Tẽgẽl 78
Tẽgẽl cĩ Athavĩ.
1 Eeta cĩganniek, ĩthĩrarit liman cannĩ,
ĩthĩhĩt thoothonniok cĩk kaduwa nana.
2 Kothoothi katĩ thoothiowẽy cĩk owovothi,
kothoothi katĩ na thoothonniok cĩk alugunyi cĩk ũnũũĩtõ,
3 cĩk balna kĩthĩraritõ naaga,
cĩk balna aduwacet õõ baatĩ baatĩ baajigietĩ cĩgaac.
4 Athii katĩ cĩ kaluguny naaga thoothonniok cĩkkõ dõõlẽnĩy cĩgaac,
Kaduwai katĩ dõõlĩ cĩgaac cĩk katĩ avvu,
tiicanẽ cĩk bulẽnĩt cĩ Makayyioktak, kĩ tiirthẽt cĩnnĩ
kĩ thoothonniok cĩk anaat eeta cĩk balna atican nẽnẽ.
5 Aduwaai balna nẽ goolliok cĩgĩnĩk eet cĩk Yokobĩ,
ngatĩ aarĩcẽ nẽ Ngiran eetĩnẽy cĩk Ĩthraĩlĩ,
cĩ balna aduwaai nẽ õõ baatĩ baatĩ baajigietĩ cĩgaac,
kĩĩ katĩ woccia kilimanit dõõlĩ cĩgĩk,
6 kĩĩ katĩ kagaacõ woccia doolia cĩgĩk
cĩk katĩ ngaanĩ arittiay Ngiran cĩnnĩ,
ĩthõng katĩ uduktiak nẽẽgẽ Ngiran cĩnnĩ buu dõõlĩ cĩgĩk.
7 Ĩthõng thĩ, woccia aryik nẽẽgẽ thinneti cĩgĩk kĩ Nyekuc,
ĩthõng woccia ĩthĩnga erehei tiicanẽ cĩgĩnnẽk,
ĩthõng thĩ, woccia kẽnnẽ, uthuutti tĩrĩthẽntiok cĩgĩnĩk.
8 Athii woccia cĩ aatĩ nẽẽgẽ kĩ õõ baatĩ baajigi cĩgĩk,
eet wũk balna õkõmĩ ooti cĩgĩk
cĩk athii cĩ athĩrar thõõth cĩ Nyekuco,
ĩthõng cĩk athii cĩ õwõb thinneti cĩgĩk ĩnõõnõ,
cĩk athii ririwanĩna cĩgĩk cĩ athũnnĩ thõõth cĩnnĩ.
9 Kõdẽ woyyia balna ngĩ ayak kõdõõtĩ cĩk Evraimi kirihinya,
ivitia utuwuyyie ivirit kõrra cĩ joro,
10 athii balna cĩ athũnnĩ nẽẽgẽ ngẽrẽmngẽrẽm cĩ Nyekuco,
ĩthõng ũtũbũrĩt ngatĩ aatẽ Ngirana cĩnnĩ.
11 Ivitia balna nẽẽgẽ erektek tiicanẽ cĩk ĩdĩman nẽnẽ,
tiicanẽ cĩk anaat eeta cĩk balna eyeleei nẽ ĩnõõgõ.
12 Adĩman balna nẽ thoothonniok cĩk anaat eetaa
nguumtẽnẽy cĩk õõ baajigi cĩgĩk
looca cĩ Ijibi, nginiwa cĩ Thoanĩ.
13 Ẽngẽr balna nẽ bũlũc, ĩthõng abaaktẽ nẽẽgẽ,
aanyĩk balna nẽ maam kĩbĩlĩt kaavutõ kĩ dilatĩ.
14 Ũũwa balna nẽ ĩnõõgõ diitha waath,
ĩthõng ũtũkũl looc guyyia baalin vẽlẽk.
15 Alib balna nẽ laarabẽt baatha cĩ õdõõĩ kak,
kĩĩ katĩ kirikta maama cĩk meelĩk,
cĩk aduwõy kĩ bulucua cĩk obbitik thõng,
16 adĩma balna nẽ lilliok naaraba cĩ alibie,
ĩthõng iriktia maama kĩ lilliowa.
17 Ĩthõng thĩ kẽnnẽ, alna balna nẽẽgẽ adĩmaneei
ĩnõõnõ gerthetin noko, kũtũbũrĩt Makayyioit
cĩ Ijiar vẽlẽk baatha cĩ õdõõĩ kak.
18 Ivitia balna ĩtĩmanit nẽẽgẽ Nyekuc, nẽẽgẽ nuun
ngatĩ ajini ĩnõõnõ dainit cĩ adiim nẽẽgẽ.
19 Õthõõth balna nẽẽgẽ Nyekuc buth ethei ne,
“Anyet koccia thẽk Nyekuci dainit baatha ĩcĩ õdõõĩ kak?
20 Ma balna ngĩ uuk nẽ laarab wo, ivitia iriktia maama,
ĩthõng iriktia maama cĩk meelĩk õrrõt.
Ĩthõng thĩ, anyet koccia nẽ dainit buu?
Anyi woccia nẽ eet cĩgĩnĩk kiding buu?”
21 Ma balna ngĩ ĩthĩrar Makayyioiti ĩnõõgõ,
ikiyyia avarac nẽ õrrõt,
ikiyyia ũtũũth gua cĩnnẽ eet cĩk Yokobĩ,
ĩtĩngawĩk varacĩ cĩnnẽ eet cĩk Ĩthraĩlĩ,
22 nyatarka athii balna cĩ ẽlẽmĩ nẽẽgẽ Nyekuc,
kõdẽ aari thinneti cĩgĩk ĩcĩnnĩ kõõga ĩnõõgõ.
23 Ĩthõng thĩ kẽnnẽ, uduwak thẽk balna nẽ thõõth tammutiddin tiirion,
ĩthõng upuuk nẽ katũgẽt cĩk tammutiddino,
24 ikiyyia balna ĩcĩĩda nẽ dainit cĩ athĩ maanab kĩĩ kuduit eeta,
aanyĩk nẽ ĩnõõgõ dainit cĩ aku tammuatiddina.
25 Ivitia uduit balna eeta ahat cĩ avaadiay cĩ anjĩletu,
Itioniai nẽ ĩnõõgõ dainit cobbi vẽlẽk cĩ adak nẽẽgẽ kũwũpantẽ.
26 Ikiyyia balna ayaha nẽ ngõõt cĩ aliba tõõna cĩ alibanĩ kõr,
ĩthõng ayaha ngõõt cĩ aku ĩcĩ diinu tiirthẽta cĩnnĩ.
27 Atduutiai balna nẽ ĩnõõgõ kiding kaavu kĩ tuduwacĩ,
utdutak kĩballĩ cĩk akul tiddina,
cĩk aatĩ kĩ kathaaca cĩk titim cĩ bũlũco.
28 Aanyĩk balna nẽ kĩballĩ kitiothõ ngĩtĩ abaaĩ nẽẽgẽ,
kĩbbĩtĩt koyokonit tugguet cĩgĩk vẽlẽk.
29 Adak balna nẽẽgẽ dainit kũwũpantẽ,
nyatarka balna aanyĩk nẽ ĩnõõgõ
kaal cĩk balna adiim nẽẽgẽ õrrõt.
30 Ĩthõng thĩ, balna ngaanĩ kũtũngtek
nẽẽgẽ dainit wũ adiim nẽẽgẽ,
kõdẽ balna ngaanĩ aavĩ dainti kutugetinẽy cĩgĩk,
31 ikiyyia balna avaracĩk Nyekuci ĩnõõgõ,
ĩthõng uruk eet cĩk tiirtik,
cĩk ẽẽn ngĩthõrõk kõrgẽna cĩ Ĩthraĩlĩ.
32 Kõdẽ woyyia balna ngĩ ĩdĩman Nyekuci
thoothonniok cĩkkõ vẽlẽk,
alna ngaanĩ adĩman nẽẽgẽ gerthetin noko,
kõdẽ woyyia balna ngĩ ĩdĩman Nyekuci
thoothonniok cĩk anaat eeta,
alna balna nẽẽgẽ athii cĩ ẽlẽmĩ ĩnõõnõ noko.
33 Ngaatĩ balna anyĩcẽ nẽ rũgẽt cĩnĩng kĩĩ tura,
arũba nẽẽgẽ tongolinit dõ erkinya vẽlẽk.
34 Ma vurtia cĩ balna urui Nyekuci ĩnõõgõ õõgĩ,
ivitia elemit gwuak ĩnõõnõ thinnetinẽy cĩgĩk naboo.
35 Ivitia balna ahaddia nẽẽgẽ ngatĩ ẽẽn Nyekuci thiir cĩnĩng cĩ alugunyẽnĩ nẽẽgẽ,
ngatĩ ẽnnẽ Nyekuci cĩ Ijiar vẽlẽk Ellioit cĩnĩng.
36 Aduwaai balna nẽẽgẽ ĩnõõnõ thõõth cĩ abũnna kutugetinẽy cĩgĩk,
ĩthõng thĩ kẽnnẽ, ĩgõõl ĩnõõnõ ahaatuanĩy cĩgĩk.
37 Athii balna cĩ arki nẽẽgẽ ngatĩ aarĩcẽ thinneti cĩgĩk ĩcĩnnĩ,
ĩthõng athii cĩ athũnnĩ nẽẽgẽ ngẽrẽmngẽrẽm cĩnnĩ.
38 Ĩthõng thĩ, amanni balna kẽnnẽ nẽ ĩnõõgõ,
ĩthõng ũtũngek gerthetin cĩnĩng,
ĩthõng ĩthĩnga aruk ĩnõõgõ.
Abĩlnĩ balna nẽ varac cĩnnĩ gõõ itinnyiay ĩcĩk meelĩk,
ĩthõng ĩthĩnga avaracĩth kũdũt.
39 Ikiyyia balna ahada nẽ ngatĩ ẽẽn nẽẽgẽ eet kaganoko,
aatĩ kĩ ngõõtĩ cĩ athĩ vĩnĩnnĩk cĩ athii katĩ cĩ õbõda naboo.
40 Abũrĩ balna nẽẽgẽ thõõth cĩnnĩ kũdũt,
ĩthõng aanycĩk ĩnõõnõ kõmõthẽ baatha ĩcĩ õdõõĩ kak.
41 Atĩman balna nẽẽgẽ Nyekuc naboo kũdũt,
ĩthõng acananit Nyekuc cĩ ẽẽn Et cĩ Dĩhĩmĩ cĩ eet cĩk Ĩthraĩlĩ.
42 Ĩthĩnga balna nẽẽgẽ ahada tiirthẽt cĩnnĩ,
kĩ kõr wũ balna ẽẽlanẽ ĩnõõgõ eetĩnẽy cĩk ĩtdany ĩnõõgõ,
43 athii balna cĩ ahada nẽẽgẽ kõr wũ balna adĩmanĩ nẽ thoothonniok cĩk anaat eeta Ijiba,c
kĩ thõõth cĩnnĩ cĩ anaat eeta looca ĩcĩ Thoanĩ.
44 Ũũwũ balna nẽ lilliok cĩk Ijibi kĩĩtõ biyyie,
kithii cĩ awũd nẽẽgẽ maam cĩk lilliok cĩgĩk.
45 Itiona balna nẽ kĩrõng cĩk meelĩk cĩk adak ĩnõõgõ,
kĩ nyarũdẽt cĩk adĩman ĩnõõgõ buth.
46 Anyĩk balna Nyekuci girroc kadait manẽẽn cĩgĩk,
ĩthõng adait nẽẽgẽ manẽẽn cĩgĩk kithiicõ.
47 Athaan balna nẽ manẽẽn cĩgĩk cĩk vĩnõwak,
kĩ cĩk mũũnenu mũllẽnĩy.
48 Anyĩk balna nẽ mũllẽn kuukitõ tĩĩn cĩgĩk,
ĩthõng iccia badia cĩ tammuo kaal cĩgĩk buu.
49 Avaraci balna nẽ ĩnõõgõ õrrõt,
obbua ngongowi cĩnnẽ kĩ varac õrrõt,
itiona nẽ anjĩlẽt cĩk meelĩk kivitia kuruit ĩnõõgõ.
50 Avarac balna nẽ õrrõt,
ĩthõng aanyĩk moorithiok kehecit ĩnõõgõ,
ĩthõng aanyĩk õõgĩ kadaaitõ.
51 Ikiyyia balna uruk nẽ abuuẽt cĩk eet cĩk Ijibi,d
dõõlĩ cĩk arittiay ĩcĩ owu tugguẽtẽy cĩk eet cĩk Hamĩ.e
52 Ĩthõng thĩ, kẽnnẽ balna uluuguaĩ nẽ eet cĩgĩnĩk õgõõn kĩ athaa,
ikiyyia ũtũwwa nẽ ĩnõõgõ kĩ athaa baatha cĩ õdõõĩ kak.
53 Eyeleei balna nẽ ĩnõõgõ gõõl jurrung, kĩĩ katĩ athii nẽẽgẽ cĩ ongollie,
ĩthõng thĩ, kẽnnẽ balna ikiyyia ukku bũlũc mĩrõk cĩgĩk.
54 Gõõla cĩ balna ayahanĩ nẽ ĩnõõgõ kõdõlanit
lõkõrẽ cĩ looc cĩnnĩ cĩ dĩhĩmĩ,
ĩcĩ looc cĩ ẽẽn thiiryiok,
cĩ balna agam nẽ tiirthẽta cĩnnĩ.
55 Ikiyyia balna itingka nẽ loociok kivirit kũtũngtek eet cĩgĩnĩk,
aanyĩk nẽ eet cĩgĩnĩk looc cĩnĩng karagĩthĩt,
ĩthõng aanyĩk eet cĩk Ĩthraĩlĩ kabaaitõ looca cĩnĩng.
56 Ĩthõng thĩ, avvu balna kẽnnẽ atĩman eeta cĩk Ĩthraĩlĩ Nyekuc,
ĩthõng ũtũbũrĩt Nyekuc cĩ Ijiar vẽlẽk,
athii balna cĩ athĩrar nẽẽgẽ goolliok cĩgĩnĩk.
57 Aatĩ balna nẽẽgẽ kĩ baajiga cĩgĩk
cĩk balna athii cĩ athĩrar thõõth cĩ Nyekuco,
ĩthõng ĩthĩnga ẽlẽmĩ ĩnõõnõ,
ĩthõng aatĩ balna nẽẽgẽ ĩcĩ Nyekuco
kĩ kirihinya cĩk uduullie.
58 Ivitia balna anycĩk nẽẽgẽ Nyekuc kavarac,
nyatarka balna ala nẽẽgẽ nyekucnya cĩk võlõngak,
ĩthõng ĩlĩlĩwẽẽk Nyekuci nyekucnya cĩgĩk wo.
59 Ma balna ngĩ athĩrar Nyekuci ĩnõõgõ wo, ikiyyia avarac õrrõt,
ĩthõng ũtũbũr nẽ eet cĩk Ĩthraĩlĩ kũdũt.
60 Ikiyyia balna ũtũngek nẽ Ciith cĩ Nyekuco Thiilo,
tuggu wũ balna aari nẽ kõrgẽna cĩnĩng.
61 Ikiyyia balna ẽlẽmaaĩ nẽ mĩrõk cĩgĩk kagamit Nyethuduwoc cĩ Ngẽrẽmngẽrẽmõ,f
cĩ balna ẽẽn makathĩt cĩnnĩ kĩ bulẽnĩt cĩnnĩ.
62 Anyi balna nẽ eet cĩgĩnĩk mĩrõk cĩgĩk,
avaraci balna nẽ eet cĩgĩnĩk cĩk balna ẽbẽra nẽ õrrõt.
63 Ikiyyia balna ũtũũth gua ngĩthõrõk cĩgĩk kithiic,
ĩthõng ithii belinti, nyatarka athii eeta cĩk atik buweeci tõõ.
64 Aruwue balna paadĩrnya cĩgĩk nyetubanyay,
ĩthõng balna athii thẽk woccia cĩ alu ngaay cĩk bõyyĩk cĩgĩk.
65 Ngaatĩ ĩngannĩ balna Makayyioiti kaavu kĩcĩ ĩngathĩ kĩnyaaĩy,
kaavu nẽ kĩ eeti cĩ ĩngathĩ baaintia.
66 Ikiyyia balna uuk nẽ mĩrõk cĩgĩnĩk kimiiryie,
ĩthõng aanyĩk ĩnõõgõ kagam ngawani kũdũt.
67 Ngaatĩ balna abũrnĩ nẽ eet cĩk vurtẽẽn cĩk Yothẽbõ,
athii balna cĩ ẽbẽra nẽ tatũk cĩ Evraimi,
68 ĩthõng thĩ, ikiyyia ẽbẽra balna nẽ tatũk cĩ Yudaa,
kĩ Thiir cĩ Thionĩ wũ balna amĩnan nẽnẽ.
69 Ikiyyia ẽtẽngẽny balna nẽ Ciith cĩnnĩ kĩĩ wuun kutugu kĩ thiira,
kaavu nẽ kĩ lõõcĩ wũ balna ẽngẽnyẽt Nyekuci kaavu kũdũt.
70 Ẽbẽra balna nẽ Davide kĩĩ ticciannioit cĩnnĩ,
wũ balna ũwwa nẽ athaa,
71 ĩthõng aanyĩk balna nẽ ĩnõõnõ,
kikiyyia kĩĩ tũwayyioit cĩ eet cĩgĩnĩk cĩk Yokobo,
wũk balna ẽbẽra nẽ.
72 Ma natẽ, ũtũwwa balna Davide ĩnõõgõ
bũnnatina cĩ thĩnĩn cĩnnĩ,
ĩthõng ũtũwwa ĩnõõgõ
athĩnẽy cĩgĩnĩk gẽẽnyĩtha.