Tẽgẽl 65
Ẽẽn tẽgẽl cĩ Davide coo, cĩ eyeleei makayyioiti belliok kebelit.
1 Nyekuc, abũnna ngatĩ kadihiththi naaga aniitia Thiona,
ĩthõng kuthuttia naaga thoothonniok cĩk kõngan
cĩ balna kaduwana naaga ĩcunni.
2 Niia, cĩ athihi lawinit wo,
avvu katĩ eeta vẽlẽk ĩcunni.
3 Ma balna ngĩ ijiaryet ageeta thoothonniowa cĩk gerthek,
ikiyyia atamatiwu niia gerthetin cĩnang.
4 Agatantẽ eeta cĩk ẽbẽra niinia,
ĩthõng ayaha ĩnõõgõ kivitia kaavutõ reerunga cunni.
Ũwũpantẽt katĩ ageeta kaala cĩk abũnna cĩk Ciith cunni,
Ciitha cunni cĩ Dĩhĩmĩ.
5 Nyekuc Ellioit cĩnang, atajannet niia ageeta gõõla,
cĩ anyet thoothonniok cĩk mũrrĩk cĩk anaat eeta,
aryik eeta loociowẽy vẽlẽk thinneti cĩgĩk kĩ aniitia,
kõdẽ eeta cĩk abaak titimmuanĩy
cĩk bulucuanu ĩcĩk aatĩ rẽẽna,
6 cĩ balna ẽngẽnyca niia thiiryiok tiirthẽta cunni,
ẽyẽla niia tiirthẽt cunni cobbi õrrõt,
7 cĩ balna anyi niia bulucua cĩk ẽgẽrẽny kaavutõ tiv
kĩ mugẽn cĩk maamu cĩk ẽgẽrẽny kĩjaktõy,
anyi niia loociok cĩk uukõy kayait ganõn.
8 Eeta cĩk attĩyya rẽẽna ongollie
thoothonniok cugunik cĩk anaat eeta,
ebeleci katĩ eeta vẽlẽk cĩk loocak
cĩk abaak tõõna ĩcĩ alibanĩ kõr
kĩ cĩk okolothĩcẽ kõr tegelua.
9 Athũnnẽ niia looc gõõla cĩ anyĩcẽ tammu kĩtĩĩl,
ĩthõng anyiwu tõdõwa kũbũnta jurrung.
Abbĩththĩ lilliok cugunik maama,
kayaktak eet labĩ,
nyatarka aniitia balna cĩ atukwuani thõõth coo.
10 Atduuti niia manẽẽn maam,
ĩthõng ĩdĩmanewu tõdõwa jurrung.
Itiona tammu kĩtĩĩl kõcõk tõdõwa,
ĩthõng agatanu labĩ kĩtĩlĩthĩt.
11 Anyi niia erkit dainit cĩ obbi,
ma ngĩ õkkõ niia looc vẽlẽk,
amũdothi dainit cĩ obbi.
12 Akula kartienti jurrung baatha ĩcĩ õdõõĩ kak,
ĩthõng ebelbelit thiiryiowa.
13 Ẽggẽcõ kaala cĩk meelĩk baatha,
ĩthõng ĩbbĩtĩt toloowuana labĩ.
Acalcallit kaala vẽlẽk,
ĩthõng ebelliõy talintia.