Tẽgẽl 36
Tẽgẽl cĩ Davide ticciannioit cĩ Makayyiokto cĩ eyeleei makayyioiti belliok kebelit.
1 Abũrĩ eeti cĩ gerthe Nyekuc kũdũt,
athii tongolinti cĩ Nyekuco kẽbẽrẽnĩy cĩgĩnĩk tõõ.
2 Ahad nẽ athĩ ne, abũnna nẽ õrrõt,
athii woccia cĩ acĩn, kõdẽ aaburneei gerthetin cĩnnĩ.
3 Gerthe thoothiowa cĩk kũtũk cĩnnĩ, ĩthõng ĩĩtõ võlõng.
Ĩthĩnga balna ẽgẽẽnyĩ nẽ,
ĩthõng ĩthĩnga adĩman thoothonniok cĩk abũnna.
4 Kõdẽ lobela cĩnnĩ buu, atukwuan thoothonniok cĩk gerthek,
aavĩ nẽ muwẽẽnta cĩ gẽrẽthaninto dõ,
ĩthõng ĩthĩnga abũrĩ thoothonniok cĩk gerthek.
5 Makayyioit, õdõlan mĩnanĩ cunnie tammutiddin,
õdõlan thõõth cunnie cĩ athũnnẽ tammutiddin.
6 Õgõõn thõõth cunnie cĩ edeemothi kĩ thiiryiowa cĩk obbitik,
ĩthõng aavu gõõl cĩ ẽtẽẽdẽ niia thõõth kedemothĩk,
kĩ bũlũc cĩ wuuni õrrõt.
Makayyioit, athũnnẽ niia eet kĩ kẽlẽgẽ kũrũgĩt.
7 Athii woccia mĩnanĩ cunnie cĩ alna kũdũt cĩ uutiay thõng!
Arũba eeta vẽlẽk ngĩtĩ alugunyẽnĩ,
ria cĩ kavutanẽ cugunik.
8 Adak nẽẽgẽ peyian daintia cĩ obbi ĩcĩ aavĩ õlõõ cunni.
Anyi niia ĩnõõgõ wũdẽnĩt cĩ aku duwwua cunni cĩ talintio.
9 Nyatarka, aku keberecĩ cĩ maamu cĩ rũgẽtõ kĩ aniitia,
ĩthõng ũtũkũlet lanyĩtĩ cunnie ageeta.
10 Anyĩk mĩnan cunni kaavu ĩcĩ eet cĩk agayyi aniitia,
anyĩk thõõth cunni cĩ edeemothi kaavu,
ĩcĩ eet cĩk ayak thinneti cĩk abũnna.
11 Nyĩ woccia anyi eet cĩk ẽngẽrẽn kivitia kuuktowa kĩ aneeta,
kõdẽ anyi eet cĩk gerthek, kitingkayyia aneeta.
12 Kĩcĩna na eet cĩk gerthek ngatĩ uuki looc,
kithii cĩ ĩngathĩ naboo!