Tẽgẽl 80
Ẽẽn tẽgẽl cĩ Athavĩ coo, cĩ eyeleei makayyioiti belliok kebelit. Ebellie balna moloowa cĩ tẽgẽl cĩ athĩ ne, “Vurẽẽn cĩk Ngẽrẽmngẽrẽmmak.”
1 Tũwayyioit cĩ eet cĩk Ĩthraĩlĩ, thihet ageeta,
niia cĩ ũũwa eet cĩk Yothẽbõ
cĩk õgõõn kĩ tẽẽnyĩ wo,
niia cĩ aavẽ loota taabawa kõrgẽna
cĩ anjĩlẽt cĩk ayak kavutanẽ,a
yelek ẽlẽ cunni,
2 tatũgẽt cĩk Evraimi kĩ cĩ Benyamini kĩ cĩ Manathi.
Yẽla niia tiirthẽt cunni,
ijjia niia elet ageeta.
3 Nyekuc, anyet niia ageeta kiittia tiirti naboo,
anyĩk niia nguum cunni kũtũkũlet ageeta,
kĩĩ woccia keelliaha naaga.
4 Makayyioit Nyekuc cĩ Ijiari vẽlẽk,
Aavĩ katĩ varacĩ cunnie
lawintia cĩ eet cugunik kuumuc kĩĩ tĩngan?
5 Anyiwu balna niia mothinit
kĩĩ dainit cĩnang,
ĩthõng anyet niia ageeta kuwuddia tulalõ
cĩk abbĩththĩ lõkũlkũl.
6 Anyiwu balna niia eet cĩk loociok
cĩk kabakanona kĩ ageeta,
katararyiet ageeta,
ĩthõng ĩtdanycet ageeta.
7 Nyekuc cĩ Ijiari vẽlẽk, anyet niia ageeta
kiittia tiirti naboo,
anyĩk niia nguum cunni kũtũkũlet ageeta,
kĩĩ woccia keelliaha naaga.
8 Aluuguanẽ balna niia eet cĩk Ĩthraĩlĩ looca cĩ Ijibi,
aatĩ balna nẽẽgẽ kĩ kẽẽt cĩ vĩnõwo,
ĩthõng ikiyyia akatu ĩnõõgõ nginiwa
wũ balna ingkawẽ niia eet cĩk loociowu.
9 Engedeti balna niia looc kĩĩ tẽltẽla, nyatarka kẽẽt cĩ vĩnõwo,
ĩthõng ĩtĩlĩtha kĩbbĩt looc.
10 Akkuwa balna kẽẽt cĩ vĩnõwo ria cĩnnẽ thiiryiok,
ĩthõng ukkũẽcõ taliibanẽ cĩgĩnnẽk kẽẽn cĩk obbitik.
11 Ivitia balna nẽnnẽ acavanit taliibanẽ cĩgĩnnẽk
kĩĩtõ mẽẽlĩ kõdõlanit Bũlũc cĩ Mediterenia,
ĩthõng õdõlanit gwuak Lĩĩl cobbi cĩ Yuvarẽthĩ.
12 Nyia balna õõyõk niia lũwat cĩnnĩ,
kĩĩ katĩ kivitia kũdũcĩtõ eeta nyegerua cĩk vĩnõwak wo?
13 Edeciak balna ngõwẽẽnya ĩnõõnõ,
ĩthõng adait kẽlẽgẽ cĩk bõõnak nyegerua cĩgĩnĩk.
14 Nyekuc cĩ Ijiari vẽlẽk, bõda kĩ ageeta!
Cĩn looc tammuatiddina, ĩthõng ebehu!
Rĩcana kẽẽt cĩ vĩnõwo wo,
15 kegeroc wũ balna akatĩ athiiti cunnie cĩ athio,
kĩ kẽẽt wũ balna alingtia niia ẽla cunni.
16 Engeddei balna mĩrõwa kẽẽt cunni cĩ vĩnõwo tuu,
ĩthõng ũtũũth gua ĩnõõnõ,
thaan niia ĩnõõgõ varaaca cunni.
17 Ẽẽl niia et cĩ amĩnani,
et wũ balna alingtia niia ẽla cunni.
18 Ĩthõng thĩ, ĩthĩnga katĩ kuungnici naaga aniitia,
anyet niia ageeta rũgẽt naboo,
ĩthõng katĩ kalayyi aniitia.
19 Makayyioit Nyekuc cĩ Ijiari vẽlẽk,
anyet ageeta kiittia tiirti naboo,
anyĩk niia nguum cunni kũtũkũlet ageeta,
kĩĩ woccia keelliaha naaga.