩ woccia kowobit eeta cĩgĩnnẽk liman cĩnnĩ,
ĩthõng uthuutti ngirantiok cĩgĩnĩk.
Ĩdĩhĩthĩt niigia Makayyioit!