Tẽgẽl 45
Ẽẽn tẽgẽl coo cĩ lõgõõ cĩk lõgõõ cĩk Kõõra, cĩ eyeleei makayyioiti belliok kebelit tihẽnta.
1 Abbĩththĩ thĩnĩn cannĩ thoothiowa cĩk abũnna,
kĩ cĩ kebelei alaan tẽgẽl coo,
õgõõn ahaatĩ cannie kĩ galamĩ cĩ tehedioit cĩ abũnna.
2 Abũnna niia ijiari eet cĩk maacĩk vẽlẽk,
aga niia ngatĩ othoothi jurrung,
nyatarka agatanni balna aniitia Nyekuci kũdũt.
3 Niia cĩ obbi cĩ joro wo, gam nyetubat cunni,
arĩk ẽlẽ cunni bulẽnta kĩ makathĩta.
4 Bulẽnta cunni, tõõ bĩt ĩcĩ aavẽ jiarinietĩ,
nyatarka nẽwõõĩ thõõth cĩ ẽẽn dĩdĩ
kĩ thimatĩth kĩ bũnnathĩt,
anyĩk athiit cunni cĩ athio kĩdĩman
thoothonniok cĩk anaat eeta.
5 Anyĩk nyarangĩt cugunik cĩk lẽhẽdĩk
kicciacõ thinneti cĩk mĩrõk cugunik,
anyĩk kuukitõ loociowa looc thoonĩy cugunik.
6 Nyekuc, alna katĩ alaanthẽtĩ cunnie kũdũt,a
agami katĩ niia eet cugunik tẽlẽẽa cunni ĩcĩ bũnnathĩto.
7 Amĩnani niia thõõth cĩ abũnna,
ĩthõng aaburewu thõõth cĩ gerthe,
ĩthõng thĩna, Nyekuc, Nyekuc cunni
cĩ aarici aniitia jiar goonogu cugunik,
gõõla cĩ avuudi nẽ aniitia ngooroca cĩ talintio.
8 Õngõlĩ ceremuana cugunniek ngooroc cĩ ẽmmẽdẽ,
ebeleci eeta tẽgẽl aniitia cĩ eeni alaan,
anyi nyĩgĩta cĩk ongoluanu ciithi cugunik kĩdĩhĩmtẽ.
9 Ẽẽn doolia cĩk ngayyik cĩk alaanetu kõrgẽna cunni,
ngaay cĩk abulie,
attia cunni cĩ athio, abĩlĩ ngaa cunnie
cĩ ahimit daab cĩ looc cĩ Oviri.
10 Nyẽtẽranti cĩ alaano wo, thĩwõy, arĩk kĩtat thõõth cannĩ,
anyĩk kerekteei eeta cugunniek kĩ kõrõõk cĩ baaba.
11 Kĩyokowo, abarriteei alaanĩ dihimitin cĩ ẽlẽ cunni,
tõngõlẽ ĩnõõnõ, nyatarka ẽẽn nẽ maac cunni.
12 Ayahaci katĩ aniitia eeta
cĩk kõrõõk cĩ gaalawu cĩ Tire anyinit ĩmma,
avvu katĩ balliowa ajinni aniitia elinit cunni.
13 Niia nyẽtẽranti cĩ alaano wo, eeni niia dĩhĩm ciitha cunni,
arĩhanothi daabĩ cẽrẽma cunni.
14 Ovoyyi katĩ nẽẽgẽ aniitia ĩcĩ alaano,
ahimiti katĩ niia ceremua cĩk dĩhĩmĩk.
Owobji katĩ aniitia goonogu cĩk ẽẽn buweeci,
ĩthõng ayakti aniitia ootti ĩcĩnnĩ.
15 Avvu nẽẽgẽ talintia kĩ bẽlbẽllõna,
ngatĩ iithiowĩ nẽẽgẽ kõrõõk cobbi cĩ alaano.
16 Abarĩc katĩ lõgõõ cugunniek ngĩtĩ baatĩ baatĩ baajigu cugunik,
anyi katĩ ĩnõõgõ kagamit looc vẽlẽk.
17 Kaanyi katĩ na thar cugunik kubullie kũdũt,
ĩthõng thĩna, idihiththi katĩ loociowa aniitia kũdũt.