Tẽgẽl 41
Ẽẽn tẽgẽl cĩ Davide coo, cĩ eyeleei makayyioiti belliok kebelit.
1 Agatanẽ eeti cĩ ẽẽl ngĩjũrra,
ẽẽla katĩ Makayyioiti et nĩcẽ
wathinniowẽy cĩk apĩrnanẽ nẽ.
2 Ẽẽla katĩ Makayyioiti ĩnõõnõ,
ĩthõng ũthũũtĩ ĩnõõnõ kũrũk,
agatan katĩ nẽ ĩnõõnõ looca,
ĩthõng ẽẽl ĩnõõnõ mĩrõwẽy ĩcĩgĩnĩk.
3 Ẽẽla katĩ Makayyioiti ĩnõõnõ katĩ ngĩ ĩmmõrĩ,
ĩthõng anyĩk ĩnõõnõ kũbũna.
4 Ĩthõng balna kalawõy kĩthĩ ne,
“Makayyioit, tamatĩha baai aneeta,
anya kũbũna, nyatarka balna kẽgẽrẽthanõy na ĩcunni.”
5 Õthõõth kẽnnẽ mĩrõwa cĩganniek gerthetina
athĩ ne, “Adaaĩ katĩ nẽ katĩngan,
ĩthõng ithiicõ thara cĩgĩnnẽk vẽlẽk?”
6 Ĩthõng mĩ aku acĩnna miroiti ĩmma,
aku gõõla ĩcĩ abũnna,
ĩthõng thĩ, monogo alũta thĩnĩn cĩnnẽ teedinet,
ĩthõng ũũk õthõõtha kĩ eet vatĩk vẽlẽk.
7 Eeta vẽlẽk cĩk aaburnecca aneeta
owodoonia aneeta,
amuk thõõth cĩ gerthe õrrõt,
nyatarka aneeta, athĩ ne,
8 “Ĩtĩmmõr nẽ mõõrĩth cĩ gerthe wak,
ĩthĩnga katĩ ĩngathĩ nẽ lobela cĩnnĩ wo.”
9 Kõdẽ gõõna cannie kir cĩ kaari thĩnĩn cannĩ,
ĩthõng kuduktowa kõdõwẽ buu kĩ aneeta,
ũtũwũwõthĩha aneeta, ĩthõng ĩdĩmana buth.
10 Ĩthõng thĩ, niia Makayyioit, tamatĩha aneeta,
rũgũthaha aneeta, kĩĩ katĩ koccia kũdũman ĩnõõgõ.
11 Kagga na ngatĩ atalneca niia aneeta,
nyatarka athii miroiti cannie cĩ ijiarya aneeta.
12 Bũnnatina cannĩ, athunnia niia aneeta,
ĩthõng anya kaavu ngatĩ aavẽ niia kũdũt.
13 Anycĩk niigia Makayyioit Nyekuc cĩ Ĩthraĩlĩ
kĩdĩhĩthẽ erkinya kĩ erkinya.
Amẽn, ĩthõng amẽn.