Tẽgẽl 64
Ẽẽn tẽgẽl cĩ Davide coo, cĩ eyeleei makayyioiti belliok kebelit.
1 Nyekuc, kacanannie nana, thĩk lawinit cannĩ,
kongollie na mĩrõk cĩganĩk, ẽẽl niia rũgẽt cannĩ.
2 Lugunya aneeta tukwuana cĩ eet cĩk gerthek
kĩ meelitina ĩcĩ eet cĩk ẽẽn gẽrẽthanniok.
3 Ĩvõl nẽẽgẽ ahaatua cĩgĩk kaavutõ kĩ nyetubanya,
ĩthõng ehemtek nẽẽgẽ eet thoothonniok cĩgĩk
cĩk õgõõn kĩ nyarangĩta.
4 Ataguuthik nẽẽgẽ et, ĩthõng uruit ĩnõõnõ cĩ amĩrĩ,
iccia nẽẽgẽ ĩnõõnõ tamanoko, athii cĩ ongollie.
5 Atĩrĩthõy nẽẽgẽ nyaguana thoothiowẽy
cĩk atukwuan ĩcĩk gerthek,
ĩthõng othoothitõ vatĩk cĩk aarĩcẽ detinit cĩnĩng,
õthõõth nẽẽgẽ athĩ ne, “Ngẽnẽ katĩ cĩ acĩnnet ageeta?”
6 Atukwuan nẽẽgẽ thoothonniok cĩk gerthek, ĩthõng ĩĩtõ ne,
“Kutukwuanit balna naaga thõõth cĩ katĩ edenyiay kiticanẽ.”
Dĩdĩ, ẽẽn thĩnĩn kĩ muwẽẽnĩt cĩ eeto thõõth cĩ alugunyi.
7 Ĩthõng thĩ kẽnnẽ, iccia katĩ Nyekuci ĩnõõgõ nyarangĩtẽy,
ĩthõng katĩ icciayyie nẽẽgẽ tamanoko kuukitõ looc.
8 Eteedi katĩ nẽ ĩnõõgõ thoothonniok cĩgĩk ẽẽ,
ĩthõng katĩ ayahak nẽ ĩnõõgõ thaniniet,
ĩthõng eeta cĩk acĩn ĩnõõgõ,
alĩnglĩngan katĩ ooti cĩgĩk barritõna.
9 Abarrit katĩ eeta vẽlẽk,
aduwa katĩ nẽẽgẽ tiicanẽ cĩk Nyekucak vẽlẽk,
ĩthõng amuk katĩ nẽẽgẽ tiicanẽ cĩk atican balna nẽnẽ.
10 Anycĩk eet cĩk abũnna kebelbelit ĩcĩ Makayyiokto,
ĩthõng abaaitõ ĩcĩnnĩ.
Anycĩk eet cĩk abũnna thinneti
vẽlẽk kĩdĩhĩthĩt ĩnõõnõ.