Tẽgẽl 49
Ẽẽn tẽgẽl coo cĩ lõgõõ cĩk lõgõõ cĩk Kõõra, cĩ eyeleei makayyioiti belliok kebelit.
1 Ĩthĩrarit thõõth coo niigia eeta vẽlẽk,
ĩthĩktõy niigia eeta cĩk attiyyu loota ngato,
2 niigia eeta cĩk kĩdĩk kĩ eet cĩk obbitik,
balliowa kĩ eet cĩk apĩrna vẽlẽk.
3 Õthõõth katĩ kũtũgĩ cannie thõõth cĩ gẽẽnyĩtho,
anyi katĩ thõõth cĩ kothoothi na thĩnĩna cannĩ eet gawinit.
4 Kathĩrari katĩ na thõõth cĩ owovothi,
ĩthõng katĩ kẽkẽba ĩnõõnõ thõõtha cĩ alugunyi.
5 Nyia woccia kõtõngõlẽ na wathinniok cĩk gerthek,
katĩ ngĩ alĩkca volongnyiaha aneeta wo?
6 Aari nẽẽgẽ thinneti cĩgĩk balintia cĩnĩng,
ĩthõng ẽngẽrẽn, nyatarka balinit cĩnĩng cĩ obbi õrrõt.
7 Athii woccia cĩ ẽẽla eeti ĩmma rũgẽt cĩ et ĩmma,
kõdẽ anyi Nyekuc dũman cĩ rũgẽt cĩnnĩ.
8 Õkõmĩ dũmaninietĩ cĩ rũgẽtõ,
athii dũmanĩ woccia cĩ awũpan tõõ,
9 cĩ woccia anyi ĩnõõnõ kũrũk kũdũt,
kithii ẽlẽ cĩnnẽ cĩ ammu.
10 Nyatarka acĩn eeta vẽlẽk ngatĩ adaaknĩ eeta cĩk ẽgẽẽnyĩ,
ĩthõng adaaitõ eeta cĩk agiithi buu,
ĩthõng ũtũngtẽĩ balinit cĩnĩng eet õõgĩ.
11 Ẽẽn katĩ loowuana cĩgĩk ciithi cĩgĩk kũdũt,
korookjiowẽy cĩk aatẽ nẽẽgẽ erkinya kĩ erkinya,
kõdẽ woyyia ngĩ akattiek nẽẽgẽ loociok eleeti cĩgĩk.
12 Ĩthõng thĩ, athii cĩ alna eeti kuumuc,
kõdẽ woyyia kẽyẽk balinit,
aavĩ nẽ kĩ kelegiti cĩ boono cĩ adaaĩ.
13 Gõõl katĩ coo cĩ eet cĩk aari thinneti cĩgĩk eletinẽy cĩgĩk,
kĩ eet cĩk õwõb ĩnõõgõ vẽlẽk, cĩk ẽlẽmĩ thoothonniok cĩgĩk.
14 Kĩ athaa cĩk ĩĩtõ õjõõntĩ õõt õngõlantẽ thõng,
ĩthõng õkkõ katĩ aruk daaĩthĩ ĩnõõgõ.
Agam katĩ eeta cĩk abũnna ĩnõõgõ ngerenniet,
ammu katĩ eleeti cĩgĩk loowatõ,
ĩthõng ĩĩtõ katĩ rẽẽntĩ kĩ korookjiok cĩgĩk cĩk obbitik.
15 Ĩthõng thĩ kẽnnẽ, ẽẽla katĩ Nyekuci rũgẽt cannĩ loowatõ,
dĩdĩ, okoyyia katĩ nẽ kũrũbothĩk ĩnõõnõ.
16 Gẽrtha ngĩ alĩĩlĩ niia katĩ ngĩ abalõy eeti ĩmma,
katĩ ngĩ ĩthĩ maka balinti cĩ kõrõõk cĩnnĩ,
17 nyatarka athii katĩ gii cĩ õyõwõt nẽ katĩ ngĩ adaak tõ,
athii cĩ adawothi balinti cĩnnẽ kĩ ĩnõõnõ loowatõ kõdõwẽ.
18 Kõdẽ woyyia balna ngaanĩ arũgĩ nẽnẽ,
ẽkẽb balna nẽ ẽlẽ cĩnnĩ kĩ eeti cĩ agatanẽ,
ĩthõng gõõ adĩhĩth eeta ĩnõõnõ katĩ ngĩ aballie.
19 Ĩthõng thĩ, õkkõ katĩ nẽ adaaĩ,
ĩthõng õõt ũrũmtẽ kĩ õõ baatĩ baatĩ baajigi cĩgĩnĩk,
cĩk katĩ athii cĩ acĩn lanyĩt cĩ rũgẽtõ naboo.
20 Eeti cĩ aballie, ĩthõng athii cĩ aga gẽẽnyĩth,
õgõõn nẽ kĩ kẽlẽgẽ cĩk bõõnak cĩk adaaĩ.