Tẽgẽl 84
Ẽẽn tẽgẽl coo cĩ lõgõõ cĩk lõgõõ cĩk Kõõra, cĩ eyeleei makayyioiti belliok kebelit.
1 Makayyioit cĩ Ijiar vẽlẽk,
dĩhĩm ngĩtĩ aavẽ niinia!
2 Abarriteei ririwacĩ cannie,
kõrõõk cĩ Makayyiokto,
alu thĩnĩn cannie kĩ ẽlẽ cannĩ,
nyatarka Nyekuc cĩ arũgĩ.
3 Kõdẽ buu ngĩ arũba nganĩbolonyĩ ngĩtĩnnĩ,
ĩthõng ẽtẽngẽny tehele ciith cĩnnĩ buu,
kĩĩ woccia kitilinga jõõrõ cĩgĩnĩk,
ngatĩ õjõõn kĩ ngĩtĩ todongintio cunni,
Makayyioit cĩ Ijiari vẽlẽk,
Alaan cannĩ kĩ Nyekuc cannĩ.
4 Nyatarka agatantẽ eeta cĩk aatĩ Ciitha cunni,
adihiththi nẽẽgẽ aniitia kũdũt.
5 Agatantẽ eeta cĩk amũda tiirthẽt cĩnĩng ĩcunni,
cĩk aari thinneti cĩgĩk ngatĩ õvõyyĩ ĩcĩ Thiir cĩ Thionĩ.
6 Ma ngĩ okollie nẽẽgẽ toloowa ĩcĩ uluano,
anyi nẽẽgẽ ĩnõõnõ kĩĩ ngĩtĩ kẽbẽrẽ cĩk duwwenu,
ĩthõng naboo ũmmũt tammu cĩ loolo buu nginicẽ mõrẽẽtẽy.
7 Ikiyyia ĩtõõrẽ tiirthẽtĩ cĩnĩng,
kuumuc kedenyciay nẽẽgẽ vẽlẽk codoi codoi,
nguuma cĩ Nyekuco Thiona.
8 Makayyioit Nyekuc cĩ Ijiari vẽlẽk, thĩk lawinit cannĩ,
Nyekuc cĩ Yokobĩ, thĩrara aneeta.
9 Nyekuc, cĩn alaan cĩnang cĩ ẽẽn kilib cĩnang,
gatan ĩnõõnõ wũ balna ẽbẽra niinia.
10 Mayya kõr codoi doo reerunga cunni,
kijiar wathinniok vucciaknya ngamanĩ,
mayya woccia ngatĩ kẽnnẽ na bekcioit
katũga cĩ Ciith cĩ Nyekuc cannĩ,
kijiar ngatĩ kaavẽ korookjiowẽy
cĩk eet cĩk gerthek.
11 Nyatarka aavĩ Makayyioiti Nyekuci
kĩ kõr kĩ kilib ĩcĩnac,
agatannet nẽ ageeta thimatĩtha kĩ bulẽnta,
athii cĩ ĩcaac Makayyioiti gii cĩ abũnna,
eet cĩk õwõ dõõkĩthĩ goolliowẽy ĩcĩk abũnna.
12 Makayyioit cĩ Ijiari vẽlẽk,
agatanẽ eeti cĩ aari thĩnĩn cĩnnĩ ĩcunni.