Tẽgẽl 40
Ẽẽn tẽgẽl cĩ Davide coo, cĩ makayyioit cĩ tegeluanu.
1 Kẽrẽ balna na Makayyioit mogintia,
ĩthõng ikiyyia ĩthĩrara nẽ aneeta, ĩthõng ẽdẽc ulua cannĩ.
2 Utuguraha balna nẽ aneeta loowatõ,
utuguraha balna nẽ aneeta loroboca,
aari balna nẽ thoo cĩganĩk laaraba,
ĩthõng aanyĩk nẽ thoo cĩganĩk kĩbĩlĩt ngatĩ õkõmĩ.
3 Anya nẽ aneeta tẽgẽl cĩ jõr cĩ kebeli na,
tẽgẽl cĩ kadĩhĩthẽ na Nyekuc cĩnac.
Mẽẽlĩ katĩ eeta cĩk acĩn, ĩthõng otongollie,
ĩthõng aryik thinneti cĩgĩk ĩcĩ Makayyiokto.
4 Agatanni eeti cĩ aari thĩnĩn cĩnnĩ Makayyiokta,
et cĩ athii cĩ aari thĩnĩn cĩnnĩ ĩcĩ eet cĩk ẽngẽrẽnĩ,
eet cĩk ala nyekucnya cĩk ẽẽn võlõng.
5 Makayyioit Nyekuc cannĩ, mẽẽlĩ thoothiowa
cĩk abulannet cĩk balna ĩdĩmanu niinia.
Mẽẽlĩ thoothonniowa cĩk atukwuanecet ageeta eeta,
athii eeti ĩmma cĩ abilni aniitia tõ.
Ma ngĩ kadiimi na kothoothi ĩnõõgõ,
mẽẽlĩ nẽẽgẽ ngatĩ kaduwanẽ na.
6 Athii balna cĩ adiimi niia gii cĩ cavĩto cĩ avaaddi,
kõdẽ anyinit, ĩthõng thĩ kẽnnẽ,
anya niia aneeta kĩĩn cĩk kathikni aniitia.
Athii balna niia cĩ adiimi
anyinit cĩ avaaddi kĩ anyinit cĩ gẽrẽthaninto.
7 Ĩthõng kĩthĩ na ne, “Aneeta coo, kikiyyia,
kaavu kĩcĩ eheeddi Nyaragawa cunni, nyatarka aneeta.
8 Nyekuc cannĩ, kadiimi kadĩmani na diimẽnẽt cunni,
aavĩ Ngiranĩ cunnie thĩnĩna cannĩ.”
9 Kaduwa na bũnnathĩt cunni meelitina cobbi,
athii cĩ kanyugi na kũtũk cannĩ,
Makayyioit, kĩcĩ aga niia buu.
10 Athii cĩ kalugunyi na bũnnathĩt cunni thĩnĩna cannĩ,
kothoothi na thõõth cĩ athũnnẽ niia kĩ elianĩt cunni.
Athii cĩ kalugunyi na mĩnan cunni
kĩ thõõth cunni cĩ ẽẽn dĩdĩ meelitina cobbi.
11 Makayyioit, nyĩ abĩlnẽ niia tamati cunni
kĩ aneeta, athunnia woccia mĩnanĩ cunnie
kĩ thõõth cunni cĩ ẽẽn dĩdĩ aneeta.
12 Alĩhecca aneeta pĩrnanẽtĩ cobbi,
athii woccia cĩ kekebi buu,
agamta thoothonniowa cĩk gerthek cĩganniek
aneeta, ĩthõng ĩthĩnga kekebi buu.
Ijiaritõ nẽẽgẽ ĩm cĩk õõ cannĩ,
ĩthõng ĩthĩnga thĩnĩn cannie õkõmĩ.
13 Makayyioit, yiey ẽẽla aneeta,
Makayyioit, ijjia ẽẽla aneeta tamanoko!
14 Anyĩk woccia eet cĩk adiim ngĩ arukca aneeta,
kangawanit, ĩthõng atalmanyantẽ kũdũt,
anyĩk woccia eet cĩk adiim daaĩth cannĩ,
kimiiryie, ĩthõng umuddia ngawani.
15 Anyĩk woccia eet cĩk arannia aneeta,
kĩdĩmantẽ buth ngawanintia cĩnĩng õrrõt.
16 Ĩthõng thĩ, anyĩk woccia eet vẽlẽk
cĩk ẽrẽppanni aniitia,
katalit, ĩthõng ebelbelit ĩcunni,
anyĩk woccia eet cĩk amĩnan elianĩt cunni
kĩĩtõ dõõkĩthĩ ne,
“Anycĩk Makayyioit kĩĩ maka!”
17 Ĩthõng thĩ, keeni na ngĩjũrrait,
ĩthõng kadiimi kaal cĩk meelĩk,
ahadana woccia Makayyioiti aneeta.
Eeni niia Ellioit cannĩ cĩ õõgana aneeta.
Nyekuc, nyĩ avĩya kuumuc.