Tẽgẽl 69
Ẽẽn tẽgẽl cĩ Davide coo, cĩ eyeleei makayyioiti belliok kebelit. Ebellie balna moloowa cĩ tẽgẽl cĩ athĩ ne, “Vurẽẽna.”
1 Nyekuc, ẽẽlanĩ!
Õdõlanit maama inyia cannĩ.
2 Kitiowa na rĩkan cĩ wuuni,
ĩthõng athii ngĩtĩ abĩlnĩ thoona cĩganniek tõõ.
Kaavẽ na bũlũcatõ ngatĩ wuuni,
ĩthõng idiimitõ maama cĩk meelĩk ukkuyyianĩ.
3 Kĩpĩra thõõth cĩ kavvanẽ elinit,
õdõõk logorlongĩ cannie.
Ipiryia kẽbẽrẽ cĩganniek,
ngatĩ ẽrẽppanĩ Nyekuc cannĩ.
4 Mẽẽlĩ eeta cĩk akanana aneeta kaganoko,
õrrõt kijiaritõ ĩm cĩk õõ cannĩ,
aaburnecca aneeta mĩrõwa cĩganniek kaganoko,
cĩk adiim ngĩ arukca aneeta.
Anya balna nẽẽgẽ aneeta kõbõdaĩ kaal
cĩk ngaanĩ kõgõrõth nana.
5 Nyekuc, aga niia ngatĩ kagiithiẽnẽ nana,
kikiyyia kõmõthẽ gerthetina cannĩ
cĩ athii cĩ alugunyi ĩcunni.
6 Makayyioit, eeni niia Makayyioit cĩ Ijiar vẽlẽk,
anyĩk eet cĩk ayak muwẽẽnĩt cĩ abũnna kĩ aniitia
kithiic cĩ angawan, nyatarka aneeta.
Nyekuc cĩ Ĩthraĩlĩ,
anyĩk woccia eet cĩk ẽrẽppanni aniitia,
kithiic cĩ amũda nẽẽgẽ ngawani, nyatarka aneeta.
7 Kõmõga na dacinet cĩ eetu, nyatarka aniitia,
ubunga ngawani nguum cannĩ.
8 Kikiyyia kaavu na kĩ modeenti kõrgẽna cĩ gõtõõnõga cĩganĩk,
ĩthõng kaavu kĩ eeti cĩ rẽẽng õlõõtõtõ cannĩ.
9 Kamĩnani na Ciith cunni kĩ gua cĩ atũũthĩ ẽla cannĩ,
ĩthõng mĩ adaacci eeta aniitia, adaacca nẽẽgẽ aneeta buu.
10 Mĩ kalu na, ĩthõng kẽdẽtha ẽlẽ cannĩ daintia,
komogi woccia thẽk eet cĩk adaacca aneeta,
11 mĩ kahimiti na ceremua cĩk uluanak,
arannia kẽnnẽ nẽẽgẽ thõng.
12 Adaacca gaala cĩk aatĩ lokika aneeta,
ĩthõng adaacca bakciaha aneeta
ngatĩ ebellecia tegelua.
13 Makayyioit, kalayyi na aniitia,
atajani woccia niia lawinit cannĩ gõõla ĩcĩ abũnna.
Nyekuc, mĩnanintia cunni cobbi,
dẽca aneeta elintia cunni ĩcĩ alna kũdũt.
14 Ẽẽla niia ngatĩ kithiowẽ rĩkan,
nyĩ anya kitio rĩkan loota ĩcĩtõõnĩ,
ẽẽla aneeta eetĩnẽy cĩk akanana aneeta,
ẽẽlawa maamĩy cĩk wuuntik.
15 Nyĩ anyi maam kubungta aneeta,
kõdẽ nyĩ anyi maam kukkuyyia aneeta,
kõdẽ nyĩ anya kukkuwa loowa.
16 Makayyioit, dẽca aneeta,
nyatarka athimatĩth mĩnanĩ cunnie,
ijjia kĩ aneeta tamatintia cunni.
17 Nyĩ alugunyi niia nguum cunni ĩcĩ ticciannioit cunni.
Dẽca tamanoko, nyatarka kaavẽ na hecintia.
18 Ijjia ẽẽla aneeta, ẽẽlawa
eetĩnẽy ĩcĩk akanana aneeta.
19 Aga niia gõõl cĩ balna adaacia mĩrõwa cĩganniek aneeta,
ngatĩ anyia kangawanũ,
acini niia mĩrõk cĩganĩk vẽlẽk.
20 Uduul balna dacinetĩ thĩnĩn cannĩ,
ĩthõng athii woccia gii cĩ kadĩmani na tõõ,
Kadiimi balna na tamati,
ĩthõng thĩ, athii kẽnnẽ cĩ karũba buu,
nyatarka eet cĩk woccia amanymanyana aneeta,
ĩthõng thĩ, athii kẽnnẽ cĩ kamũda na ĩnõõgõ.
21 Aari balna nẽẽgẽ kaal cĩk aakaatĩ ahata cannĩ.
Mĩ arukca kõr, anya kẽnnẽ mẽrtẽ cĩ aakaatĩ.
22 Anyĩk woccia niia dainit cĩnĩng kayaktak ĩnõõgõ pĩrnanẽt.
Anyĩk woccia niia peyian cĩnĩng kĩĩ detinit cĩnĩng.
23 Anyĩk woccia niia ĩnõõgõ vẽlẽk kĩĩtõ rubẽnẽ!
Anyĩk bowuci cĩgĩk kigiinycie dõõkĩthĩ!
24 Tduutik niia ĩnõõgõ varac cunni,
anyĩk varac cunni kõdõlan ĩnõõgõ.
25 Anyĩk woccia niia kõrõõk cĩnĩng kaavu kaganoko,
anyĩk eet kithiic cĩ abaak tugguẽtẽy cĩgĩk.
26 Nyatarka uuk nẽẽgẽ eet wũk balna itirithu niia vẽlẽk,
ĩthõng ẽtẽd nẽẽgẽ eet wũk balna ẽẽn bõtõk, nyatarka thõõth cunni.
27 Tẽẽd gerthetin cĩnĩng vẽlẽk,
nyĩ ẽẽla ĩnõõgõ kũdũt.
28 Anyĩk woccia niia thar cĩgĩk kupucciantiay
nyaragawa cĩ rũgẽtõ,a
ĩthõng nyĩ anyi keteheddie thara cĩgĩk kõdõwẽ
kĩ thar cĩk eet cĩk abũnna.
29 Kaavẽ na wuciitha kĩ mothintia.
Nyekuc, anyĩk woccia niia elianĩt cunni kẽẽla aneeta.
30 Kadihithi katĩ na thar cĩk Nyekucak tẽgẽla,
ĩthõng kubulutha ĩnõõnõ ngatĩ kẽnnẽcẽ ne, ibalallẽ.
31 Anyi katĩ thõõth coo Makayyioit kẽbẽlbẽl kijiar tõmõt,
ijiar thõõth coo ole cĩ ayak otoo kĩ mẽcẽhẽlẽn cĩgĩnĩk.
32 Acĩnẽ katĩ ngĩjũrra, ĩthõng ebelbelita.
Niigia cĩk ẽrẽppannu Nyekuc, aruknu woccia niigia kũdũt!
33 Athĩrar Makayyioiti thõõth cĩ eet cĩk apĩrna,
ĩthõng athii cĩ abũrĩ ticcianniok cĩgĩnĩk cĩk agamnyi.
34 Anycĩk niigia tammutiddin kĩ looc kĩdĩhĩthĩt ĩnõõnõ,
kĩ bũlũc kĩ kaal cĩk arũgĩ cĩk aatĩ ĩcĩtõ vẽlẽk,
35 nyatarka ẽẽl katĩ Nyekuci eet cĩk Thionĩ,
ĩthõng ẽtẽngẽny korookjiok cĩk gaalawu cĩk obbitik
cĩk Yudaa naboo.
Ĩthõng katĩ abaaitõ eeta natẽ, ĩthõng aryik kĩĩ looc cĩnĩng,
36 abarĩc katĩ doolia cĩk ticcianniok cĩgĩnĩk looc,
ĩthõng katĩ abaak eeta cĩk amĩnan ĩnõõnõ natẽ.