Tẽgẽl 68
Ẽẽn tẽgẽl cĩ Davide coo, cĩ eyeleei makayyioiti belliok kebelit.
1 Nyekuc, tĩnga jiena thaan
mĩrõk cugunik kathaantẽ,
anyĩk eet cĩk aaburnecci aniitia
kivirit keelia rũgẽt cĩnĩng.
2 Ingkawei woccia niia ĩnõõgõ tuu,
kĩ burruti cĩ abũ ngõõtĩ,
kĩcĩ õbõõ gua doolian, noko buu,
adaaĩ woccia eeta cĩk gerthek
buu nguuma cĩ Nyekuco.
3 Ĩthõng thĩ, ẽbẽlbẽl woccia eeta cĩk abũnna,
ĩthõng atalit nguuma cĩ Nyekuco,
aatĩ woccia nẽẽgẽ talintia,
ĩthõng egerenyit bẽlbẽllõna.
4 Ebelliek niigia Nyekuc tẽgẽl,
ebelit dĩhĩthẽnĩt cĩ thar cĩgĩnĩk,
ĩdĩhĩthĩt ĩnõõnõ cĩ õwõ diithiowẽy,
athĩ thar cĩgĩnĩk Makayyioit,
ebelbelit nguuma cĩnnĩ.
5 Nyekuc cĩ aavĩ Ciitha cĩnnĩ ĩcĩ Dĩhĩmĩ,
athũnnĩ boyyiok kĩ ngaay cĩk bõyyĩk.
6 Anyi nẽ eet cĩk ũtũngtothĩk nẽẽgẽ dõ,
eet cĩk tatũk codoi kabaaitõ ngatĩ odoi,
ĩthõng õõga eet cĩk ecebjie ngatĩvõrĩ kaavutõ jurrung,
ĩthõng thĩ kẽnnẽ, aavutõ eeta cĩk abũrĩ ĩnõõnõ
looca cĩ atũũth kõr kõdõõk kak.
7 Nyekuc, kõr wũ balna aluuguanẽ niia eet cugunik
õwõyya balna niia baatha cĩ õdõõĩ kak,
8 õmmõtĩ balna lõõcĩ,
ĩthõng ikiyyia ĩtĩĩl tammu uuk looc,
nguuma cĩ Nyekuco Thiira cĩ Thĩnaĩ,a
nguuma cĩ Nyekuc cĩ Ĩthraĩlĩ.
9 Nyekuc, itiona balna niia tammu cobbi kĩtĩĩl,
anyiwu balna niia looc cunni
cĩ eberiay kũbũna naboo.
10 Ivitia balna etengenyit eeta cugunniek korookjiok natẽ,
bũnnatina cunni, ũthũũtẽ niia ngĩjũrra.
11 Aduwa balna Makayyioiti thõõth,
ĩthõng balna mẽẽlĩ ngaay
cĩk aduwa nyemut cĩnnĩ cĩ athĩ ne,
12 “Ivirit alaanẽta kĩ nyĩcẽkẽr cĩgĩk!
Engerit ngaay ijjio cĩk agammiay jora,
13 umuddia ijjio kĩ kurrienya cĩk ayak kavutanẽ
cĩk ẽẽn thĩĩk cĩk athĩ kathalkathal,
ĩthõng ẽẽn kavurẽ daab,
balna ngĩ alugunyi alaanẽta kĩ nyĩcẽkẽr
teenyuanĩy ĩcĩk athaanu balna jora.”
14 Nyekuc cĩ Tiiri cĩ Ijiar vẽlẽk,
athaani balna niia alaanẽt looca nĩĩcẽ,
kĩ tammu cĩ atĩĩlĩ thiira cĩ Thaalmõnĩ.
15 Ĩthĩ makatẽ thiiryiowa cĩk Bathanĩ cĩk dĩhĩmĩk,
thiiryiok cĩk ayak vatĩk cĩk wuuntik
cĩk õvvõ tiddina cĩk meelĩk!
16 Niigia thiiryiowa, nyia ĩcĩnĩt tanawintia,
thiir cĩ ẽbẽra Nyekuci kaavue,
ngĩtĩ aavẽ katĩ Makayyioiti kũdũt wo?
17 Mẽẽlĩ toromilẽta cĩk Nyekucak cĩk agurut nyangõlẽnya,
ẽẽn vucciaknya kĩ vucciaknya cĩk meelĩk õrrõt,
iriowa balna Makayyioiti kĩ ĩnõõgõ ĩcĩ Thiir cĩ Thĩnaĩ
kikiyyia kitio Ciith cĩnnĩ.
18 Makayyioit, otodu balna niia uuwu tiddina,
atĩ balna niia eet cĩk meelĩk cĩk agamnyie,
anyi balna eeta aniitia anyintiok,
kõdẽ eeta cĩk gerthek buu anyi aniitia anyintiok,
kĩĩ woccia avvu niia Nyekuci natẽ.
19 Kaanycĩk dĩhĩthẽnĩt Makayyioit, Nyekuc Ellioit cĩnac
cĩ õdõng pĩrnanẽt cĩnac dõõkĩthĩ.
20 Ẽẽn Nyekuci cĩnac, Nyekuc cĩ ẽẽlaneeta.
Ẽẽn nẽ Tiiryioit Makayyioit cĩnac, cĩ ẽẽlaneet daaĩtha.
21 Dĩdĩ, alib katĩ Nyekuci ooti cĩk mĩrõk cĩgĩnĩk,
ooti cĩk eet cĩk alna athii cĩ uungni gerthetin cĩnĩng.
22 Athĩ Makayyioiti ne, “Kõbõdanẽ katĩ na mĩrõk cĩganĩk Bathana,
kõbõdanẽ katĩ ĩnõõgõ bulucuanĩy,
23 kĩĩ woccia õtõõth niigia biyyietĩy cĩgĩk,
ĩthõng ũwũdĩt kũrthĩĩ cuguk biyyie cĩgĩk kĩcĩ adiim nẽẽgẽ.”
24 Nyekuc, kĩcĩnta naaga meelitin cĩ owobji aniitia
õvvõ Ciitha cĩ Nyekuc cannĩ kĩ Alaan cannĩ.
25 Õwõ belliowa ĩcowu, ĩthõng õwõbta eeta kidorĩtẽy vurtia,
ĩthõng kõrgẽna, õtõõthõ buweeci cĩk õrõĩ cõõrĩna.
26 Adihiththu niigia Nyekuc meelitina ĩcĩ obbi ĩcĩ eet cĩgĩnĩk,
ĩdĩhĩthĩt Makayyioit niigia doolia cĩk Ĩthraĩlĩ vẽlẽk,
27 Uwantanĩ ĩcĩ owu tatũk cĩ dĩcĩ cĩ Benyamini,
ĩthõng õwõbtẽẽĩ makayyiowa cĩk Yudaa kĩ meelitin cĩnĩng,
ĩthõng õwõbtẽẽĩ makayyiowa cĩk Thebuluni kĩ cĩk Navtali.
28 Nyekuc, yelehet ageeta tiirthẽt cunni,
Nyekuc, makathĩta wũ balna aticaninie niia, nyatarka ageeta.
29 Nyatarka aavĩ Ciith cunnie Yeruthalẽma,
ayahaci katĩ alaanẽta anyintiok.
30 Gerenyek mĩrõk cĩk loociowu
cĩk aatĩ kĩ kẽlẽgẽ galalay,
kĩ cĩk õgõõn kĩ ollenya cĩk arũmẽ kĩ maala.
Anyĩk thẽk woccia ĩnõõgõ kayakta
thĩĩk cĩk athĩ kathalkathal cĩk meelĩk kaanyci aniitia,
wũk anyi eleeti cĩgĩk aniitia kĩĩtõ dĩcẽ.
Thaan eet cĩk loociowu cĩk ẽbẽlbẽl, nyatarka jõrẽnĩna.
31 Avvu katĩ gaala cĩk itiona alaanĩ cĩ Ijibi,
akaneei katĩ eeta cĩk looc cĩ Kuuthi Nyekuc kuthungti cĩgĩk.
32 Niigia kabicõnĩnẽ cĩk loocu, ebelliek Nyekuc tegelua,
ebelliek Makayyioit dĩhĩthẽnĩt,
33 cĩ ẽẽn macuccioit tammuatiddina cĩ rẽẽnĩ,
cĩ õthõõth moloowa cĩnnĩ cobbi cĩ õgõõn
kĩ tammu cĩ icciayyi thõng,
34 Uduktia niigia tiirthẽt cĩ Nyekuco
cĩ ẽẽn tiirthẽt eetĩnẽy ĩcĩk Ĩthraĩlĩ,
cĩ aavĩ makathĩtĩ cĩnnẽ diithiowẽy.
35 Nyekuc, ubulanet niia ngatĩ ẽẽktanẽ Ciitha cunni,
anyi Nyekuci cĩ Ĩthraĩlĩ eet cĩgĩnĩk tiirthẽt kĩ makathĩt.
Kĩdĩhĩthĩt naaga Nyekuc!