Tẽgẽl 71
1 Makayyioit kakuni na kĩ aniitia,
kĩĩ katĩ kulugunyie kĩ aniitia.
Nyĩ anyi ngawani kagama aneeta.
2 Ẽẽlawa aneeta, nyatarka bũnnathĩt cunni,
thĩrara aneeta kĩĩnĩy cugunik, ĩthõng ẽẽlawanĩ.
3 Thuutia aneeta, ĩthõng ĩthĩ thiir cannĩ cĩ kalugunyẽnẽ nana,
cĩ woccia kõkõyyẽ na dõõkĩthĩ.
Duwa thõõth cunni kẽẽla aneeta,
nyatarka eeni niia thiir cannĩ cĩ alũwẽ kõkõm.
4 Nyekuc cannĩ, õgaha athĩnẽy ĩcĩk eet cĩk gerthek,
kĩ athĩnẽy cĩk gẽrẽthanniowu kĩ eet cĩk ẽẽn lõrĩmĩnya.
5 Makayyioit Tiiryioit, kaari balna na
muwẽẽnĩt cannĩ cĩ abũnna kĩ aniitia,
nyatarka kaari balna na thĩnĩn cannĩ ĩcunni,
balna thẽk ngaanĩ keeni dĩca.
6 Kaarĩha balna na thĩnĩn cannĩ kĩ aniitia,
kõrra cĩ balna karitianẽ na,
athunnia balna niia aneeta balna thẽk
kõrra wũ balna aritiania yaangĩ.
Kadihiththi katĩ gõõ na aniitia dõõkĩthĩ.
7 Ẽẽn rũgẽtĩ cannie yelinit ĩcĩ eet cĩk meelĩk,
nyatarka eeni niia ngĩtĩ kalugunyẽnẽ nana.
8 Kadihiththi katĩ na aniitia kũtũga cannĩ,
ĩthõng kuduwaha eet bulẽnĩt cunni waathĩn vẽlẽk.
9 Nyĩ abũrna aneeta yoko ngĩ katanganya na wo,
ĩthõng nyĩ abũrna aneeta yoko ngĩ athii cĩ keeni tiir.
10 Õthõõth mĩrõwa cĩganniek gõõl cĩ gerthe kĩ aneeta,
atukwuan nẽẽgẽ gõõl cĩ aruwa aneeta.
11 Õthõõth nẽẽgẽ athĩ ne, “Ũtũbũr balna Nyekuci ĩnõõnõ,
kõõt naaga kagamit ĩnõõnõ,
nyatarka ithii katĩ eeti cĩ ẽẽla ĩnõõnõ tõ.”
12 Nyekuc, nyĩ avĩya niia rẽẽna ĩcannĩ.
Nyekuc cannĩ, ijjia ẽẽlawa taman.
13 Anyĩk woccia niia eet cĩk ayahaca kirirẽn aneeta
kadaaitõ ngawanintia,
anyĩk woccia niia eet cĩk adiim ngĩ uukca aneeta,
kubungtie nẽẽgẽ ngawanintia.
14 Ĩthõng thĩ, kẽnnẽ kaari katĩ na dõõkĩthĩ
muwẽẽnĩt cĩ abũnna cannĩ kĩ aniitia.
Kadihiththi katĩ gõõ na aniitia kũdũt.
15 Kaduwa katĩ na bũnnathĩt cunni kũtũga cannĩ,
kaduwa katĩ na elianĩt cunni waathĩn vẽlẽk,
kõdẽ woyyia ngĩ maka eliantĩ cunnie kijiar thõõth cĩ kagga.
16 Makayyioit Tiiryioit, kaduwai katĩ na eet
thoothonniok cugunik cĩk anatti,
kaduwai katĩ eet vẽlẽk thõõth cĩ bũnnathĩt cunni.
17 Nyekuc, illimana balna niia aneeta
balna thẽk ngaanĩ keeni dĩca,
ĩthõng kĩĩ kõr coo, ngaanĩ kaduwa
thoothonniok cugunik cĩk anaat eeta.
18 Kõdẽ ngĩ katanganya na buu, ĩthõng kayaha kũũrlũk,
Nyekuc, nyĩ ũũngnĩca aneeta,
kuumuc kuduwak na tiirthẽt cunni,
dõõlĩ cĩk katĩ ngaanĩ avvu.
19 Nyekuc, arawak bũnnathĩtĩ cunnie tammutiddin,
ĩdĩmanu balna niia thoothonniok cĩk tiirtik.
Nyekuc, ngẽnẽ cĩ aavĩ kĩ niia?
20 Kõdẽ woyyia balna ngĩ itionaha niia aneeta
thoothonniok cĩk gerthek kĩ hecinit,
ĩthõng thĩ, kẽnnẽ anyiwu niia rũgẽt cannĩ kĩĩ jõr naboo,
õdõngana katĩ niia aneeta loowa.
21 Anya katĩ niia aneeta kubulie õrrõt dõõkĩthĩ,
ĩthõng amanymanyana katĩ niia aneeta naboo.
22 Kadihiththi katĩ na aniitia kidoria,
Nyekuc cannĩ, kadihiththi katĩ aniitia,
nyatarka athũnnẽ balna niia thõõth cunni.
Kebeleci katĩ tegelua kidoria cannĩ,
Nyekuc cĩ ẽẽn Et cĩ Dĩhĩmĩ cĩ Ĩthraĩlĩ.
23 Kegerenyi katĩ na kũtũga cannĩ talintia,
katĩ ngĩ kebeleci tegelua cĩk dĩhĩthẽntak,
nyatarka ẽẽlawa balna niia aneeta.
24 Kothoothi katĩ bũnnathĩt cunni waathĩn vẽlẽk,
nyatarka eet cĩk adiim balna ngĩ
adĩmanna aneeta buth,
agam ngawani ĩnõõgõ,
ĩthõng atalmanyantẽ.