Tẽgẽl 35
Tẽgẽl cĩ Davide.
1 Makayyioit, ẽpẽkantõy kĩ eet
cĩk kẽpẽkanona kĩ aneeta,
uuktõy kĩ eet cĩk kuukona kĩ aneeta.
2 Gam kilib kĩ ijjio cĩk jorak,
ĩthõng ĩtĩnga ikiyyia ẽẽlanĩ.
3 Dĩmanek niia dĩlanya cugunik,
ĩthõng ikiyyia uuktowu
kĩ eet cĩk ingkayya aneeta.
Duwak ririwac cannĩ ethek ne,
“Keeni na elianĩt cunni.”
4 Anyĩk woccia eet cĩk adiim ngĩ arukca aneeta,
kijiaryie, ĩthõng angawanita.
Anyĩk woccia eet cĩk atukwuan kurukta aneeta,
kimiiryie, ĩthõng atalmanyantẽ.
5 Anyĩk woccia ĩnõõgõ kaavutõ
kĩ taaha cĩk avungan ngõõtĩ,
ĩthõng anyĩk anjĩlõ cĩ Makayyiokto
kitingka ĩnõõgõ.
6 Anyĩk woccia gõõl cĩnĩng kĩĩ muwur, ĩthõng athalkat thõng,
katĩ ngĩ umur anjĩlõ cĩ Makayyiokto ĩnõõgõ.
7 Nyatarka edeteca nẽẽgẽ aneeta nyeritie cĩnĩng, et cĩ kamiri,
ĩthõng adaacõ look, nyatarka aneeta,
8 anyĩk woccia ĩnõõgõ kuruktie talmanyanintia.
Anyĩk woccia nyeritie cĩ edettia nẽẽgẽ
aneeta wo, kagam ĩnõõgõ.
Anyĩk woccia ĩnõõgõ
kutduktothĩk look kadaaitõ.
9 Ĩthõng katĩ ẽbẽlbẽl ririwacĩ cannie ĩcĩ Makayyiokto,
ĩthõng atal elianta cĩnnĩ.
10 Kothoothi katĩ na thĩnĩna cannĩ kathĩ ne,
“Makayyioit, ngẽnẽ cĩ aduwonu kĩ aniitia?
Ẽẽla niia piryiak, eetĩnẽy cĩk tiirtik õrrõt kĩ ĩnõõgõ,
ĩthõng ĩbĩlẽ eet cĩk tiirtik
ngatĩ agamanĩ ĩnõõgõ ijjio cĩgĩk.”
11 Alibaca aneeta eeta cĩk ollik thinneti cĩk ẽẽn kẽbẽrẽ,
ĩthõng ijinta thoothonniok cĩk athii cĩ kagga na buu.
12 Adũmanna nẽẽgẽ aneeta bũnnathĩt cannĩ gerthetina,
ĩthõng ũtũngtek ririwac cannĩ kaavu nẽdõ.
13 Ĩthõng thĩ kẽnnẽ, ma balna ngĩ ĩmmõrĩ nẽẽgẽ,
kikiyyia kutulu, nyatarka ĩnõõgõ,
ĩthõng katamaca ẽlẽ cannĩ, ĩthõng kẽdẽtha daintia,
ma balna ngĩ athii cĩ ẽdẽcĩ Nyekuci lawinit cannĩ,
14 kũwa balna, ĩthõng kutulu,
kaavu kĩcĩ kalu gõõna, kõdẽ gõtõna.
Kuululi balna na õõ cannĩ mothintia,
kaavu kĩcĩ kalu yaang cannĩ.
15 Ĩthõng thĩ, kẽnnẽ ma balna ngĩ ĩdayya bĩĩ wo,
ivitia uluttie nẽẽgẽ, ĩthõng atararyia aneeta.
Ivitia balna uluttie, ĩthõng ayaktaha
jore ngaanĩ kagga buu.
Ayahaca balna nẽẽgẽ aneeta kirirẽn kũdũt,
ĩthõng athii cĩ abĩlĩ buu.
16 Ivitia balna atararyia nẽẽgẽ aneeta buth,
kĩ eeta cĩk athii cĩ aga Nyekuc,
adaheca aneeta nyĩgĩt cĩgĩk varacintia.
17 Makayyioit, ebei katĩ niia thõõth coo kĩĩ tĩngan?
Ẽẽla rũgẽt cannĩ thoothiowẽy cĩgĩk ĩcĩk gerthek õrrõt.
Ẽẽla rũgẽt cannĩ maatẽy ĩcĩkkõ.
18 Kenneci katĩ na ne, ibalallẽ meelitina cobbi.
Kadihithi katĩ aniitia eetĩnẽy cĩk meelĩk.
19 Nyĩ anyi mĩrõk cĩganĩk katararyia aneeta
mĩrõk cĩk aaburnecca aneeta kaganoko.
Nyĩ anyi eet cĩk akanana aneeta kaganoko,
kutukwuanit kidiimitõ kurukta aneeta.
20 Athii cĩ õthõõth nẽẽgẽ ganõna, ĩthõng thĩ,
atukwuan nẽẽgẽ thoothonniok cĩk ẽẽn kirirẽn,
kĩ eet cĩk aatĩ ganõna loota ngato.
21 Acĩnna nẽẽgẽ aneeta, ĩthõng egerenyit ĩĩtõ ne, “Ii! Ii!
Kicinti naaga kẽbẽrẽnĩy cĩgaak dĩdĩ.”
22 Makayyioit, icinu balna niia thõõth coo, nyĩ ĩjakcie.
Makayyioit, nyĩ eeni rẽẽn kĩ aneeta.
23 Tĩnga jiena, ijjia bẽhanĩ!
Nyekuc Makayyioit cannĩ, ẽẽla aneeta thõõtha cannĩ wo.
24 Makayyioit Nyekuc cannĩ, thõõtha
cunni ĩcĩ edeemothi, anya kĩmĩr nana,
nyĩ anyi ĩnõõgõ katararyia aneeta.
25 Nyĩ anyi ĩnõõgõ kĩĩtõ ne,
“Thõõth cĩ kadiimnya balna kĩ ĩnõõnõ neccie!”
Kõdẽ kĩĩtõ ne, “Kukuyyia balna ĩnõõnõ rũgẽtẽt!”
26 Anyĩk woccia eet cĩk arannĩ mothinit cannĩ
kũrũbta ngawani, ĩthõng atalmanyantẽ,
anyĩk woccia eet cĩk odongeca aneeta
eleeti cĩgĩk kagam ngawani.
27 Anyĩk woccia eet cĩk atalĩ,
nyatarka arũba ngĩ kamiri na,
kegerenyit talintia kĩ bẽlbẽllõna.
Anyĩk woccia ĩnõõgõ kĩĩtõ dõõkĩthĩ ne,
“Anycĩk Makayyioit kĩdĩhĩthẽ,
ĩnõõnõ cĩ atalĩ katĩ ngĩ
aavĩ ticciannioiti cĩnnẽ jurrung.”
28 Õthõõth katĩ kũtũgĩ cannie bũnnathĩt cunni,
kĩ dĩhĩthẽnĩt cunni waathĩn tub.