Tẽgẽl 37
Tẽgẽl cĩ Davide.
1 Nyĩ omothie niia, nyatarka eet cĩk gerthek,
kõdẽ abarriteei eet cĩk atican thoothonniok cĩk gerthek,
2 nyatarka adaaĩ katĩ nẽẽgẽ tamanoko kĩ kartienti cĩ õdõõwa,
adaaĩ katĩ nẽẽgẽ kĩ kẽẽna cĩk katĩ õdõõĩ.
3 Arĩk thĩnĩn cunni ĩcĩ Makayyiokto, ĩthõng iticanu, thõõth cĩ abũnna,
ĩthõng abaawu looca, ĩthõng aavu jurrung.
4 Anyĩk ẽlẽ cunni kẽbẽlbẽl Makayyiokta,
ĩthõng katĩ anyi nẽ kaal cĩk adiim thĩnĩn cunnie.
5 Anyĩk Makayyioit tiic cunni vẽlẽk.
Arĩk thĩnĩn cunni ĩcĩnnĩ, ĩthõng katĩ ẽẽlani nẽnẽ.
6 Anyi katĩ nẽ thõõth cunni cĩ edeemothi
katalany kaavu kĩ kõrra,
ĩthõng alanyĩt thõõth cunnie cĩ eteddi jurrung
kĩ kõr cĩ aavu tiddina.
7 Lẽmanẽ tiv ĩcĩ Makayyiokto,
ĩthõng ereewu ĩnõõnõ mogintia.
Nyĩ omothie katĩ ngĩ adĩman eeta cĩk gerthek
kaal cĩk adiim nẽẽgẽ jurrung,
katĩ ngĩ adĩman nẽẽgẽ thõõth cĩ gerthe.
8 Nyĩ avaraci niia, lĩĩta varac.
Nyĩ omothie, nyatarka okoyyi katĩ mothinti
ĩcĩ thõõth cĩ gerthe dõ.
9 Aruwue katĩ eeta cĩk gerthek kithiicõ,
ĩthõng thĩ kẽnnẽ, abarĩc katĩ eeta
cĩk aari muwẽẽnĩt cĩ abũnna kĩ Makayyioit looc.
10 Athii katĩ eeta cĩk gerthek tamanoko,
kõdẽ woyyia diim niia ĩnõõgõ, athii katĩ nẽẽgẽ cĩ amudiay.
11 Ĩthõng thĩ, kẽnnẽ abarĩc katĩ eeta cĩk ẽẽn thimattiak looc,
ĩthõng katĩ ayait ganõn cobbi.
12 Atukwuaneei eeta cĩk gerthek
eet cĩk abũnna thoothonniok cĩk gerthek,
ĩthõng avaraccik ĩnõõgõ,
13 ĩthõng thĩ, kẽnnẽ arannĩ Makayyioiti eet cĩk gerthek,
nyatarka aga nẽ ngatĩ katĩ akuni kõr cĩnĩng cĩ teedintio.
14 Adĩma eeta cĩk gerthek nyetubanya,
ĩthõng utugurit kirihinya cĩgĩk,
kĩĩ katĩ kuruit ngĩjũrra,
ĩthõng uruit eet cĩk abũnna.
15 Ĩthõng thĩ, kẽnnẽ acuwan katĩ nyetubanya cĩgĩk
thinneti cĩgĩk, ĩthõng katĩ uduullie kirihinya cĩgĩk.
16 Mayya gii cĩ dĩcĩ cĩ ayak eeta cĩk abũnna,
kijiar balinit cĩ obbi cĩ eet cĩk gerthek cĩk meelĩk,
17 nyatarka, athanni katĩ tiirthẽtĩ cĩ eet cĩk gerthek,
ĩthõng thĩ, kẽnnẽ athũnnĩ Makayyioiti eet cĩk abũnna.
18 Agayyie wathinniowa cĩk eet cĩk amĩrĩ Makayyiokta,
ĩthõng katĩ abarĩcĩt nẽẽgẽ looc kũdũt.
19 Athii katĩ cĩ acananni nẽẽgẽ wathinniowẽy ĩcĩk pĩrnantak,
ĩcaa katĩ nẽẽgẽ katĩ ngĩ ikiyyia butunya.
20 Ĩthõng thĩ, kẽnnẽ adaaĩ katĩ eeta cĩk gerthek.
Aatĩ katĩ mĩrõwa cĩk Makayyioktak
kĩ dihimitini cĩ manẽẽnu,
ĩthõng thĩ, athii katĩ nẽẽgẽ kĩ burruti.
21 Acuwana eeta cĩk gerthek kaal,
ĩthõng athii cĩ adũmanĩ,
ĩthõng thĩ, eeta cĩk abũnna anyi eet
kaal thinnetinẽy cĩk abũnna.
22 Eeta cĩk agatan Makayyioiti,
abarĩc katĩ nẽẽgẽ looc, ĩthõng thĩ,
kẽnnẽ eeta cĩk acĩĩn nẽnẽ, adaaĩ katĩna.
23 Mĩ atarnanĩ Makayyioiti gõõl cĩ eeto,
ẽbẽk katĩ nẽ ĩnõõnõ rũgẽta cĩnnĩ.
24 Kõdẽ woyyia kĩdda bĩĩ et, athii katĩ cĩ uuk looc,
nyatarka agam Makayyioiti ĩnõõnõ.
25 Keeni balna na dĩc, ĩthõng yoko katanganya,
ĩthõng ngaanĩ kĩcĩn na eet
cĩk abũnna ngatĩ ũũngnĩcẽ Makayyioiti,
kõdẽ ngĩ kacini dõõlĩ cĩgĩk
ngatĩ alawĩ dainit.
26 Callẽ thinneti cĩgĩk, ĩthõng anyi eet kaal kaganoko,
agatanni katĩ doolia cĩgĩk.
27 Tũngek kaal cĩk gerthek,
ĩthõng ĩdĩmanu thõõth cĩ abũnna,
kĩĩ katĩ ijjia avvue looc kũdũt.
28 Nyatarka amĩnan Makayyioiti eet
cĩk edeemi thõõth jurrung,
ĩthõng athii katĩ cĩ uungni eet cĩgĩnĩk
cĩk athũnnĩ thõõth cĩnnĩ.
Athũnnĩ katĩ nẽ ĩnõõgõ kũdũt, ĩthõng thĩ,
athanni katĩ doolia cĩk eet cĩk gerthek.
29 Abarĩc katĩ eeta cĩk edeemi thõõth looc,
ĩthõng aavutõ natẽ kũdũt.
30 Õthõõth kũtũgĩ cĩ et cĩ abũnna thõõth cĩ gẽẽnyĩtho,
ĩthõng õthõõth ahaatĩ cĩnnẽ thõõth cĩ edeemothi.
31 Aavĩ Ngiranĩ cĩ Nyekuc cĩnnĩ thĩnĩna cĩnnĩ,
kĩĩ katĩ athii thoona cĩgĩnnẽk cĩ aritaniay gõõla.
32 Oginneei eeta cĩk gerthek eet cĩk abũnna,
nyatarka adiim ngĩ aruk ĩnõõgõ thõng.
33 Ĩthõng thĩ, kẽnnẽ athii katĩ cĩ uungni Makayyioiti eet
cĩk abũnna athĩnẽy cĩk eet cĩk gerthek,
kõdẽ uungni ĩnõõgõ keteddothĩk thõõth,
katĩ ngĩ õvõyyĩ eeta ĩnõõgõ lokika.
34 Arĩk niia thĩnĩn cunni Makayyiokta,
ĩthõng aavu gõõla cĩnnĩ.
Odongnyi katĩ nẽ aniitia, kĩĩ katĩ barĩc niia looc.
Mĩ igiiryiay eeta cĩk gerthek,
ikiyyia katĩ niia icinu thõõth coo.
35 Kĩcĩna balna na et cĩ gerthe õrrõt,
ĩthõng ollia thĩnĩn cĩnnẽ
ngatĩ abalini kaavu kĩ kẽẽt
cĩ cũlaĩ tõdõway ĩcĩgĩnĩk,
36 ĩthõng thĩ, kẽnnẽ ikiyyia adaak nẽ tamanoko,
ĩthõng ithiiwa, kõdẽ woyyia balna ngĩ kadiimi na ĩnõõnõ,
athii kẽnnẽ cĩ amudiay nẽ buu.
37 Muk da thõõth cĩ eet cĩk amĩrĩ, rẽpan da eet cĩk abũnna,
aavĩ katĩ kõr ĩmma, eeti cĩ abũnna ganõna.
38 Ĩthõng thĩ, kẽnnẽ aruwue katĩ gẽrẽthanniowa vẽlẽk,
aruwue katĩ kõr ĩmma eeta cĩk gerthek kithiicõ.
39 Aku ellianĩtĩ cĩ eet cĩk edeemi thõõth ĩcĩ Makayyiokto,
athũnnĩ nẽ ĩnõõgõ kõrra ĩcĩ aavẽ pĩrnanẽtĩ.
40 Ẽẽl Makayyioiti ĩnõõgõ, ĩthõng õõga ĩnõõgõ,
eetĩnẽy cĩk gerthek, ĩthõng ẽẽla ĩnõõgõ,
nyatarka õvvõ alugunyẽnĩ nẽẽgẽ ĩnõõnõ.