Tẽgẽl 95
1 Kivitia kebelliek Makayyioit cĩnac
tegelua cĩk ẽmmẽdẽ talintia,
kivitia kĩdĩhĩthĩt Et cĩ ẽẽn
Thiir cĩ elianĩt cĩnac.
2 Kivitia kentek ĩnõõnõ ne, ibalallẽ,
ĩthõng kĩdĩhĩthĩt ĩnõõnõ tegeluanĩy.
3 Nyatarka ẽẽn Makayyioiti Nyekuc cĩ abulie,
Alaan cobbi cĩ Ijiar nyekucnya vẽlẽk.
4 Agam nẽ athĩnẽy cĩgĩnĩk looc loota ngato,
ĩthõng ẽẽn thiiryiowa cĩk wuuntik cĩgĩnĩk.
5 Ẽẽn bũlũc cĩnnĩ, nyatarka balna ẽngẽnyca nẽnẽ,
ĩthõng balna ẽngẽnyca nẽ looc buu.
6 Kivitia thẽk naaga kakatit kuthungti kalaac ĩnõõnõ,
kakatit naaga kuthungti nguuma cĩ Makayyioit
wũ balna ẽngẽnycanet ageeta,
7 ẽẽn nẽ Nyekuc cĩnac,
ĩthõng keegin naaga eet cĩk athunniet nẽnẽ,
keegin naaga athaa cĩk ũũwa nẽ.
Kõr coo, mĩ ithiktu molook cĩnnĩ,
8 nyĩ anyiccu ooti cuguk kokomit,
kĩ balna ngĩ abũrĩ baajigu ĩnõõnõ looca cĩ Meriba,a
kĩ balna ngĩ abũrĩ nẽẽgẽ baatha
cĩ õdõõĩ kak cĩ Maatha,
9 nginiwa wũ balna atĩmania aneeta baajigu,
kõdẽ woyyia balna ngĩ acĩn nẽẽgẽ tiicanẽ cĩganĩk.
10 Kavaracii balna na eet nĩĩkẽ erkinya eet ramma,
kathĩ balna ne, “Ẽẽn nẽẽgẽ eet
cĩk abũrna aneeta thinnetinẽy cĩgĩk,
ĩthõng ngaanĩ kagaacõ goolliok cĩganĩk.”
11 Ngaatĩ balna kabũtanẽ na varacintia cannĩ kathĩ ne,
“Athii katĩ cĩ ẽhẽẽt nẽẽgẽ ngĩtannĩ cĩ yuwuthono kũdũt.”