Tẽgẽl 57
Ẽẽn tẽgẽl cĩ Davide coo, cĩ eyeleei makayyioiti belliok kebelit. Ẽbẽla balna Davidea tẽgẽl coo kõrra wũ balna avirẽcĩ nẽ alaan Thaulo, ĩthõng ũũk ulugunyie ngiloma.
1 Nyekuc, tamatĩha aneeta tamatĩhanĩ,
nyatarka alugunyi ririwacĩ cannie kĩ aniitia.
Kalugunyie katĩ na ria cĩ kavutanẽ cugunik,
kuumuc kithii thõõth cĩ gerthe wo tõõ.
2 Kavvũ na Nyekuc cĩ Ijiar vẽlẽk,
Nyekuc cĩ anya tukwuan vẽlẽk cĩ adiim nẽ ĩcannĩ.
3 Itionaca katĩ Nyekuci elinit tammuatiddina aneeta,
egerenyeei nẽ eet cĩk aratanna aneeta,
ẽyẽla Nyekuci mĩnan cĩnnĩ kĩ thõõth cĩnnĩ cĩ athũnnĩ nẽ.
4 Alĩhana aneeta mĩrõwa cĩk aatĩ kĩ maata,
ĩthõng aatĩ nẽẽgẽ kĩ kẽlẽgẽ cĩk muotĩk cĩk adak boobo,
aatĩ nyĩgĩta cĩgĩk kĩ dĩlanya kĩ nyarangĩta,
ĩthõng aavutõ ahaatuana cĩgĩk kĩ nyetubanya cĩk lẽhẽdĩk.
5 Nyekuc, abulie niia tammuatiddina tiddina,
ĩthõng anyĩk kaavu bulẽnĩtĩ cunnie loota ngato vẽlẽk.
6 Edettia mĩrõwa cĩganniek aneeta nyeritiewa kĩĩ kagamta thoo cĩganĩk,
ukkuwa aneeta pĩrnanẽtĩ.
Adaacõ balna nẽẽgẽ look gõõla cannĩ,
ĩthõng kẽnnẽ utduktothĩk nẽẽgẽ ĩcĩtõ mĩn.
7 Nyekuc, kaari na thĩnĩn cannĩ ĩcunni,
õkõmĩ thĩnĩn cannie,
kebellie katĩ, ĩthõng kidihithina!
8 Tĩnga jiena ririwacĩ cannie!
Tĩnga jiena kidori cannie!
Kĩngathi katĩ na ngĩ iliba kõrra.
9 Makayyioit, kadihiththi katĩ na aniitia loociowẽy vẽlẽk,
kadihithi katĩ na aniitia kõrgẽna cĩ eetu.
10 Arawak mĩnanĩ cunnie cĩ alna kũdũt tammutiddin,
uwum thõõth cunnie cĩ athũnnẽ niia diithiok.
11 Nyekuc, abulie niia tammuatiddina tiddina,
ĩthõng anyĩk bulẽnĩt cunni kaavu loota ngato vẽlẽk.