Tẽgẽl 102
Lawinit cĩ et cĩ apĩrna, katĩ ngĩ aduwaai nẽ canan cĩnnĩ Makayyioit.
1 Makayyioit, thĩk lawinit cannĩ,
anyĩk niia ulua cannĩ cĩ elianto, kikiyyia kĩ aniitia.
2 Nyĩ alugunyi niia nguum cunni ĩcannĩ,
katĩ ngĩ kapĩrna nana.
Thĩrara niia aneeta kĩtata cunni,
katĩ ngĩ kavuyyina, ĩthõng ẽdẽca tamanoko.
3 Nyatarka ithiicõ wathinniowa cĩganniek kĩ burruti.
Atũũthĩ ammẽ cĩganniek kaavutõ
kĩ thõlõmõ cĩk aaburi patdahac.
4 Ĩmmõrĩ thĩnĩn cannie, ĩthõng kaavu kĩ kartienti cĩ õdõõĩ,
ereheha ngatĩ kadaẽ dainit cannĩ buu.
5 Nyatarka tuluwi cannĩ moloowa cobbi,
kõdõngkõrẽ na kaganoko.
6 Kaavẽ na kĩ kũrrũũk cĩ baath cĩ õdõõĩ kak,
kaavẽ kĩ ngumngumu cĩ aavĩ ciitha ĩcĩ õyõwẽ.
7 Koongi na, ĩthõng kacĩnẽ, kikiyyia kaavu
kĩ kĩballĩcĩ cĩ aavĩ nẽdõ ciitha tiddina.
8 Adaacca aneeta mĩrõwa cĩganniek waathĩn vẽlẽk,
ĩthõng abũũng thar cĩganĩk katĩ ngĩ acĩĩnĩ.
9 Dĩdĩ katũkani na tithet kĩĩ dainit cannĩ,
ĩthõng kõngõtana tulalõ kĩ maam cĩganĩk,
10 nyatarka varac cunni cobbi,
õdõnga balna niia aneeta jiena,
ĩthõng utdukea kabanyca.
11 Aatĩ wathinniowa cĩganniek kĩ rieta cĩk jiatinu,
kodooi na kĩ kartienti kaganoko.
12 Ĩthõng thĩ, niia Makayyioit,
aavẽ niia taabawa cunni kũdũt,
alna bulẽnĩtĩ cunnie eetĩnẽy cĩk yoko,
kĩ cĩk kõr ĩmma.
13 Tĩnga jiena, ĩthõng atamatiwu eet cĩk Thionĩ,
nyatarka arawak kõr cĩ katĩ ẽẽlẽ niia ĩnõõgõ,
ikiyyia itini.
14 Amĩnan ticcianniowa cugunniek bĩĩyẽn cĩgĩnĩk,
katĩ ngĩ acĩn nẽẽgẽ ngatĩ oyowini balna Thionĩ,
utuluthõ nẽẽgẽ, nyatarka ĩnõõnõ.
15 Ongollie katĩ loociowa thar cĩk Makayyioktak,
ongollie katĩ alaanẽta cĩk loocu bulẽnĩt cĩnnĩ.
16 Nyatarka ẽngẽnyẽt katĩ Makayyioiti Thion naboo,a
ĩthõng ẽyẽla katĩ nẽ bulẽnĩt cĩnnĩ.
17 Athĩrar katĩ nẽ lawinit cĩ eet cĩgĩnĩk
cĩk kothii gii cĩ ayaĩ,
ĩthõng athii katĩ cĩ abũrĩ nẽ ulua cĩnĩng.
18 Anyĩk thẽk keteheddie thoothonniowa cĩkkõ loota,
kĩĩ katĩ kĩdĩhĩthĩt woccia eeta
cĩk ngaanĩ kittiryiay Makayyioit.
19 “Ẽdẽnya balna Makayyioiti looc
Ciitha cĩnnĩ tammuatiddina,
ẽdẽnya nẽ tammuatiddina looc loota,
20 kĩĩ katĩ kĩthĩrar nẽ ulua cĩ eet cĩk aatĩ kĩjana,
ĩthõng õõga nẽ eet cĩk balna eteedi eeta ĩnõõgõ daaĩth.”
21 Ĩthõng thĩ, katĩ uduktiay thara cĩk Makayyioktak Thiona,
ĩthõng katĩ ubuluthit eeta ĩnõõnõ Yeruthalẽma,
22 katĩ ngĩ alũtẽ eeta cĩk loociowu kĩ kabicõnĩnẽ natẽ,
ĩthõng alaacõ Makayyioit.
23 Ĩdĩm balna nẽ tiirthẽt cannĩ kõrgẽna cĩ rũgẽt cannĩ,
ĩthõng aanyĩk nẽ rũgẽt cannĩ kĩĩ tura.
24 Ĩthõng balna kĩthĩ ne,
“Nyekuc, nyĩ okoyyia niia yoko, ngaanĩ katanganyũ.
Arugi katĩ niia kĩ eet cĩk katĩ ngaanĩ avvu kũdũt.
25 Ẽngẽnyca balna niia looc baa lõõla,b
ĩthõng ẽngẽnyca tammutiddin athĩnẽy cugunik.
26 Athii katĩ nẽẽgẽ, ĩthõng thĩ kẽnnẽ, alna niia kũdũt,
edecciay katĩ nẽẽgẽ kĩ ceremuana kaganoko.
Ũũwũ katĩ niia ĩnõõgõ kĩ ceremuana,
kĩĩ katĩ kithiicõ kũdũt.
27 Ĩthõng thĩ, alna katĩ niia kĩyokowẽ noko,
ĩthõng athii katĩ erkinya cugunniek cĩ edeciay kũdũt.
28 Aatĩ katĩ doolia cĩk ticcianniok cugunik nguuma cunni.
Abaak thẽk katĩ doolia cĩk dõõlĩ cĩgĩk nguuma cunni.”