Tẽgẽl 72
Tẽgẽl cĩ Thõlõmõnẽ.
1 Nyekuc, anyĩk alaan gẽẽnyĩth cunni,
kĩĩ kẽtẽd nẽ thõõth gõõla cĩ edeemothi,
ĩthõng anyiwu ĩnõõnõ bũnnathĩt cunni.
2 Ẽngẽr katĩ nẽ thoothonniok cĩk eet cugunik
gõõla ĩcĩ edeemothi,
ĩthõng ẽngẽr katĩ thoothonniok cĩk eet cĩk apĩrna
buu gõõla ĩcĩ abũnna jurrung.
3 Ayahai katĩ thiiryiowa eet balinit,
ayaha katĩ thiiryiowa cĩk kĩdĩk thõõth cĩ edeemothi.
4 Ẽẽla katĩ alaanĩ eet cĩk apĩrna kõrgẽna cĩ eetu,
ĩthõng ẽẽla dõõlĩ cĩk eet cĩk apĩrna,
uuk katĩ nẽ ratannioit cĩnĩng.
5 Nyekuc, ongolini katĩ eeta aniitia kũdũt,
kĩcĩ yoko ngĩ aavĩ kõr kĩ nyĩĩlok kũdũt wo.
6 Aavĩ katĩ alaanĩ kĩ tammu cĩ aruwa kartienit vurtia cĩ ẽtẽngẽwõĩ kartienti,
kĩ tammu cĩ uuk looc.
7 Maka katĩ bũnnathĩtĩ cĩ eetu wathinniowẽy cĩgĩnĩk õrrõt,
ĩthõng alna katĩ ganõnĩ erkinya kĩ erkinya.
8 Agam katĩ nẽ looc vẽlẽk bũlũc ĩmma kĩ bũlũc ĩmma,
ithiananĩ Lĩĩla cobbi cĩ Yuvarẽthĩ kõdõlan turnat cĩ loocu.
9 Akaneei katĩ eeta cĩk aatĩ baatha cĩ õdõõĩ kak ĩnõõnõ kuthungti,
ĩthõng õgõlõt katĩ mĩrõwa cĩgĩnnẽk tuduwaca.
10 Ayahai katĩ alaanẽta cĩk Tarthithi kĩ loociok
cĩk aatĩ rẽẽna titimmuanĩy ĩcĩk bulucuanu ĩnõõnõ anyintiok,
anyi katĩ alaanẽta cĩk Thẽbaa kĩ Thẽba ĩnõõnõ anyintiok.
11 Ulul katĩ alaanẽta vẽlẽk ooti cĩgĩk nguuma cĩnnĩ,
ĩthõng iticantothĩk katĩ eeta cĩk loociok vẽlẽk ĩnõõnõ.
12 Nyatarka ẽẽl katĩ nẽ eet cĩk apĩrna katĩ ngĩ alu,
ĩthõng ẽẽl katĩ nẽ eet cĩk apĩrna kothii gimma,
cĩk athii eeti cĩ ẽẽl ĩnõõgõ tõõ.
13 Amanni katĩ nẽ eet cĩk athii cĩ tiirti,
ĩthõng ẽẽla rũgẽt cĩ eet cĩk apĩrna, athii gimma tõ daaĩtha.
14 Ẽẽla katĩ nẽ piryiak tdanyintia kĩ jora kĩ ukwẽẽnta,
nyatarka arĩcana nẽ rũgẽt cĩnĩng.
15 Arũgĩ woccia nẽ kũdũt!
Anyĩwothĩk woccia daabĩ cĩ Thẽbaa ĩnõõnõ.
Alayyiõĩ woccia eeta ĩnõõnõ,
ĩthõng agatanit ĩnõõnõ dõõkĩthĩ.
16 Anyĩk labĩ kĩbbĩtĩt looc,
anyĩk thiiryiok kĩbbĩtĩt labĩna,
kaavutõ kĩ labĩna cĩk Lẽbanõnĩ,
kaavutõ kĩ kartẽ cĩk akula jurrung.
17 Aatĩ woccia thara cĩgĩnnẽk kũdũt,
kallia woccia kaavutõ kĩ yoko
ngĩ alanyĩt kõr dõõkĩthĩ wo.
Agatanni katĩ loociowa vẽlẽk, nyatarka ĩnõõnõ,
ĩthõng ũtũvvẽcõ katĩ ĩnõõnõ kĩĩ et cĩ agatanẽ.
18 Ĩdĩhĩthĩt Makayyioit Nyekuc cĩ Ĩthraĩlĩ.
Ĩnõõnõ dõ cĩ atican thoothonniok cĩk abulannet wo.
19 Anycĩk nẽẽgẽ thar cĩgĩnĩk kubullie kũdũt,
kĩbbĩt woccia bulẽnĩtĩ cĩnnẽ looc vẽlẽk.
Amẽn, ĩthõng amẽn.
20 Turnanẽt cĩ lawintiok cĩk Davide ngẽrtĩ Jethe coo.