Tẽgẽl 66
Ẽẽn tẽgẽl coo, cĩ eyeleei makayyioiti belliok kebelit.
1 Ĩthĩrantek Nyekuc talintia,
niigia eeta vẽlẽk cĩk loocak.
2 Ebelit bulẽnĩt cĩ thar cĩgĩnĩk.
Anycĩk dĩhĩthẽnĩt cĩnnĩ kubulie.
3 Entek Nyekuc ne, “Anaat eeta tiicanẽ cugunik õrrõt!
Maka tiirthẽtĩ cunnie õrrõt, ĩthõng nyatarka tiirthẽt coo,
otogolliai mĩrõwa cugunniek nguuma cunni.
4 Ulul katĩ eeta vẽlẽk cĩk loocu ooti cĩgĩk nguuma cunni,
adihiththi katĩ nẽẽgẽ aniitia,
ĩthõng ebelliek dĩhĩthẽnĩt thar cugunik.”
5 Ivitia niigia ĩcĩnĩt thõõth cĩ atican balna Nyekuci,
aticaneei gõõ nẽ eet thoothonniok cĩk anatti!
6 Ũũwũ balna nẽ bũlũc kĩĩ looc cĩ õdõõĩ,
abaakci balna nẽẽgẽ.a
Ivitia niigia ebelbelit kĩ ĩnõõnõ.
7 Agam nẽ looc kũdũt makathĩta cĩnnĩ.
Ẽbẽk nẽ loociok kẽbẽrẽnĩy cĩgĩnĩk,
anycĩk niigia kithii eeti cĩ abũrĩ ĩnõõnõ tõõ.
8 Eeta vẽlẽk, ĩdĩhĩthĩt Nyekuc cĩnac,
anycĩk molook cĩ dĩhĩthẽnĩt cĩnnĩ kĩthĩhẽ,
9 anyet balna nẽ kũrũgĩt,
ĩthõng ngaanĩ kaanyĩk thoo cĩgaac kuukitõ looc.
10 Nyekuc, ĩtĩmanet balna niia ageeta,
anyet ageeta kiittia callẽ,
kĩ thiihiti cĩ athĩ kathalkathal
cĩ atũũthĩ guyyia kĩĩ calla.
11 Agamnyet balna niia ageeta nyeritiewa cunni,
ĩthõng ariwu ijjio cĩk adĩngdĩngĩ bowucinẽy cĩgaak.b
12 Anyiwu niia eet kotoththi ooti cĩgaak,
kotoththia balna naaga guyyiatõ kĩ maamĩy,
ĩthõng thĩ kẽnnẽ, balna ayahahet niia ngatĩ
kamũdania kaal cĩk meelĩk.
13 Kayaha katĩ na kaal cĩk otodongnyi cĩk avaaddi Ciitha cunni,
katicaneci katĩ na kõngan wũ balna kaduwaci nana,
14 kõngan wũ balna aduwacci kũtũgĩ cannie aniitia,
balna ngaanĩ kacanannie.
15 Kapaaeci katĩ na kaal cĩk adĩhĩ,
ĩthõng kaanyi katĩ mĩrkĩcĩ,
kaanyi katĩ ollenya kĩ ẽẽtha.
16 Ivitia ĩthĩktõy niigia vẽlẽk eeta cĩk ongolinu Nyekuc,
kaduwacung katĩ na gii wũ balna adĩmaneca nẽ aneeta.
17 Kaluei balna na ĩnõõnõ kũtũga cannĩ,
kadihithi ĩnõõnõ ahaata cannĩ.
18 Ma balna ngĩ katarnanẽ na gerthetin cannĩ thĩnĩna cannĩ,
athii woyyia baalia cĩ athĩkna Makayyioiti aneeta,
19 ĩthõng thĩ, ikiyyia ĩthĩrara Nyekuci aneeta dĩdĩ,
ikiyyia ĩthĩk nẽ lawinit cannĩ.
20 Dĩhĩthẽnĩt kĩ Nyekuc,
wũ balna ẽlẽmĩ lawinit cannĩ,
ĩthõng aanya nẽ mĩnan cĩnnĩ cĩ alna kũdũt.