Tẽgẽl 44
Ẽẽn tẽgẽl coo cĩ lõgõõ cĩk lõgõõ cĩk Kõõra, cĩ eyeleei makayyioiti belliok kebelit.
1 Nyekuc, kĩthĩraryia balna naaga kĩĩnĩy ĩcĩgak,
uduktaet balna õõ baatĩ baangietĩ cĩgaak ageeta,
thoothonniok cĩk balna adĩmani niia
wathinniowẽy wũk baa lõõla.
2 Umuru balna niia tiirthẽta cunni
loociok cĩk eet cĩk athii cĩ alayyi aniitia,
ĩthõng balna anyiwu õõ baangietĩ cĩgaak
kabaaitõ looca cĩnĩng.
Athaanu balna niia eet wũk aatĩ looca,
ĩthõng anyiwu õõ baangĩ cĩgaak
kabaaitõ looca nĩĩcẽ jurrung.
3 Athii balna cĩ agama eeta cugunniek looc nĩcẽ nyetubanyay cĩgĩk,
kõdẽ balna athii cĩ agama tiirthẽta cĩnĩng,
ĩthõng thĩ, agami balna niia looc nĩcẽ tiirthẽta cunni,
kĩ bulẽnta cĩ nguum cunni, nyatarka amĩnani balna niia ĩnõõgõ.
4 Eeni niia Nyekuc cannĩ kĩ Alaan cannĩ,
anyĩk eet cĩk Yokobĩ tiirthẽt kijiaritõ.
5 Ĩthõng ĩcunni, kijiaryia naaga mĩrõk cĩgaak,
thaarĩy cugunik, kumurya naaga eet cĩk aaburneccet ageeta.
6 Athii na cĩ kaari thĩnĩn cannĩ kirihitia cannĩ,
athii cĩ ayahaca nyetubat cannie jiariniet,
7 ĩthõng thĩ, aniitia cĩ anyet ageeta kijiaryia mĩrõk cĩgaak,
anyiwu ngawani eet cĩk aaburnecceta.
8 Kiriania naaga Nyekuc cĩnang waathĩn tub,
Nyekuc, kadĩhĩththa katĩ naaga thar cugunik kũdũt.
9 Ĩthõng thĩ, yoko ũtũbũret balna niia ageeta,
ĩthõng anyet ageeta kithimatia,
ĩthĩnga niia iriokcu kĩ nyĩcẽkẽr cĩgaak jora.
10 Anyi balna niia mĩrõk cĩgaak kitingkayyiet ageeta,
ĩthõng ẽbẽlanit eeta cĩk aaburneccet ageeta ijjio cĩgaak kithiicõ.
11 Anyet balna niia ageeta kõngõlantea kĩ athaa,
ĩthõng anyet kathaantõthĩha loociok.
12 Ũũtẽnẽ balna niia eet cugunik, nyarobinyay cĩk kĩdĩk,
ĩcĩk athii woccia cĩ ayahaci balinit.
13 Anyiwu balna niia eet cĩk kaarõna kĩ ageeta,
katararyiet, ĩthõng adaaccet thõng.
14 Anyiwu balna niia loociok katararyiet ageeta,
ĩthõng ĩlĩnglĩngantehet ooti cĩgĩk.
15 Agama ngawani waathĩn tub,
ũmmũt ngawani nguum cannĩ,
16 nyatarka arannia kẽnnẽ gwuak aneeta,
ĩthõng adaacianĩ
katĩ ngĩ acĩn mĩrõk cĩganĩk,
ngatĩ adiim ĩcaaca thõõth.
17 Avvu balna thoothiowa cĩkkõ vẽlẽk kĩ ageeta,
kõdẽ woyyia ngaanĩ kerekteei naaga aniitia,
kõdẽ kẽgẽrẽthanta ngẽrẽmngẽrẽm cunni.
18 Ngaanĩ balna kutuburyi thinneti cĩgaak aniitia,
kõdẽ ngaanĩ kẽngẽlanit thoona cĩgaak gõõla ĩcunni.
19 Ĩthõng thĩ, kẽnnẽ balna athaanet niia ageeta,
ĩthõng anyet kaavuttia õlõõ ĩcĩ kireeruanu,
ĩthõng ũtũngehet muwuratõ cĩ olli cuc.
20 Mĩ da balna erektehet thara cĩk Nyekuc cĩnang,
kõdẽ kalayyia nyekuc cĩ rẽẽng,
21 athii woyyia balna cĩ arũba Nyekuci thõõth nĩcẽ,
nyatarka aga nẽ muwẽẽnĩt cĩ alugunyi thinnetinẽy cĩgaak?
22 Ĩthõng thĩ, nyatarka aniitia, karumona kẽnnẽ naaga kĩ daaĩth dõõkĩthĩ,
kaavuttia naaga kĩ athaa cĩk õõt õngõlantẽ thõng.
23 Makayyioit, tĩnga jiena! Oongi woccia gõõ nyia?
Tĩnga jiena! Nyĩ abũrnet ageeta kũdũt!
24 Nyia woccia gõõ luguny nguum cunni wo,
ĩthõng erehei hecinti cĩnang kĩ tdanyinet cĩnang wo?
25 Komoktothĩha naaga looc,
ĩthõng aavutõ nguumti cĩgaak tuduwaca.
26 Tĩnga, ĩthõng ikiyyia ẽẽlaet ageeta!
Elet ageeta mĩnana cunni cĩ alna kũdũt!