Tẽgẽl 48
Tẽgẽl cĩ lõgõõ cĩk lõgõõ cĩk Kõõra.
1 Maka Makayyioiti,
ĩthõng adĩhĩth woccia eeta ĩnõõnõ
õlõõ ĩcĩ gaalawu cobbi ĩcĩ Nyekuco,
thiira cĩnnĩ cĩ dĩhĩmĩ.
2 Dĩhĩm thiir wuunthẽta cĩnnĩ,
ẽẽn nẽ talinit cĩ looc vẽlẽk.
Wuun Thiir cĩ Thionĩ cĩ ẽẽn
kõrõõk cĩ gaalawu cobbi cĩ Alaan Cobbi Õrrõt,
kaavu kĩ thiir cĩ wuuni cĩ Thavonĩ.
3 Abĩlĩ Nyekuci vatĩkẽy ĩcĩk wuuntik Yeruthalẽma,
ĩthõng ẽyẽla nẽ ẽlẽ cĩnnĩ, kĩĩ ngĩtĩnnĩ cĩ alũwẽ kõkõm.
4 Ma balna ngĩ ũrũmĩt alaanẽta nyĩcẽkẽr cĩgĩk,
õõt nẽẽgẽ jora kõdõwẽ Thiira ĩcĩ Thionĩ,
5 acĩn balna nẽẽgẽ Thiir cĩ Thionĩ, ĩthõng ubulantẽ õrrõt,
ivitia ivirit balna nẽẽgẽ tongolintia.
6 Ikiyyia balna agam barritõnĩ ĩnõõgõ natẽ,
kaavu kĩ wuciithi cĩ ngaa cĩ aamnyi.
7 Athaanu niia ĩnõõgõ kĩ kõvõwõlẽta cĩk Tarthithi,
cĩk balna athaan ngõõtĩ cĩ aku tõõna ĩcĩ alibanĩ kõrra.
8 Kĩcĩ balna kathĩkna naaga tiicanẽ cĩk tiirtik cĩk Nyekucak,
kivitiaha kĩcĩnta naaga yoko dĩdĩ,
õlõõ ĩcĩ gaalawu cobbi cĩ Makayyioit cĩ Ijiar vẽlẽk,
õlõõ ĩcĩ gaalawu cobbi cĩ Nyekuc cĩnac,
ẽẽla Nyekuci ĩnõõnõ erkinya kĩ erkinya.
9 Nyekuc, Ciitha cunni, kamukca naaga
mĩnan cunni cĩ aavĩ kũdũt.
10 Nyekuc, kĩ thara cugunniek,
arawak dĩhĩthẽnĩtĩ cunnie turnanta cĩ loocu,
abbĩththĩ athiit cunni cĩ athio bũnnathĩtĩ.
11 Ẽbẽlbẽl eeta Thiira cĩ Thionĩ,
atalĩ korookjiowa cĩk Yudaa,
nyatarka thoothonniok cĩk engeri niinia.
12 Õtõõth niigia Thiira cĩ Thionĩ oyokonit ĩnõõnõ,
ekebit vatĩk cĩk wuuntik cĩk abĩlnĩ nyĩcẽkẽrĩ,
13 Ĩcĩnĩt da yoko nõõnõ niigia lũwatua cĩgĩnĩk jurrung,
ĩthõng icintu vatĩk cĩgĩnĩk cĩk wuuntik,
kĩĩ katĩ uduktiak dõõlĩ cuguk cĩk katĩ ngaanĩ avvu kõr ĩmma.
14 Nyatarka ẽẽn Nyekuci coo Nyekuc cĩnac kũdũt,
ẽẽn katĩ nẽ Tirithioit cĩnac ĩĩthõng kõr cĩ ditianẽt cĩ loocu.