Tẽgẽl 104
1 Thĩnĩn cannie, dĩhĩth Makayyioit.
Makayyioit Nyekuc cannĩ, eeni niia maka õrrõt,
acĩn eeta vẽlẽk makathĩt cunni kĩ bulẽnĩt cunni.
2 Ahimit Nyekuci lanyĩt kĩ cẽrẽma,
ẽvẽtĩ nẽ tammutiddin kĩ cẽrẽma,
3 ĩthõng ẽtẽngẽny ciith cĩnnĩ lomolorẽtẽy diithiowẽy.
Anyi nẽ diithiok kĩĩtõ toromilie cĩnnĩ cĩ agurrie,
ĩthõng amacuc ngõõta cĩ ngooto.
4 Anyi nẽ ngoottiok kĩĩtõ tionniak cĩgĩnĩk,
ĩthõng anyĩk lanyĩtua cĩk guyyiak kĩĩ ticcianniok cĩgĩnĩk.
5 Ẽngẽnyca balna nẽ looc kõkõm ngatĩnnĩ,
athii katĩ cĩ õmmõnnĩ eeti ĩmma.
6 Umutu balna niia looc bulucuanĩy kĩ cẽrẽma,
ĩthõng balna ũmmũtĩt maama thiiryiok.
7 Ĩthõng thĩ, balna ngĩ ẽgẽrẽny moloowĩ cunnie
irihit maama õõt tua,
balna ngĩ icciayyi tammu cunnie,
irihit maama õõt tua.
8 Ivitia balna irihit nẽẽgẽ uluccie thiiryiowẽy
õõt iriktothĩk toloowua,
kõõt nginiwa wũ
balna ẽngẽnycẽcẽ niia ĩnõõgõ.
9 Aari balna niia lõkõrẽ cĩ woccia athũnnĩ nẽ maam,
kithii cĩ akuu katĩ nẽẽgẽ looc naboo.
10 Anyi Nyekuci kẽbẽrẽ cĩk duwwenu
kirihit kõõt toloowuanĩy,
ĩthõng iriktia duwwẽna
kõrgẽna ĩcĩ thiiryiowu.
11 Anyi nẽẽgẽ maam kẽlẽgẽ cĩk bõõnak natẽ,
awũd nyetikonya cĩk bõõnak maam natẽ.
12 Ẽngẽnyẽt kĩballĩ ciithi cĩgĩk kẽẽnĩy cĩk obokci kĩ lilliok,
ĩthõng ebelliõy taliibanẽ cĩk keenu.
13 Itiona nẽ maam tammuatiddina kõdõlanit thiiryiok,
ĩcaa lõõcĩ nyẽgẽra cĩ tiic cĩnnĩ.
14 Anyĩk nẽ kartienit kĩtĩlĩth, kĩĩ cĩ tiinu,
kĩ dainit cĩ aduk eeta,
anyĩk nẽ ĩnõõgõ kẽvta dainit tõdõway,
15 ĩthõng anyĩk nẽ vĩnõ kaanyĩk thĩnĩn cĩ eeto katal,
kĩ ngooroc cĩ avuudi eeti nguum cĩnnĩ kĩtĩltĩl,
kĩ dainit cĩ anyi ĩnõõnõ tiirthẽt.
16 Akatĩ Makayyioiti kẽẽn, ĩthõng anyĩk maam,
akatĩ nẽ kẽẽn cĩk obbitik cĩk Lẽbanõnĩ,
17 ẽngẽnyẽt kĩballĩ ciithi cĩgĩk natẽ,
ĩthõng etengenyit lõpẽlẽnya ciithi cĩgĩk kẽẽnĩy.
18 Aatĩ mĩtdĩrrĩngẽ thiiryiowẽy cĩk wuuntik,
ĩthõng ulugunycie kõyõwõtẽ naarabẽtẽy cĩk ẽẽn thilẽn.
19 Ẽngẽnyca balna nẽ nyĩĩlok kẽyẽla itin cĩ tammuo kĩ cĩ õdõõngnĩ lõõcĩ,
ĩthõng aga kõr itin cĩ okolothĩcẽ.
20 Ẽngẽnyca balna nẽ baalin,
ĩthõng ẽtẽẽkta kẽlẽgẽ cĩk bõõnak vẽlẽk muwuratõ.
21 Õrõĩ maata katĩ ngĩ alĩhẽ thõng,
adiim dainit cĩ anyi Nyekuci.
22 Mĩ iliba kõr, imiiryie
õõt ataguuthõ tabanwuanĩy cĩgĩk.
23 Ĩthõng thĩ, õõt iticanit eeta tiicanẽ cĩgĩk
kuumuc kokolothĩk kõrra.
24 Makayyioit, ĩthĩ tiicanẽ cugunniek mẽẽlĩ,
ẽngẽnyca balna niia ĩnõõgõ vẽlẽk gẽẽnyĩtha cunni,
abbĩththĩ lõõcĩ kaal vẽlẽk cĩk arũgĩ cĩk balna ẽngẽnyca niia.
25 Maka bũlũc õrrõt kũdũt,
abbĩththĩ bũlũc kaala cĩk arũgĩ,
cĩk kĩdĩk kĩ cĩk obbitik.
26 Ĩthõng bũlũca nĩĩcẽ, õwõ kõvõwõlẽta õrrõt,
ĩthõng otothoyyie kulugua cĩk obbitik õrrõt,
wũk balna ẽngẽnyca niia ĩnõõgõ.
27 Ẽrẽppanni nẽẽgẽ vẽlẽk aniitia,
kĩĩ katĩ anyĩk niia dainit cĩnĩng
itina cĩ adiimi nẽẽgẽ.
28 Mĩ anyi niia ĩnõõgõ dainit, adak nẽẽgẽ,
mĩ õõ athĩn cugunik,
arũba nẽẽgẽ kaal cĩk abũnna.
29 Ĩthõng thĩ kẽnnẽ, mĩ alugunyi niia nguum cunni,
abarrit kẽnnẽ nẽẽgẽ,
mĩ adimi niia tivongi cĩnĩng ngatĩvõrĩ,
adaaĩ nẽẽgẽ, ĩthõng imiiryie õõt tõdõway.
30 Mĩ itiona niia Ririwac cunni,
avvu engenyciay nẽẽgẽ,
ĩthõng anyi niia kaal cĩk arũgĩ
kĩĩtõ jõr looca naboo.
31 Aavĩ woccia bulẽnĩtĩ cĩ Makayyiokto kũdũt,
ẽbẽlbẽl woccia Makayyioiti kaalĩy
ĩcĩk ẽtẽngẽnya balna nẽnẽ,
32 acĩn nẽ looc, ĩthõng abarrit lõõcĩ,
ĩnõõnõ cĩ awum thiiryiok,
ĩthõng uburutit nẽẽgẽ.
33 Kebelei katĩ na Makayyioit tegelua
rũgẽta cannĩ vẽlẽk,
kebelei katĩ na Nyekuc cannĩ
dĩhĩthẽnĩt nga karugi.
34 Anyĩk woccia muwẽẽnĩtĩ cannie ĩnõõnõ talinit,
kĩcĩ katali na kĩ Makayyioit.
35 Ĩthõng thĩ, kẽnnẽ ithiicõ woccia gẽrẽthanniowa
loota ngato vẽlẽk.
Ithiicõ woccia eeta cĩk gerthek kũdũt.
Thĩnĩn cannie, dĩhĩth Makayyioit.
Dĩhĩth Makayyioit.