Tẽgẽl 103
Tẽgẽl cĩ Davide.
1 Thĩnĩn cannie, dĩhĩth Makayyioit,
adĩhĩth katĩ thĩnĩn cannie vẽlẽk thar cĩgĩnĩk cĩk dĩhĩmĩk.
2 Thĩnĩn cannie, dĩhĩth niia Makayyioit,
ĩthõng nyĩ anyi gatan cĩnnĩ kerehei aniitia.
3 Nyekuc cĩ uungni gerthetin cannĩ vẽlẽk,
ĩthõng anyi moorithiok cĩganĩk vẽlẽk kũbũnta,
4 ĩnõõnõ cĩ ẽẽla rũgẽt cannĩ daaĩtha,
ĩthõng anya aneeta mĩnan cĩnnĩ kĩ tamati cĩnnĩ,
5 ĩnõõnõ cĩ anya thoothonniok cĩk abũnna cĩk kabarriteei na,
kĩĩ katĩ kaavu ngĩthõrõkthẽtĩ cannie kĩĩ jõr kĩ thuuti.
6 Atican Makayyioiti tiicanẽ cĩk edeemothi,
ĩthõng ẽngẽr thõõth cĩ eet vẽlẽk
cĩk aatĩ tdanyintia gõõla ĩcĩ edeemothi.
7 Anyi balna nẽ Mutha kagga thoothonniok cĩgĩnĩk,
ĩthõng balna aanyĩk dõõlĩ cĩk Ĩthraĩlĩ kagaacõ tiicanẽ cĩgĩnĩk.
8 Ẽẽn Makayyioiti tamatioit kĩ thimattioit,
cĩ athii cĩ avaracĩth tamanoko, ĩthõng maka mĩnanĩ cĩnnẽ.
9 Athii katĩ cĩ ovolongiet nẽ dõõkĩthĩ,
kõdẽ athũnnĩ varac cĩnnĩ kũdũt,
10 athii cĩ uukcet nẽ ageeta, nyatarka gerthetin cĩnac,
gõõla ĩcĩ thẽk kuukẽnẽ naaga,
kõdẽ athii cĩ etedĩcet ageeta gerthetin cĩnac
gõõla ĩcĩ thẽk adĩmanĩ nẽ.
11 Kĩcĩ wuun tammutiddin kijiar looc,
kĩyokowo buu, maka mĩnanĩ cĩnnẽ kĩ eet cĩk ongollie ĩnõõnõ,
12 kĩcĩ rẽẽn ngĩtĩ alibanĩ kõr kĩ tõõn cĩ okolothĩcẽ,
kĩyokowẽ buu, ĩdĩm balna nẽ gerthetin cĩnac
kĩĩtõ rẽẽntĩ kĩ ageeta.
13 Kĩcĩ amanni baatĩnnẽ dõõlĩ cĩgĩnĩk,
kĩyokowo buu, amanni Makayyioiti buu
eet cĩk ongollie ĩnõõnõ,
14 nyatarka aga nẽ gõõl cĩ kengenycianĩ naaga,
ahadanet nẽ ageeta ngatĩ keeginnie tuduwac dõ.
15 Ĩthõng thĩ, kĩ et aatĩ wathinniowa cĩgĩnnẽk kĩ kartienti,
alĩthĩ nẽ tamanoko kĩ vurẽẽna,
16 abũ ngõõtĩ ĩnõõnõ, ngaatĩ athiinni
kithii eeti cĩ woccia ahada ĩnõõnõ naboo tõõ.
17 Ĩthõng thĩ, kẽnnẽ alna mĩnanĩ cĩ Makayyiokto kũdũt
eetĩnẽy ĩcĩk ayak tongolinit kĩ ĩnõõnõ,
ĩthõng alna bũnnathĩtĩ cĩnnẽ kĩ dõõlĩ cĩk dõõlĩ cĩgĩk kũdũt,
18 eetĩnẽy ĩcĩk athũnnĩ ngẽrẽmngẽrẽm cĩnnĩ,
ĩthõng ĩthĩhĩt liman cĩnnĩ.
19 Aari balna Makayyioiti taaba cĩnnĩ cobbi tammuatiddina,
ẽẽn nẽ Alaan cĩ agam kaal vẽlẽk.
20 Ĩdĩhĩthĩt Makayyioit, niigia anjĩlẽta cĩgĩnnẽk,
niigia cĩk athĩknu tĩrĩthẽnĩt cĩnnĩ,
niigia cĩk athĩknu thõõth cĩ aduwa nẽnẽ.
21 Ĩdĩhĩthĩt Makayyioit,
niigia anjĩlẽta cĩk ẽẽn nyĩcẽkẽr cĩgĩnĩk,
cĩk aticanothicu ĩnõõnõ,
ĩthõng ĩdĩmantu diimẽnẽt cĩnnĩ.
22 Ĩdĩhĩthĩt Makayyioit,
kaala cĩk ẽngẽnyca nẽ vẽlẽk,
loociowẽy vẽlẽk ĩcĩk agam nẽnẽ.
Ririwacĩ cannie, dĩhĩth Makayyioit.