Tẽgẽl 55
Ẽẽn tẽgẽl cĩ Davide coo, cĩ eyeleei makayyioiti belliok kebelit, ĩthõng uruit kidõrẽta.
1 Nyekuc, thĩk lawinit cannĩ,
nyĩ aburi ulua cannĩ cĩ elintio!
2 Thĩrara aneeta, ĩthõng ẽdẽcanĩ,
nyatarka ẽdẽcaha aneeta barritõnĩ cĩ gerthe.
3 Ngĩ kathihi na mĩrõk cĩganĩk ngĩ egerenyeca aneeta,
ngĩ ẽgẽlẽmnya eeta cĩk gerthek aneeta,
nyatarka ayahaca nẽẽgẽ aneeta hecinit,
ĩthõng õthõõththa nẽẽgẽ aneeta varaaca.
4 Abarrit thĩnĩn cannie,
ĩthõng kõtõngõlẽ thoothonniok cĩk daaĩth cannĩ.
5 Agama aneeta tongolinti kĩ barritõn,
acananna thõõth cĩ tongolinit cĩ gerthe aneeta kũdũt.
6 Kathĩ balna na ne, “Kayai koccia kavutanẽ kĩ kurrie!
Ĩthõng thĩ, kukula koccia, ĩthõng kũmũda yuwuthõn.
7 Kaviri koccia kõkkõ rẽẽna,
kũũk kaarĩk kõrõõk ngatĩ ẽẽn baath cĩ õdõõĩ kak.
8 Karũba koccia ngĩtĩ kaavẽ tamanoko,
kĩthĩ rẽẽn kĩ kuvuro.”
9 Makayyioit, talmanyan tukwuan
cĩ eet cĩganĩk cĩk aaburnecca aneeta,
nyatarka kacini na jore õlõõ ĩcĩ gaalawu.
10 Alĩha nẽẽgẽ lũwat cĩnnĩ waathĩn kĩ baalin,
aaburneei nẽẽgẽ eet, ĩthõng adĩman eet buth natẽ.
11 Athaanẽ gii vẽlẽk õlõõ cĩ gaalawu,
abbĩththĩ ratanĩ kĩ volongnyiok goolliowẽy.
12 Ma ngĩ ẽẽn miroit cĩ arannia wo,
komogi woccia ĩnõõnõ,
ma kĩĩ miroit cĩ aku kuuktowa kĩ aneeta,
kalugunyi woyyia ẽlẽ cannĩ ĩcĩnnĩ.
13 Ẽẽn kẽnnẽ aniitia et cĩ kaduwõy kĩ aneeta,
gõõna cannĩ, gõõna cĩ thĩnĩn cannĩ,
14 Karũmẽ balna ngatĩ odoi talintia
kĩ cĩ kõwõ kĩ meelitin kõvvõ Ciitha ĩcĩ Nyekuco.
15 Nyekuc, anyĩk daaĩth
kẽdẽca mĩrõk cĩganĩk,
anyĩk ĩnõõgõ kadayyie rũgẽtẽt kõõt
looca cĩ daakciawu,
nyatarka aavĩ thõõth cĩ gerthe
thinnetinẽy cĩgĩk.
16 Kavvũ kẽnnẽ na Nyekuc,
ĩthõng ẽẽla Makayyioiti aneeta.
17 Õkkõ ulua cannie ĩcĩnnĩ,
ngerethietĩna, waathĩna, jiatĩna vẽlẽk,
ĩthõng ĩthĩrar nẽ molook cannĩ.
18 Ẽẽla nẽ aneeta
jõrẽnĩnẽy cĩk kuukonia na,
kĩ mĩrõk cĩk meelĩk.
19 Nyekuc, cĩ agam looc vẽlẽk kũdũt,
athĩkna katĩ aneeta, ĩthõng anyĩk ĩnõõgõ kipiryia,
nyatarka abũrĩ nẽẽgẽ ngatĩ ũũwũĩ rũgẽt cĩnĩng,
ĩthõng athii cĩ ongollie Nyekuc.
20 Uukõy eeti cĩ ẽẽn gõõna cannĩ kĩ gõõnõgĩ cĩgĩnĩk,
ĩthõng ĩthĩnga athũnnĩ ngẽrẽmngẽrẽm wũ balna aduwa nẽnẽ.
21 Õgõõn moloowĩ cĩnnẽ kĩ ngooroc cĩ vudento,
ĩthõng kẽnnẽ, aabureei nẽ eet thĩnĩna cĩnnĩ,
õgõõn thoothonniowa cĩgĩnnẽk kĩ ngooroc cĩ vudento,
ĩthõng thĩ kẽnnẽ, õgõõn nẽẽgẽ kĩ kabaathĩ cĩ lẽhẽdĩ.
22 Tũngẽẽĩ hecinit cunni vẽlẽk Makayyioit,
ĩthõng uthuuti katĩ nẽ aniitia,
athii cĩ anyi nẽ eet cĩk edeemi thõõth kitiathõ.
23 Ĩthõng thĩ, Nyekuc, aari katĩ niia eet
cĩk gerthek loowa ĩcĩ gẽrẽthaninto,
eet cĩk aruk eet, kĩ cĩk õvõlõngĩ.
Arũgĩ katĩ nẽẽgẽ wathinniok cĩk kĩdĩk kaganoko,
ĩthõng thĩ, kẽnnẽ kaari na thĩnĩn cannĩ kĩ aniitia.