Tẽgẽl 101
Tẽgẽl cĩ Davide.
1 Makayyioit, kebeli katĩ na mĩnan cunni
kĩ ngatĩ ẽtẽẽdẽ niia thõõth gõõla cĩ edeemothi,
kebeleci katĩ na aniitia dĩhĩthẽnĩt.
2 Kathũnnẽ katĩ na rũgẽt cannĩ kõwõb thõõth cĩ edeemothi.
Akuni katĩ niia kĩ aneeta katĩngan?
Kaavẽ katĩ na ciitha cannĩ,
thĩnĩna cĩ callĩ.
3 Kaburi katĩ na ngatĩ kacĩnẽ kẽbẽrẽnĩy cĩganĩk
gimma cĩ gerthe.
Kakanna na tiicanẽ cĩk eet cĩk athii cĩ athũnnĩ thõõth cĩnĩng,
kaburi katĩ na ĩnõõgõ.
4 Attĩyya katĩ eeta cĩk gerthek thinneti cĩgĩk rẽẽna kĩ aneeta,
athii katĩ cĩ kadĩmani na thõõth cĩ gerthe.
5 Eeti cĩ eyewothi kirirẽn gõõnĩ cĩ abakanõy labak,
kẽnyẽhẽ katĩ na ĩnõõnõ ngatĩvõrĩ,
athii katĩ cĩ komogi na et
cĩ ẽngẽrẽn thĩnĩn cĩnnẽ.
6 Acĩn katĩ kẽbẽrẽ cĩganniek eet
cĩk athũnnĩ thõõth cĩnĩng looca,
kĩĩ katĩ kũrũmtea kĩ aneeta,
eeti cĩ athii gerthetini tõõ,
atĩrĩtha katĩ nẽ aneeta.
7 Eeti cĩ alna aduwa volongnyiok,
athii katĩ cĩ aavĩ ciitha cannĩ,
ĩthõng eeti cĩ ĩgõõl eet,
athii katĩ cĩ aavĩ ngatĩ kaavẽ na.
8 Ngerethietĩn vẽlẽk kabĩlnẽ katĩ na eet
cĩk gerthek vẽlẽk looca,
kẽnyẽhẽ katĩ na eet cĩk gerthek
õlõõ ĩcĩ gaalawu cĩ Makayyiokto.