Tẽgẽl 56
Ẽẽn tẽgẽl cĩ Davide coo, cĩ eyeleei makayyioiti belliok kebelit. Ẽbẽla balna Davidea tẽgẽl coo balna ngĩ avvu agam eeta cĩk Vilithia ĩnõõnõ ngatĩ athĩ Gath.
1 Nyekuc, tamatĩha aneeta, nyatarka alĩkca eeta aneeta.
Ingkayya nẽẽgẽ aneeta waathĩn tub.
2 Umurya eeta cĩk adaacca aneeta waathĩn tub.
Mẽẽlĩ mĩrõwa cĩk ayahaca jore ngẽrẽna cĩnĩng.
3 Katĩ ngĩ kongollie gii ĩmma,
kaari katĩ na thĩnĩn cannĩ kĩ aniitia,
4 Nyekuc, kadihiththi na aniitia,
nyatarka thoothonniok wũk balna aduwa niia,
kaari na thĩnĩn cannĩ Nyekuca, ĩthõng athii cĩ kongollie.
Nyia woccia cĩ adĩmaneca aneeta eeti cĩ olli wo?
5 Ũũwũ mĩrõwa cĩganniek thoothonniok cĩganĩk tub,
atukwuan nẽẽgẽ dõõkĩthĩ gõõl cĩ adĩmania buth!
6 Alũtẽ nẽẽgẽ õrrõtta aneeta,
ĩthõng ebeit gõõl cĩ kõkõyyẽ nana,
kĩĩ katĩ kuruktanĩ.
7 Nyekuc, uuk ĩnõõgõ, nyatarka gerthetin cĩnĩng,
tamac loociok nĩĩkẽ varacintia cunni!
8 Tẽhẽẽd niia goolliok cĩk kacanannie nana,
aga niia ngatĩ kalue na õrrõt.
Athii wõnõ balna cĩ eheeddi nẽẽgẽ nyaragawa cunni?
9 Kõrra cĩ katĩ kavvuyyi na aniitia,
amiiri katĩ mĩrõwa cĩganniek.
Ma katĩ ngĩ edenyiay thõõth coo
kagga katĩ na ngatĩ aavẽ Nyekuci tõõna cannĩ.
10 Kadihithi na thõõth cĩ Nyekuco,
kadihithi na thõõth cĩ aduwa Makayyioiti.
11 Kaari na thĩnĩn cannĩ kĩ ĩnõõnõ, athii katĩ cĩ kongollie gii ĩmma.
Nyia woccia cĩ adahia eeti ĩmma wo?
12 Nyekuc, kaanyi katĩ na gii wũ balna kabũtanecina,
kaanyi katĩ anyinit cannĩ cĩ kenneci ne, ibalallẽ.
13 Nyatarka ẽẽlawa niia aneeta daaĩtha,
ĩthõng ĩthĩnga anya kijiarẽ.
Ĩthõng yoko, kõtõõwa woccia na nguuma cunni,
lanyĩta cunni ĩcĩ anya aneeta rũgẽt.