Tẽgẽl 106
1 Ĩdĩhĩthĩt niigia Makayyioit.
Entek Makayyioit ne,
ibalallẽ, nyatarka abũnna nẽnẽ,
alna mĩnanĩ cĩnnẽ kũdũt.
2 Ngẽnẽ cĩ woccia aduwa thoothonniok cĩk anaat eeta,
cĩk balna ĩdĩman Makayyioiti,
kõdẽ ngẽnẽ woccia cĩ adĩhĩth ĩnõõnõ jurrung?
3 Agatanni eeta cĩk adĩman bũnnathĩt kĩ eet õõgĩ,
kĩ cĩk atican thoothonniok cĩk edeemothi dõõkĩthĩ.
4 Makayyioit, hadaha aneeta katĩ ngĩ eelu eet cugunik,
rũmeha aneeta kĩ ĩnõõgõ, katĩ ngĩ eelu ĩnõõgõ,
5 kĩĩ katĩ woccia kothollia balinit cĩ eet cugunik cĩk eberyiay,
ĩthõng woccia kothollia talinit cĩ eet cugunik,
ĩthõng kothollia kĩ dõõlĩ cugunik ngatĩ kadihithi aniitia.
6 Kẽgẽrẽthantõwa balna naaga
kĩ balna õõ baatĩ baatĩ baangietĩ cĩgaak,
kĩdĩmanta balna naaga kaal cĩk gerthek,
ĩthõng kiittia gẽrthẽ naaga.
7 Balna ngĩ aatĩ õõ baatĩ baatĩ baangietĩ cĩgaak Ijiba,
athii balna cĩ amuk nẽẽgẽ
ngatĩ tiirti tiicanẽ cĩk anaat eeta,
wũk balna aticani niia,
erektek balna ĩnõõgõ thimatĩthĩ cunnie,
wũ balna eyeleei niia ĩnõõgõ ngõnana ĩcĩk meelĩk,
ĩthõng utuburyi nẽẽgẽ aniitia Bũlũca cĩ Merihi.
8 Ẽẽla balna nẽnnẽ Nyekuci ĩnõõgõ, nyatarka thar cĩgĩnĩk,
kĩĩ katĩ keyelek eet vẽlẽk tiirthẽt cĩnnĩ.
9 Egerenyeei balna nẽ Bũlũc cĩ Merihi, ĩthõng õdõõwa,
õkõyyĩ balna nẽ eet cĩgĩnĩk kabaaktẽ bũlũc tõdõway cĩk õdõõĩ.
10 Ẽẽla balna nẽ ĩnõõgõ eetĩnẽy cĩk aaburneei ĩnõõgõ,
ĩthõng ẽẽla ĩnõõgõ mĩrõwẽy cĩgĩk.
11 Ĩthõng kẽnnẽ ũtũdũdĩt balna maama mĩrõk cĩgĩk,a
kithii codoi cĩnĩng cĩ arũgĩ kũdũt.
12 Ngaatĩ balna ẽlẽmĩ eeta cĩgĩnnẽk thoothonniok wũk balna aduwa nẽnẽ,
ĩthõng ebelliek nẽẽgẽ ĩnõõnõ tegelua cĩk dĩhĩthẽntak.
13 Ĩthõng thĩ, avvu balna nẽẽgẽ kẽggẽ erehei thoothonniowa
wũk balna adĩman nẽ tamanoko,
ĩthõng ngaanĩ kẽrẽcõ nẽẽgẽ tukwuan cĩnnĩ.
14 Ivitia balna ĩĩtõ nẽẽgẽ lavlavyiak cĩk daintiak baatha cĩ õdõõĩ kak,
ĩthõng ĩtĩmanit nẽẽgẽ Nyekuc.
15 Ngaatĩ balna anyĩcẽ nẽ ĩnõõgõ kaal cĩk adiim nẽẽgẽ,
ĩthõng thĩ, itionak ĩnõõgõ thẽrẽt cĩ gerthe wak kõrgẽna cĩnĩng.
16 Abarriteei balna eeta gwuak tiic cĩ Mutha baatha cĩ õdõõĩ kak
kĩ tiic cĩ Aarõnĩ, cĩ balna anyi Makayyioiti ĩnõõnõ kĩĩ paadĩr.
17 Ngaatĩ balna owine lõõcĩ, ĩthõng ukku Dathan,b
ĩthõng ũmmũt Abiram kĩ kõrõõk cĩnnĩ vẽlẽk.
18 Atũũth balna gua eet cĩk gerthek
cĩk balna õwõb ĩnõõgõ wo.
19 Adĩmana balna nẽẽgẽ moolet cĩ ẽẽn daabc looca cĩ Horebi,
ĩthõng alaacõ ĩnõõnõ.
20 Atalõnẽ balna nẽẽgẽ bulẽnĩt cĩ Nyekuco,
nyatarka ririwac cĩ ole cĩ ẽggẽ kartienit.
21 Ivitia balna nẽẽgẽ erektek Nyekuc wũ balna ẽẽla ĩnõõgõ,
wũ adĩman thoothonniok cĩk anaat eeta Ijiba.
22 Adĩman balna nẽ thoothonniok cĩk anaat eeta looca cĩ Hamĩ
kĩ tiic cobbi Bũlũca cĩ Merihi.
23 Athĩ balna nẽ ne, aruk woccia nẽ ĩnõõgõ,
ĩthõng thĩ, Mutha et wũ balna ẽbẽra nẽ,
ala nẽ Nyekuc kĩbĩlĩ varac cĩnnĩ,
kĩĩ katĩ athii cĩ aruk ĩnõõgõ.
24 Ma natẽ, ũtũbũrĩt balna nẽẽgẽ looc cĩ abũnna,
wũ balna athii cĩ ẽlẽmĩ nẽẽgẽ thõõth cĩnnĩ.
25 Õngõngõ balna nẽẽgẽ tugguẽtẽy cĩgĩk,
ĩthõng ũtũbũrĩt thõõth cĩ Makayyiokto.
26 Ngaatĩ abũtaneei nẽ ĩnõõgõ kõngan cĩ athĩ ne,
adaaĩ woccia nẽẽgẽ bõõnatõ cĩ õdõõĩ kak kithiicõ,
27 ĩthõng athaan woccia nẽ dõõlĩ cĩgĩk
loociowẽy cĩk eet cĩk kĩrẽẽng,
anyĩk ĩnõõgõ kadaaitõ nĩĩcẽ
loociowẽy cĩk eet cĩk kĩrẽẽng.
28 Ala balna nẽẽgẽ nyekuc cĩ ẽẽn võlõng
cĩ athĩ Bal cĩ Peori,d
ĩthõng adait balna kaal cĩk cavawu
cĩk anyĩwothi nyekucnya cĩk athii cĩ arũgĩ.
29 Anyi balna nẽẽgẽ Makayyioit kavarac,
gerthetina cĩ atican nẽẽgẽ wo,
ngaatĩ ĩngannĩ thẽrẽt ĩmma kõrgẽna cĩnĩng.
30 Ĩbĩl balna nẽnnẽ eeti cĩ athĩ Vinehath,e
ĩthõng ẽẽl eet, kĩĩ katĩ kĩbĩl thẽrẽta.
31 Nyatarka balna thõõth cĩ adĩman nẽ,
ẽlẽm Nyekuci ĩnõõnõ kĩĩ et cĩ abũnna,
wathinniowẽy nĩĩkẽ kũdũt.
32 Anyi balna eeta Makayyioit kavarac
maamĩy cĩk Meriba,f
ĩthõng ikiyyiak balna gerthetini Mutha,
nyatarka thõõth cĩnĩng.
33 Ĩthõng aanycĩk balna nẽẽgẽ Mutha kavarac,
ĩthõng õthõõth nẽ giithiawun.
34 Athii balna cĩ aruk nẽẽgẽ eet cĩk Kananĩ,
kĩ balna ngĩ aduwaai Makayyioiti ĩnõõgõ,
35 ĩthõng thĩ, õngõtanõy balna nẽẽgẽ kẽnnẽ kĩ eet nĩĩkẽ,
ĩthõng elemit vowothnya cĩgĩk.
36 Ivitia balna nẽẽgẽ alaacõ nyekucnya cĩgĩk,
ngaatĩ avvunni balna nyekucnya cĩkkõ
ẽnnẽ detinit kĩ ĩnõõgõ.
37 Ivitia aanycĩk dõõlĩ cĩgĩk kĩĩtõ kaal cĩk cavawu
cĩk nyekucnyawu cĩk athii cĩ ẽẽn dĩdĩ.
38 Aruk balna nẽẽgẽ dõõlĩ cĩk amĩrĩ wo,
dõõlĩ cĩgĩk cĩk maacĩk kĩ cĩk ngayyik,
cĩk anyi balna nẽẽgẽ ĩnõõgõ kĩĩtõ kaal cĩk cavawu
cĩk nyekucnya cĩk Kananĩ,
ĩthõng ẽgẽrẽthanẽ lõõcĩ
biyyietĩy cĩk dõõlĩ cĩgĩk.
39 Ivitia balna ẽgẽrẽthanit nẽẽgẽ eleeti cĩgĩk
thoothiowẽy cĩk adĩman nẽẽgẽ,
ẽẽn balna mĩnanĩ cĩnĩng cĩ nyekucnya cĩk kĩrẽẽng,
ĩthõng anyi ĩnõõgõ kũtũbũrĩt Makayyioit.
40 Ngaatĩ thĩ avaracĩcẽ balna Makayyioiti eet cĩgĩnĩk,
ĩthõng ũtũbũr eet wũk balna ẽbẽra nẽ.
41 Ikiyyia balna ũtũngẽẽĩ nẽ ĩnõõgõ tiirthẽt cĩ loociowu,
ngaatĩ agamĩ mĩrõwa cĩgĩk ĩnõõgõ.
42 Ivitia balna ĩtdanyitõ mĩrõwa cĩgĩk ĩnõõgõ,
ĩthõng aanyĩk tiirthẽtĩ cĩ mĩrõk cĩgĩk ĩnõõgõ kipiryia.
43 Ẽẽla balna nẽ eet cĩgĩnĩk ngõnana cĩk meelĩk,
ĩthõng thĩ, kẽnnẽ balna ivitia nẽẽgẽ ũtũbũrĩt ĩnõõnõ,
ĩthõng ẽgẽrẽthanit eleeti cĩgĩk gerthetina.
44 Ĩthõng thĩ, kẽnnẽ balna ikiyyia ĩcĩn nẽ pĩrnanẽt cĩnĩng,
balna ngĩ athĩrar nẽ ĩnõõgõ ngĩ aluei ĩnõõnõ,
45 nyatarka ĩnõõgõ, ahada balna nẽ ngẽrẽmngẽrẽm cĩnnĩ,
ĩthõng ũtũngek nẽ varac cĩnnĩ,
nyatarka mĩnan cĩnnĩ cobbi õrrõt.
46 Ikiyyia balna aanyĩk nẽ mĩrõk cĩgĩk katamatik ĩnõõgõ,
wũk balna agam ĩnõõgõ.
47 Makayyioit Nyekuc cĩnang, elet niia ageeta,
lũtaẽt niia ageeta loociowẽy cĩk rẽẽng,
kĩĩ katĩ woccia kivitiaha naaga kentei ne, ibalallẽ,
ĩthõng kidihithia thar cugunik cĩk dĩhĩmĩk,
ĩthõng kebelbellia kĩĩ kidihiththina.
48 Ĩdĩhĩthĩt niigia Makayyioit Nyekuc cĩ Ĩthraĩlĩ,
ĩdĩhĩthĩt niigia ĩnõõnõ kũdũt.
Anycĩk niigia eet vẽlẽk kĩĩtõ ne, “Amẽn.”
Ĩdĩhĩthĩt niigia Makayyioit.