Nyaraga cĩ ẽẽn ramma
Tegelua 42-72
Tẽgẽl 42
Ẽẽn tẽgẽl coo cĩ lõgõõ cĩk lõgõõ cĩk Kõõra, cĩ eyeleei makayyioiti belliok kebelit.
1 Nyekuc, ẽrẽppanni ririwacĩ cannie aniitia,
kĩcĩ ẽrẽppan mẽgẽrĩ cĩ aruk kõr maam lilliowẽy.
2 Ẽrẽppan ririwacĩ cannie Nyekuc cĩ arũgĩ kũdũt.
Kõkkõ woccia katĩ na karumona kĩ Nyekuc katĩngan?
3 Ĩĩtõ tulalõ cĩganniek dainit cannĩ
waathĩn kĩ baalin,
ma ngaanĩ etheca eeta waathĩn tub ne,
“Aavĩ Nyekuci cunnie ngatdang?”
4 Kahada na kaal cĩkkõ katĩ ngĩ kaduwai Nyekuc
thoothonniok vẽlẽk cĩk ririwac cannĩ,
gõõl cĩ kiiriokca balna gõõ naaga kĩ meelitin cĩ obbi,
kõkõyyẽ ĩnõõgõ ĩcĩ Ciith cĩ Nyekuco,
kebelina moloowuanĩy ĩcĩk obbitik, ĩthõng kenteea
Nyekuc ne, ibalallẽ meelitina peyiana.
5 Nyia kõmõthẽ thĩnĩn cannie wo?
Nyia kabarrit ẽlẽ cannie wo?
Kaari na muwẽẽnĩt cannĩ cĩ abũnna ĩcĩ Nyekuco,
nyatarka ngaanĩ katĩ kadihithi na ĩnõõnõ,
Omothie ririwacĩ cannie õrrõt kũdũt,
ĩthõng thĩna, kahadani katĩ na aniitia
thiiryiowẽy ĩcĩk Hermoni kĩ ĩcĩk Mitharĩ,
cĩ arihanĩ lĩĩlĩ cĩ Yordanĩ,
7 Kathĩrari na gẽrẽnyõn cĩ bũlũco,
kĩcĩ atikca maama cugunniek cĩk tiirtik aneeta.
8 Ẽyẽla Makayyioiti mĩnan cĩnnĩ dõõkĩthĩ waathĩn vẽlẽk,
ĩthõng aavu tẽgẽl cĩnnẽ kĩ aneeta baalin vẽlẽk,
cĩ ẽẽn lawinit kĩ Nyekuc cĩ rũgẽt cannĩ.
9 Kennei na Nyekuc cĩ ẽẽn Thiir cannĩ cĩ athunnia aneeta ne,
“Nyia balna niia reheha wo?
Nyia koccia kutulu na,
nyatarka ĩtdanyca balna mĩrõwa cĩganniek wo?”
10 Ẽcẽrẽt ammẽ cĩganniek wuciitha,
kĩcĩ arannia mĩrõwa cĩganniek waathĩn tub etheca ne,
“Aavĩ Nyekuci cunnie ngatdang?”
11 Thĩnĩn cannie, nyia niia mõthẽ wo?
Nyia barrit niia ẽla cannĩ wo?
Arĩk muwẽẽnĩt cunni cĩ abũnna kĩ Nyekuc,
nyatarka kadihithi katĩ na ĩnõõnõ,
Ellioit cannĩ kĩ Nyekuc cannĩ.