Tẽgẽl 50
Tẽgẽl cĩ Athavĩ.
1 Õthõõth Makayyioiti Nyekuci cĩ Ijiar vẽlẽk,
ĩthõng ũtũvvũ eet vẽlẽk cĩk loocu
cĩk aatĩ ĩcĩ alibanĩ kõrra, kĩ ĩcĩ okolothĩcẽ.
2 Nyekuc cĩ dĩhĩmĩ õrrõt kũdũt,
cĩ alanyca Thiira cĩ Thionĩ,
3 Aku Nyekuci cĩnac, ĩthõng athii katĩ cĩ ĩjakci,
atũũthĩ gua ĩcĩ nguum cĩnnĩ,
ĩthõng avungan ngõõtĩ cĩ tiiri cĩ õyõkõn ĩnõõnõ.
4 Avvũ nẽ tammutiddin kĩ looc,
kĩĩ koccia kĩĩtõ kẽbẽrẽ cĩgĩnĩk
katĩ ngĩ ẽngẽr nẽ thõõth cĩ eet cĩgĩnĩk.
5 Õthõõth nẽ athĩ ne, “Uluttiahangũ eet cĩganĩk
cĩk athũnnĩ thõõth cannĩ,
eet wũk balna kadakca kĩ aneeta ngẽrẽmngẽrẽm
cĩ ẽẽn gii cĩ cavĩto.”
6 Uduwa tammutiddin bũnnathĩt cĩ Nyekuco,
nyatarka ẽẽn nẽ ẽla cĩnnĩ kir teedioit cĩ thoothiowu.
7 Õthõõth Nyekuci athĩ ne, “Niigia eeta cĩganniek,
ĩthĩktangũ kothoothi katĩ nana,
niigia eeta cĩk Ĩthraĩlĩ, kothoothi katĩ na,
thoothonniok cĩk ketedicung na agiitia cĩkkõ,
keeni na Nyekuc, Nyekuc cunung.
8 Athii na cĩ kegerenyecung agiitia,
nyatarka kaal cĩk cavawu cuguk,
kõdẽ nyatarka kaal cĩk cavawu cuguk cĩk avaaddi
cĩk aatĩ dõõkĩthĩ nguuma cannĩ.
9 Athii cĩ kadiimi na ole cĩ boore cunung,
kõdẽ ẽẽtha cĩk teenyua cuguk,
10 nyatarka ẽẽn kẽlẽgẽ cĩk bõõnak vẽlẽk cĩganĩk,
ĩthõng kabali na tĩĩn thiiryiowẽy cĩk ẽẽn vucciaknya.
11 Kagga na kĩballĩ vẽlẽk cĩk aatĩ thiiryiowẽy,
ĩthõng ĩĩtõ kẽlẽgẽ vẽlẽk cĩk aatĩ bõõnatõ cĩganĩk.
12 Ma da kadaha aneeta boobo, athii woccia cĩ kaduwacunga,
nyatarka ẽẽn lõõcĩ kĩ kaal vẽlẽk cĩk aatiyyie ĩnõõnõ cĩganĩk.
13 Amukcu niigia athinnu ne, kadai na kiding cĩ olenyawu,
kõdẽ kawudi biyyie cĩk ẽẽthawu?
14 Ũdũmantek Nyekuc kaal cĩk cavawu
cĩk enneccu ĩnõõnõ ne, ibalallẽ,
ĩthõng uthuuttu kõngan cunung ĩcĩ Nyekuc cĩ Ijiar vẽlẽk.
15 Utuvvuyyiangũ aneeta kõrra cĩ attiyyu pĩrnanta,
kõõganung katĩ na agiitia,
ĩthõng otongolliehangũ katĩ niigia aneeta.”
16 Ĩthõng thĩ, aduwaai kẽnnẽ Nyekuci et cĩ gerthe ethei ne,
“Nyia thõõth tĩrĩthẽntiok cĩganĩk wo,
nyia duwa ngẽrẽmngẽrẽm cannĩ wo?
17 Nyatarka abũrna niia aneeta ngatĩ katirithi nana,
ĩthõng utuburu thoothonniok cĩganĩk?
18 Ngĩ acini niia goryiait, ogorothinu kõdõwẽ kĩ ĩnõõnõ,
ĩthõng iriokcu kĩ eet cĩk õvõyyĩ ngaay cĩk eetu.
19 Õthõõth kũtũgĩ cunnie thõõth cĩ gerthe,
ĩthõng abbĩththĩ ahaat cunni
thoothonniowa cĩk ẽẽn võlõng.
20 Õvõlõngẽ niia gotonu cunni,
ĩthõng adaacu gotonu cunni.
21 Ĩdĩmanu niia thoothonniok cĩkkõ, ĩthõng kĩjakcie na tiv,
umuwu niia ĩthĩ ne, kaavẽ na kĩ niia.
Ĩthõng thĩ, yoko kegerenyeci katĩ na aniitia,
ĩthõng kabilni nguuma cunni.
22 Thĩrar thõõth coo, niia eeti cĩ athii cĩ athĩkna aneeta,
kõdẽ kathanni kẽnnẽ katĩ na aniitia thii,
ĩthõng ithii eeti cĩ ẽẽlani tõõ.
23 Eeti cĩ adĩma kaal cĩk cavawu ongolina aneeta,
ĩthõng ĩdĩmanek nẽ gõõla, kĩĩ woccia kĩtĩrĩthek na
ĩnõõnõ elianĩt cĩ Nyekuco.”