Tẽgẽl 62
Ẽẽn tẽgẽl cĩ Davide coo, cĩ eyeleei makayyioiti belliok kebelit.
1 Arũba thĩnĩn cannie yuwuthõn ĩcĩ Nyekuco dõ,
aku ellianĩtĩ cannie kĩ ĩnõõnõ.
2 Ĩnõõnõ dõ cĩ ẽẽn thiir cannĩ, ĩthõng ẽẽn elianĩt cannĩ.
Ẽẽn nẽ ngĩtannĩ cĩ alũwẽ kõkõm,
athii katĩ gii cĩ omonnia tõõ.
3 Ĩĩthõng katĩ kĩĩ tĩngan cĩ uukonu niigia kĩ et?
Atdukeecu woccia niigia ĩnõõnõ looc,
cĩ õgõõn kĩ lũwatĩ cĩ adiim ngĩ oyokci?
4 Adiimnyu niigia ngĩ ayahanu ĩnõõnõ loota,
nginiwa ĩcĩnnĩ ĩcĩ wuuni.
Atalnecu niigia võlõng,
othooththu niigia gatan kutugetinẽy cuguk, ĩthõng thĩ,
kẽnnẽ niigia thinnetinẽy cuguk, aciinenu thõng.
5 Arũba ririwacĩ cannie yuwuthõn ĩcĩ Nyekuco dõ,
nyatarka aku muwẽẽnĩtĩ cannie cĩ abũnna ĩcĩnnĩ.
6 Ĩnõõnõ dõ cĩ ẽẽn thiir cannĩ cĩ athunnia aneeta, ĩthõng ẽẽlanĩ.
Ẽẽn nẽ ngĩtannĩ cĩ alũwẽ kõkõm,
athii katĩ gii cĩ omonnia tõõ.
7 Aku ellianĩtĩ cannie kĩ dĩhĩthẽnĩt cannĩ ĩcĩ Nyekuco dõ.
Athunnia nẽ aneeta, ĩthõng ĩthĩ thiir cannĩ cĩ kalugunyẽnẽ nana.
8 Niigia eeta, aryik thinneti cuguk kĩ ĩnõõnõ wathinniowẽy vẽlẽk.
Uduktiak ĩnõõnõ thoothonniok cuguk vẽlẽk,
nyatarka ẽẽn Nyekuci ngĩtĩ kalugunyẽnĩ naaga.
9 Eeta cĩk athii cĩ tiirti, ẽẽn nẽẽgẽ eet kaganoko kĩ tivongi,
ĩthõng eeta cĩk tiirtik, õgõõn nẽẽgẽ kĩ võlõnga.
Ma ngĩ kamuk ĩnõõgõ,
ẽẽn nẽẽgẽ vẽlẽk eet kaganoko, õgõõn kĩ tivongi.
10 Nyĩ aaricu thinneti cuguk thõõth cĩ adiim
agamanu kaal õõgĩ tiirthẽta,
kõdẽ engerennu katĩ ngĩ ogorothu kaal õõgĩ,
kõdẽ woyyia kĩtooryie ijjio cuguk,
nyĩ aaricu ĩnõõgõ thinneti cuguk.
11 Õthõõth balna Nyekuci thõõth codoi,
kathĩrari balna na thoothonniok ramma,
Nyekuc, eeni niia tiir,
12 Makayyioit, amĩnani niia eet kũdũt.
Adũmani niia eet codoi codoi vẽlẽk,
nyatarka tiicanẽ cĩgĩk.