Tẽgẽl 51
Ẽẽn tẽgẽl cĩ Davide coo, cĩ eyeleei makayyioiti belliok kebelit. Balna ngĩ aku eheronothi Nathanĩ,a eeti cĩ õthõõth molook cĩ Nyekuco Davide vurtia cĩ balna oginnie nẽ kĩ Bathẽba, ngaa cĩ et ĩmma.
1 Nyekuc, tamatĩha aneeta,
nyatarka mĩnan cunni cĩ alna kũdũt,
nyatarka bũnnatin cunni cobbi,
tũngek gerthetin cannĩ.
2 Tũũnya aneeta kĩthĩ calla,
ĩthõng upucana aneeta gerthetin cannĩ,
kĩĩ katĩ kĩthĩ calla.
3 Kagga na gerthetin cannĩ dĩdĩ.
Kagga na gerthetin cannĩ dõõkĩthĩ.
4 Kẽgẽrẽthana balna na kĩ aniitia dõ õrrõt,
ĩthõng kiticana gii cĩ gerthe kĩ aniitia,
kĩĩ katĩ thõõth cunnie kĩthĩ mũrra,
katĩ ngĩ othoothi niinia,
ĩthõng ĩthĩ thõõth cunnie dĩdĩ
katĩ ngĩ eteedi niia thõõth.
5 Kẽgẽrẽthana na balna thẽk dĩdĩ balna tirianta,
kẽgẽrẽthana na balna thẽk kõr
wũ balna ayahia yaangĩ kẽẽngatõ.
6 Ĩthõng thĩ, adiimi niia thõõth cĩ ẽẽn dĩdĩ thĩnĩna cannĩ,
limaneha aneeta gẽẽnyĩth ẽla cannĩ.
7 Pucana aneeta, ĩthõng katĩ kĩthĩ na calla.
Tũũnya aneeta, ĩthõng katĩ kĩthĩ na võõr pẽr
kijiar tammu cĩ ẽẽn lorudo.
8 Anya kĩthĩrar talinit, anyĩk ammẽ
wũk balna aduuli niia kebelbelit.
9 Luguny nguum cunni kithii cĩ acini gerthetin cannĩ,
ĩthõng ẽnyẽhẽ gerthetin cannĩ vẽlẽk.
10 Nyekuc cannĩ, tẽngẽnyaha thĩnĩn cĩ võõrĩ,
ĩthõng dĩman ririwac cannĩ kĩĩ jõr,
kĩĩ katĩ kotongolei na aniitia.
11 Nyĩ ingkayya nguuma cunni, nyĩ õkõyyẽ
ngatĩvõrĩ Ririwac cunni cĩ Dĩhĩmĩ kĩ aneeta.
12 Anya niia aneeta talinit
cĩ elianĩt cunni naboo,
ĩthõng anya aneeta ririwac,
kĩĩ katĩ kowobi aniitia.
13 Ĩthõng thĩ, kilimana katĩ gẽrẽthanniok
goolliok cugunik,
ĩthõng utuwuyyie katĩ gẽrẽthanniowa
ivitia kĩ aniitia.
14 Nyekuc, tũngek gerthetin cannĩ
cĩ karuwue balna na et nĩcẽ,
Nyekuc, ẽẽla aneeta, ĩthõng thĩ,
ẽbẽl katĩ kũtũgĩ cannie bũnnathĩt cunni
15 Makayyioit, puuk kũtũk cannĩ,
ĩthõng idihithi katĩ kũtũgĩ cannie aniitia.
16 Athii cĩ ebelbeli niia ngatĩ kaanyi gii cĩ cavĩto,
kõdẽ woccia ngĩ kaanyi na ĩnõõnõ.
Athii cĩ adiimi niia gii cĩ cavĩto cĩ avaaddi.
17 Gii cĩ cavĩto cĩ adiim Nyekuci, ẽẽn ririwac cĩ omoththie,
kĩ thĩnĩn cĩ omoththie gerthetin cannĩ,
Nyekuc, athii katĩ niia cĩ aburi ĩnõõgõ.
18 Nyatarka amanni niia Thion, dĩman ĩnõõnõ jurrung,
tẽngẽny dilatua cĩk Yeruthalẽmĩ kĩĩtõ wuunti.
19 Ĩthõng thĩ, elemu katĩ niia kaal cĩk cavawu cĩk abũnna,
kaal cĩk cavawu vẽlẽk cĩk avaaddi.
Ĩthõng ẽẽn katĩ olenya kaal cĩk cavawu
ngatĩ todongintio ngatunni.