Tẽgẽl 83
Tẽgẽl cĩ Athavĩ.
1 Nyekuc, nyĩ ĩjakcie niia,
Nyekuc, nyĩ aavẽ tiv, nyĩ ẽlẽmannie.
2 Cĩn da niia ngatĩ ẽgẽrẽnyĩ mĩrõwa cugunniek,
ngatĩ õdõngĩ nẽẽgẽ ooti cĩgĩk tiddina,
nyatarka adiim thẽk jore.
3 Atukwuan nẽẽgẽ jurrung kedetit eet cugunik,
ĩthõng adĩmaneei thoothonniok cĩk gerthek
eet cĩk amĩnani niia.
4 Õthõõth nẽẽgẽ athĩ ne, “Kivitia naaga
kathaanit looc cĩnĩng,
kĩĩ katĩ kithiic cĩ ahadiay thara
cĩk eet cĩk Ĩthraĩlĩ kũdũt.”
5 Atukwuan nẽẽgẽ thoothonniok cĩkkõ ngatĩ odoi,
alũt nẽẽgẽ eleeti cĩgĩk kivitia jora ĩcunung,
6 ĩnõõgõ eeta cĩk Ẽdõmĩ kĩ cĩk Ĩthĩmaĩlĩ,
kĩ cĩk Mõabĩ kĩ cĩk Hagarĩ,
7 kĩ cĩk Gebalĩ kĩ cĩk Ammõnĩ kĩ cĩk Amaleki,
kĩ cĩk Vilithia kĩ eet cĩk Tire.
8 Kõdẽ ũrũmtẽ balna eeta cĩk Athiria kĩ ĩnõõgõ buu,
kĩĩ katĩ keelitõ dõõlĩ cĩk Lõõtĩ.
9 Dĩmanek ĩnõõgõ thoothonniok wũk balna
adĩmaneei niia eet cĩk Midianĩ,
kĩ balna ngĩ adĩmaneei niia
Thithera kĩ Jabina lĩĩla cĩ Kithõnĩ,
10 wũk balna adaaĩ nẽẽgẽ õlõõ ĩcĩ gaalawu cĩ Endorĩ,
ĩthõng ummuẽcõ eleeti cĩgĩk loota.
11 Anyĩk niia makayyiok cĩgĩk kadaaitõ
kĩ balna Orebi kĩ Theebi,b
anyĩk gaala cĩgĩk kadaaitõ
kĩ balna ngĩ arui niia alaan Thẽba
kĩ alaan Thalmunna,c
12 wũk balna athĩ nẽẽgẽ ne, “Kootti
looc cĩ Nyekuco kĩĩ cĩnac.”
13 Nyekuc, thaan ĩnõõgõ kĩ ballõwa cĩk õdõõĩ,
kaavutõ kĩ kavirowa cĩk avungan ngõõtĩ.
14 Kĩ bõõnõ cĩ atũũth gua,
kõdẽ kaavu kĩ gua cĩ dĩcĩ
cĩ atũũth thiiryiok vẽlẽk,
15 umur niia ĩnõõgõ ngõõta cobbi õrrõt,
ĩthõng anyiwu ĩnõõgõ kabarritit
kuvura cobbi õrrõt kũdũt.
16 Makayyioit, bung niia
nguumti cĩgĩk ngawanintia,
kĩĩ katĩ kẽrẽppanti nẽẽgẽ aniitia.
17 Anyĩk niia woccia ĩnõõgõ kangawanit, ĩthõng abarritita,
anyĩk woccia ĩnõõgõ kadaaitõ ngawanintia.
18 Anyĩk niia ĩnõõgõ kagayyi aniitia,
cĩ a thar cugunik Makayyioit,
aniitia dõ cĩ Ijiari vẽlẽk
cĩ agami looc vẽlẽk.