Tẽgẽl 94
1 Makayyioit, eeni niia Nyekuc, cĩ eteedi thoothonniok,
Nyekuc, tẽẽd niia thoothiok cĩk eetu,
anyĩk bulẽnĩt cunni kedenyiay katalany.
2 Nyekuc, Teedioit, tĩnga jiena, ngẽr thõõth cĩ loocu,
dũman niia eet cĩk irian ukwẽẽnta.
3 Makayyioit, ẽbẽlbẽl katĩ eeta cĩk gerthek kuumuc kĩĩ tĩngan?
Atalĩ nẽẽgẽ ĩĩthõng kĩĩ katĩngan?
4 Õthõõth nẽẽgẽ thoothonniok cĩk ẽngẽrẽnĩ,
ĩthõng eeta vẽlẽk cĩk adĩman thoothonniok cĩk gerthek,
ẽngẽrẽn nẽẽgẽ õrrõt.
5 Makayyioit, aath nẽẽgẽ eet cugunik,
ĩthõng ĩtdanyitõ nẽẽgẽ eet cĩk eberyiay.
6 Aruk nẽẽgẽ ngaay cĩk bõyyĩk
kĩ eet cĩk kĩrẽẽng, kĩ boyyiok buu.
7 Õthõõth nẽẽgẽ athĩ ne,
“Athii cĩ acĩnnet ageeta Makayyioiti.
Athii cĩ athũnnĩ Nyekuci cĩ eet cĩk Yokobo thõõth coo.”
8 Ĩthĩktõy niigia eeta cĩk athii cĩ agayyu thõõth cĩk attiyyu kõrgẽna cĩ eetu,
niigia giithiaha, avvu katĩ egeenyu niigia katĩngan?
9 Ẽngẽnyca balna Nyekuci kĩĩn cĩgaac, athii woccia cĩ athĩknẽ nẽ?
Ẽngẽnyca balna Nyekuci kẽbẽrẽ cĩgaac, ruben woccia nẽ?
10 Uuk nẽ loociok, athii woccia yoko nẽ katĩ
cĩ uukcung agiit buu?
Aliman nẽ thoothonniok vẽlẽk, athii woccia cĩ aga nẽ
thoothonniok cĩk adĩmannu niigia wo?
11 Aga Makayyioiti muwẽẽnĩt cĩ eeto,
ĩthõng aga ĩthĩ ne,
ẽẽn muwẽẽnĩtĩ cĩnnẽ wo cĩ kaganoko.
12 Makayyioit, agatanẽ eeti cĩ atirithi niia õrrõt kũdũt,
agatanẽ eeti cĩ alimani niia Ngirana cunni,
13 anyi niia ĩnõõnõ yuwuthõn wathinniowẽy cĩk pĩrnantak
kuumuc kadawẽ look cĩ edetini eeta cĩk gerthek.
14 Athii katĩ cĩ abũrĩ Makayyioiti eet cĩgĩnĩk,
athii katĩ nẽ cĩ uungni eet cĩgĩnĩk wũk eberyiay mĩn.
15 Amudiay katĩ thõõth cĩ edeemothi lokikẽtẽy naboo,
ĩthõng õwõb katĩ eeta cĩk abũnna ĩnõõnõ.
16 Ngẽnẽ katĩ cĩ ẽẽlana aneeta eetĩnẽy ĩcĩk gerthek?
Ngẽnẽ katĩ cĩ ẽẽlana aneeta eetĩnẽy
ĩcĩk ẽẽn gẽrẽthanniok?
17 Ma baalia kithii Makayyioiti ngatĩ ẽẽlania aneeta,
kũwa woyyia na õlõõ ĩcĩ daakciawu.
18 Kothoothi balna na kathĩ ne, “Iritaniay thoocĩ cannie,”
Makayyioit, ikiyyia balna ẽẽlawa mĩnanĩ cunnie aneeta.
19 Mĩ abarrit thĩnĩn cannie,
ayahai balna manymanyaninietĩ cunnie
thĩnĩn cannĩ talinit.
20 Aavĩ woccia alaanĩ cĩ gerthe kĩ aniitia,
cĩ ayaha pĩrnanẽt ngirana cĩnnĩ?
21 Arũmẽ nẽẽgẽ kõdõwẽ aaburneei eet cĩk abũnna,
ĩthõng eteddik nẽẽgẽ eet cĩk amĩrĩ kadaaitõ.
22 Ĩthõng thĩ kẽnnẽ, ĩthĩ Makayyioiti ngĩtĩ nannĩ cĩ alũwẽ kõkõm,
ẽẽn Nyekuci cannie thiir cĩ kalugunyẽnẽ na.
23 Adũman katĩ Nyekuci ĩnõõgõ thoothonniowẽy cĩgĩk ĩcĩk gerthek,
ĩthõng athaan ĩnõõgõ, nyatarka gerthetin cĩnĩng,
athaan katĩ Makayyioiti Nyekuci cĩnac ĩnõõgõ.