Tẽgẽl 77
Ẽẽn tẽgẽl cĩ Athavĩ coo, cĩ eyeleei makayyioiti belliok kebelit. Athĩ thar cĩk makayyiokto Jeduthan.
1 Kaluei na Nyekuc, kĩĩ katĩ kẽẽla aneeta,
kaluei Nyekuc, kĩĩ katĩ kĩthĩrara aneeta.
2 Balna ngĩ komothie na, kadiimi balna na Makayyioit,
baal ngĩ kalayyie kodongi athĩn cĩganĩk tiddina,
ĩthõng ũtũbũr thĩnĩn cannie ngatĩ amanymanyanni.
3 Nyekuc, kahadani balna na aniitia, ĩthõng kabalaca,
ma balna ngĩ kamui wo, ikiyyia alal ririwacĩ cannie.
4 Abĩlnẽ balna niia kẽbẽrẽ cĩganĩk ngatĩ oginnie,
kacanannie balna na õrrõt ngatĩ athii cĩ kothoothi.
5 Kamui balna na wathinniok wũk balna ũnũũĩtõ,
erkinya wũk balna baa lõõla.
6 Kahada balna na baal tegelua cĩk balna kebeli ĩcowu,
ĩthõng ikiyyia umuk thĩnĩn cannie,
ĩthõng ijinõy ririwacĩ cannie ĩthĩ ne,
7 “Abũrna woccia katĩ Makayyioiti aneeta kũdũt?
Ĩthĩnga woccia katĩ ẽyẽla nẽ bũnnathĩt cĩnnĩ naboo?
8 Ithii mĩnanĩ cĩnnẽ cĩ alna kũdũt wo, kũdũt?
Ithii thõõth wũ balna aduwa nẽ kũdũt?
9 Erehek da Nyekuc ngatĩ amannĩcẽ eet cĩgĩnĩk?
Ajuranĩ da nẽ tamati cĩnnĩ varacintia cĩnnĩ?”
10 Ĩthõng thĩ, kahada kĩthĩ ne, “Kapĩrna na ngatĩ
aku aburnia Nyekuci cĩ Ijiar vẽlẽk aneeta.”
11 Kamuwa katĩ na tiicanẽ cĩk Makayyioktak.
Ii, kahada katĩ tiicanẽ cugunik
cĩk anaat eeta, wũk balna adĩmani niia baa lõõla.
12 Kamui katĩ na tiicanẽ cugunik vẽlẽk,
ĩthõng kahada katĩ tiicanẽ cugunik cĩk ijiar vẽlẽk.
13 Nyekuc, dĩhĩmẽ goolliowa cugunniek.
Kõdẽ nyekuc jang cĩ ijiar Nyekuc cĩnang wo?
14 Eeni niia Nyekuc cĩ adĩmani thoothonniok cĩk anaat eeta,
ẽyẽla balna niia tiirthẽt cunni kõrgẽna cĩ eet vẽlẽk.
15 Ẽẽla balna niia eet cugunik attia cunni ĩcĩ Ijiar vẽlẽk,
ẽẽla dõõlĩ cĩk dõõlĩ cĩk Yokobĩ kĩ cĩk Yothẽbõ.
16 Nyekuc, acinni balna maama aniitia,
ĩthõng õtõmõthõ õrrõt,
õmmõtĩ balna maama ngatĩ wuuni õrrõt.
17 Acĩĩda balna diithiowa maam,
ĩthõng ĩthĩhẽ tammu cĩ icciayyi tammuatiddina,
ĩthõng atalany badia cunnie kĩ nyarangĩta.
18 Athĩrar balna eeta tammu cunni cĩ icciayyi ngõõtatõ,
ikiyyia badia cĩ tammu cunni ũtũkũl looc vẽlẽk,
ikiyyia õtõmmõ lõõcĩ, ĩthõng agam kirikirihi looc.
19 Aavĩ balna gõõl cunnie bũlũcatõ,a
gõõl cunni cĩ abaakci bũlũcatõ cobbi õrrõt,
ĩthõng kẽnnẽ athii eeti cĩ acĩn thoo cugunik
cĩk õwõyyẽ niia wo tõõ.
20 Ikiyyia ũtũwawu niia eet cugunik kĩ athaa,
athĩnẽy cĩk Mutha kĩ Aarõn.