Tẽgẽl 76
Ẽẽn tẽgẽl cĩ Athavĩ coo, cĩ eyeleei makayyioiti belliok kebelit, ĩthõng uukitõ kidõrẽta.
1 Agayyie Nyekuci looca cĩ Yudaa,
abulie thara cĩgĩnnẽk eetĩnẽy ĩcĩk Ĩthraĩlĩ.
2 Aavĩ tuggu cĩnnẽ Thalẽma,
ĩthõng aavu nẽ Thiona.
3 Aduul balna nẽ nyarangĩt cĩk ẽẽn guo,
kĩ kilibwua kĩ nyetubanya natẽ,
kĩ tũũrẽn õõgĩ cĩk jorak.
4 Alanyĩt nguum cunnie õrrõt kũdũt,
kijiar thiiryiok cĩk obbitik cĩk abbĩththĩ kẽlẽgẽ.
5 Ivitia uukitõ balna nyĩcẽkẽrĩ cĩk mĩroktak looc,
ĩthõng agamta eeta kaal cĩgĩk vẽlẽk,
ĩthõng yoko adaaitõ nẽẽgẽ kĩĩ lõõcĩ ĩĩr,
ithii ĩnõõgõ tiirthẽtĩ tõõ.
6 Nyekuc cĩ Yokobĩ, mĩ egerenyi niinia,
ĩbĩlĩt nyangõlẽ kĩ toromilie cĩ agurrie.
7 Adiim niia ngĩ ongolini eeta aniitia dõ õrrõt.
Ngẽnẽ cĩ woccia abĩlĩ nguuma cunni,
katĩ ngĩ avaracu niinia?
8 Engeri niia thõõth tammuatiddina,
ĩthõng õtõngõlẽ lõõcĩ kaavu tiv,
9 Nyekuc, balna ngĩ ĩtĩnga niia tẽẽd thõõth,
kĩĩ katĩ ẽẽla eet cĩk loocu vẽlẽk cĩk acananni.
10 Dĩdĩ, ayahaci varacĩ cunnie cĩ avaracĩcẽ eet dĩhĩthẽnĩt,
ĩthõng agam varacĩ cunnie eet cĩk anyigiay.
11 Ĩdĩmantek niigia kõngan cunung
Makayyioit Nyekuc cunung,
ĩthõng ĩdĩmantu kõngan kĩĩ dĩdĩ,
anycĩk niigia loociok cĩk õjõõntĩ,
kayaktak anyintiok Makayyioit
cĩ ongollie eeta.
12 Uduul nẽ rianii cĩ makayyiowu ngatĩvõrĩ,
ongollie ĩnõõnõ alaanẽta cĩk loocu.